Deuteronomio 18 - Jiñi Tsiji' bʌ Wen T'añ cha'añ Estudio

Jiñi yom bʌ mi' ch'ʌm levijob

¹ Jiñi motomaj levijo' bʌ, jiñʌch pejtelel i p'olbal Leví; ma'añobic i lum che' bajche' i pi'ʌlob ti Israel; mi caj i tajob i bʌlob i ñʌc' ti jiñi majtañʌl mu' bʌ i pulbentel lac Yum.

² Ma'añobic i lum che' bajche' i pi'ʌlob ti Israel, come lac Yum i wentajʌch i lumob, che' bajche' tsi' wʌn su'beyob.

³ Jiñi yom bʌ mi' yʌq'ueñtelob motomajob ti jiñi majtañʌl mu' bʌ i ch'ʌmob tilel israelob cha'añ tsʌnsʌbil bʌ i majtañ lac Yum, che' bajche' tat wacax o tʌñʌme', jiñʌch i ya' yic'ot i xʌc'ti' yic'ot i chuyib.

⁴ Jiñi ñaxan tac bʌ i wut la' pʌc'ʌb, yic'ot i ya'lel la' ts'usub, yic'ot la' wolivo aceite, yic'ot jiñi ñaxan tac bʌ i tsutsel la' tʌñʌme', yom mi la' wʌq'uen motomajob,

⁵ come lac Yum Dios tsi' yajcayob loq'uel ti la' tojlel yic'ot i yalobilob cha'añ mi' chʌn melbeñob i ye'tel lac Yum ti pejtelel ora.

⁶ Che' mi' loq'uel juntiquil leví ti' tejclum Israel ya' ba' chumul cha'añ mi' majlel ti e'tel ti pejtelel i pusic'al ya' ti ajñibʌl yajcʌbil bʌ i cha'añ lac Yum,

⁷ mi caj i cha'len i ye'tel ti' c'aba' lac Yum Dios, che' bajche' pejtelel i pi'ʌlob levijo' bʌ ya' bʌ añob ti' tojlel lac Yum.

⁸ Junlajal jach yom mi' yʌq'uentel i bʌl i ñʌc' che' bajche' i pi'ʌlob ti motomaj, anquese añ i chu'bʌañ.

I tic'olob cha'añ ma'añic mi' jac'beñob i costumbre tac jiñi mach bʌ añic mi' ñopob Dios

⁹ Che' ma' wochel ti jiñi lum woli bʌ i yʌq'ueñetla lac Yum Dios, mach yomic mi la' ñop la' mel bi'bi' bʌ che' bajche' yan tac bʌ tejclum.

¹⁰ Mach yomic mi' yajñel ti la' tojlel mu' bʌ i yʌc' ti pulel ti c'ajc ch'itoñ o xch'oc bʌ i yalobil, mi jiñic mu' bʌ i ña'tan chuqui mi caj i yujtel, mi jiñic mu' bʌ i pʌs ñuc tac bʌ i ye'tel, mi jiñic xwujt,

¹¹ mi jiñic xpejca cruz, mi jiñic mu' bʌ i to'ol ña'tan chuqui mi caj i yujtel, mi jiñic mu' bʌ i mel ñuc tac bʌ i ye'tel, mi jiñic yujil bʌ i pejcʌntel ch'ujlelʌl.

¹² Come bi'bi' ti' tojlel lac Yum jiñi mu' bʌ i melob che' bajche' jiñi, cha'añ ti' caj ili bi'bi' tac bʌ, jiñi cha'añ a Yum Dios woli' chocob loq'uel ti la' tojlel ili tejclum tac.

¹³ Yom toj ma' wajñel ti' tojlel a Yum Dios.

¹⁴ Come ili tejclum tac ya' ba' mi caj a majlel ti chumtʌl mi' jac'beñob i t'añ mu' bʌ i pʌs ñuc tac bʌ i ye'tel yic'ot jiñi mu' bʌ i to'ol ña'tañob chuqui mi caj i yujtel tac, pero jatet mach che'ic mi caj a mel come tic'bil i cha'añ a Yum Dios.

Dios tsi' yʌlʌ cha'añ tal juntiquil x'alt'añ che' bajche' Moisés

¹⁵ Lac Yum Dios mi caj i yʌq'ueñet juntiquil x'alt'añ che' bajche' joñon loq'uem bʌ ti a tojlel, mero a pi'ʌl bʌ; jiñi mi caj a jac'ben i t'añ.

¹⁶ Come che' bajche' tsa' c'ajtibe a Yum Dios ya' ti Horeb ti jiñi q'uiñ che' bʌ tsa' la' tempa la' bʌ, tsa' wʌlʌ: “Mach chʌn comix cu'biben i t'añ c Yum Dios, mi comic chʌn q'uel jiñi colem c'ajc, ame chʌmicon”.

¹⁷ Lac Yum tsi' su'beyon: “Uts'at bajche' tsi' cha'leyob t'añ.”

¹⁸ Mi caj c wa'chocobeñob juntiquil x'alt'añ lajal bʌ che' bajche' jatet loq'uem bʌ ti' pi'ʌlob; mi caj cʌq'uen c t'añ ti yej, jiñi mi caj i su'beñob pejtelel chuqui mic su'ben.

¹⁹ Pero majqui jach ma'añic mi yu'bin jiñi t'añ mu' bʌ i su'b jiñi x'alt'añ tij c'aba', mi caj i wersa mel i bʌ tic tojlel.

²⁰ Jiñi x'alt'añ mu' bʌ i bajñel ña'tan chuqui mi' su'b tij c'aba' che' ma'añic tsa' c pejca, o mi tsa' caji i yʌl t'añ ti' c'aba' yam bʌ dios tac, wersa mi' chʌmel jiñi x'alt'añ.

²¹ I tajol ma' wʌl ti a pusic'al: “¿Bajche' mi' mejlel j cʌn lojon mi mach i t'añic lac Yum jiñi woli bʌ i yʌl?”

²² Che'ʌch mi caj la' cʌn: Mi jiñi x'alt'añ tsi' cha'le t'añ ti' c'aba' lac Yum, pero mi ma'añic tsa' ts'ʌctiyi yic'ot mi ma'añic tsa' ujti chuqui tsi' yʌlʌ, jiñi t'añ mach tilemic ti lac Yum. Tsa' jach i bajñel ña'ta chuqui tsi' yʌlʌ jiñi x'alt'añ; mach mi la' bʌc'ñan.