Deuteronomio 19 - Jiñi Tsiji' bʌ Wen T'añ cha'añ Estudio

Jiñi tejclum tac ba'añ mi' puts'ibʌl

¹ Che' ba' ora a Yum Dios mi caj i jisan jiñi xchumtʌlob ya' ba' mi caj i yʌq'ueñet a Yum Dios cha'añ ma' ch'ʌm yic'ot cha'añ ma' wochel ti chumtʌl ti' tejclumob yic'ot ti yototob,

² mi caj a yajcan uxp'ejl tejclum tac ya' ti yojlil jiñi lum woli bʌ i yʌq'ueñet a Yum Dios, cha'añ ma' ch'ʌm.

³ Mi caj a wen chajpʌben i bijlel yic'ot mi caj a t'ox ti uxmojt jiñi lum woli bʌ i yʌq'ueñet a Yum Dios, cha'añ mi' puts'el majlel ti jiñi tejclum majqui jach mi' cha'len tsʌnsa.

⁴ Jiñi xtsʌnsa mu' bʌ i mejlel ti puts'el ya'i yic'ot cha'añ cuxul mi' yajñel: jiñʌch jiñi mu' bʌ i tsʌnsan i pi'ʌl che' mach tsajilic i cha'añ yic'ot che' mach i contrajic ti yam bʌ ora;

⁵ lajal che' bajche' jiñi mu' bʌ i pʌy majlel i pi'ʌl ti mate'el ti xot' si', mi tsa' loq'ui jiñi jacha ya' ti' te'el che' bʌ woli i wojlan i si', mi tsa' c'oti ya' ti' tojlel i pi'ʌl, mi tsa' chʌmi, jiñi wiñic mi' mejlel ti puts'el ya' ti jump'ejl jiñi uxp'ejl tejclum tac cha'añ mi' coltañ i bʌ;

⁶ ame tilic jiñi xq'uexta bec' ch'ich', che' wen mich', mi caj i yajñesan jiñi xtsʌnsa, mi tsi' taja ya' ti bij cha'añ ti' caj wen ñajt añ jiñi tejclum, mi caj i tsʌnsan, anquese mach yomic mi' tsʌnsan come mach i contrajobic i bʌ yic'ot i pi'ʌl ti ñaxan.

⁷ Jiñi cha'añ mi cʌq'ueñet mandar cha'añ yom ma' yajcan uxp'ejl tejclum.

⁸ Mi a Yum Dios tsi' ñuq'uesa a lum, che' bajche' tsi' wʌn su'beyob a ñojte'elob, yic'ot che' laj a cha'añix pejtelel jiñi lum tac che' bajche' tsi' wʌn su'beyob a ñojte'elob cha'añ mi caj i yʌq'ueñob

⁹ —cojach yom ma' chʌn mel che' bajche' añ ti ili mandar tac woli bʌ c su'beñet wʌle cha'añ ma' jac': C'uxbin a Yum Dios yic'ot chʌn cha'len xʌmbal ti' bijlel ti pejtelel q'uiñ—, jiñi cha'añ yom ma' wa'chocon yam bʌ uxp'ejl tejclum,

¹⁰ cha'añ ma'añic mi caj i bejq'uel i ch'ich'el wiñic mach bʌ añic i mul ti jiñi lum woli bʌ i yʌq'ueñet a Yum Dios yic'ot cha'añ ma'añic mi' tajtʌl a mul che' mi' bejq'uel i ch'ich'el wiñic.

¹¹ Pero mi añ juntiquil mu' bʌ i ts'a'len i pi'ʌl, mi woli' chijtan, mi tsi' jats'ʌ cha'añ mi' tsʌnsan, mi tsa' chʌmi, mi tsa' majli ti puts'el ya' ti jiñi tejclum tac ba'añ puts'ibʌl,

¹² jiñi xñoxob ya' ti' tejclum jiñi tsa' bʌ tsʌnsʌnti mi caj i yʌc'ob i t'añ cha'añ mi' pʌjyel tilel jiñi xtsʌnsa cha'añ mi' yʌc'ob ti' wenta jiñi xq'uexta bec' ch'ich' cha'añ mi' chʌmel.

¹³ Mach ma' p'untan; cojach bajche' jiñi mi caj a choc loq'uel ti' tojlel israelob pejtelel jiñi mu' bʌ i bec'ben i ch'ich'el i pi'ʌl mach bʌ añic i mul, che' jiñi uts'at mi caj a wajñel.

¹⁴ Ti jiñi lum ba' ma' majlel ti chumtʌl woli bʌ i yʌq'ueñet a Yum Dios, ma'añic mi caj a xoyben i cayajonlel i lum yam bʌ a pi'ʌlob ya' ba' tsi' ñaxan p'isiyob jiñi xñoxob.

Mandar tac cha'añ testigojob

¹⁵ Mach yomic mi la' ñopben i t'añ juntiquil wiñic che' mi' su'b i mul i pi'ʌl ti baqui jach bʌ mulil. Cojach ti' t'añ cha'tiquil o uxtiquil tsa' bʌ i q'ueleyob, mi' mejlel ti ñopbentelob i t'añ.

¹⁶ Mi añ juntiquil mu' bʌ i to'ol wa'chocon i t'añ ti' contra i pi'ʌl che' mach isujmic,

¹⁷ che' jiñi yom mi' pʌjyelob ti' cha'ticlelob ti' tojlel lac Yum yic'ot ti' tojlel jiñi motomajob yic'ot ti' tojlel juezob woli bʌ i melob i ye'tel ti jiñi q'uiñ tac.

¹⁸ Jiñi juezob mi caj i wen u'bibeñob i t'añ, mi tsi' wen ch'ʌmbeyob isujm cha'añ mach isujmic i t'añ jiñi woli bʌ i su'b mulil ti' contra i pi'ʌl,

¹⁹ che' jiñi mi caj la' melben che' bajche' tsi' ña'ta i melben i pi'ʌl. Che' jiñi mi caj i jilel jontolil ti la' tojlel.

²⁰ Che' jiñi pejtelel jiñi israelob che' mi' yu'biñob mi' cajelob ti bʌq'uen, ma'añix mi caj i chʌn melob lajal bʌ che' bajche' jiñi ti la' tojlel.

²¹ Mach ma' p'untañob. Jiñi mu' bʌ i cha'len tsʌnsa yom mi' tsʌnsʌntel. Wutʌl i q'uexol wutʌl. Ejʌl i q'uexol ejʌl. C'ʌbʌl i q'uexol c'ʌbʌl. Ocʌl i q'uexol ocʌl.