Deuteronomio 17 - Jiñi Tsiji' bʌ Wen T'añ cha'añ Estudio

¹ Mach yomic mi la' tsʌnsʌben lac Yum Dios tat wacax o tʌñʌme' am bʌ i c'am-ʌjel o i p'ajomal, come bi'bi' ti' wut lac Yum.

² Mi añ ti la' tejclum tsa' bʌ i yʌq'ueyetla lac Yum Dios juntiquil wiñic o x'ixic tsa' bʌ i taja i mul ti' wut lac Yum Dios, mi tsi' ñusa jiñi xuc'ul bʌ t'añ,

³ mi tsa' majli i ch'ujutesan yam bʌ dios tac yic'ot mi tsi' ñocchoco i bʌ ti' tojlelob, mi ti' tojlel q'uiñ, mi ti' tojlel uw o ti' tojlel pejtelel chuqui añ tac ti panchan, tic'bil bʌ c cha'añ;

⁴ mi añ majqui mi' tilel i su'beñet, che' jiñi wen c'ajtinla mi isujmʌch. Mi' isujmʌch tsi' mele chuqui bi'bi' ti' tojlel israelob,

⁵ mi caj la' choc loq'uel ti ti' la' tejclum jiñi wiñic o jiñi x'ixic tsa' bʌ i mele chuqui leco, mi wiñic o mi x'ixic yom mi la' jul ti xajlel jinto mi' chʌmel.

⁶ Cha'añ ti' t'añ cha'tiquil o uxtiquil testigojob, wersa yom mi' chʌmel jiñi xmulil; pero mi juntiquil jach testigo, ma'añic mi' tsʌnsʌntel.

⁷ Jiñi testigojob ñaxan mi caj i julob ti xajlel jiñi xmulil, ti wi'il mi caj i julob pejtelel jiñi año' bʌ ti tejclum. Che'ʌch mi caj i jilel jontolil ti la' tojlel.

⁸ Che' añ junchajp wocol mach bʌ mejlic a mel che' ti' yorajlel meloñel, che' bajche' jujunchajp tsʌnsa o yan tac bʌ, o che' mi' cajatañob i chu'bʌañ o yan tac bʌ, o che' mi' lowob i bʌ ti' chajp ti' chajp o yan tac bʌ, o cha'añ jujunchajp wocol ti ye'telob ya' ti la' tejclum tac; che' jiñi mi caj a majlel ya' ti ajñibʌl yajcʌbil bʌ i cha'añ a Yum Dios.

⁹ Mi caj a majlel ba'añ jiñi motomajob levijo' bʌ, yic'ot ba'añ jiñi juez woli bʌ i mel i ye'tel ti jiñi q'uiñ, yic'ot mi caj a c'ajtibeñob. Jiñobʌch mu' bʌ caj i su'beñetob che' bajche' yom mi' yujtel jiñi meloñel.

¹⁰ Mi caj a mel che' bajche' tsi' su'beyetob jiñi año' bʌ i ye'tel ya' ti ajñibʌl yajcʌbil bʌ i cha'añ lac Yum. Yom ts'ʌcʌl ma' mel ti' pejtelel che' bajche' ma' su'bentel.

¹¹ Mi caj a mel ti ts'ʌcʌl che' bajche' tsa' su'bentiyet yic'ot che' bajche' tsa' ajli ti melobʌjʌl; mach yomic ma' wis tʌts' a bʌ mi ti a ñojic mi ti a ts'ejic che' bajche' tsa' ajli.

¹² Jiñi wiñic mu' bʌ i chañ-esan i bʌ, mach bʌ añic mi' jac'ben i t'añ jiñi motomaj woli bʌ i mel i ye'tel ti' tojlel la' Yum Dios, o mach bʌ añic mi' jac'ben i t'añ jiñi juez, wersa mi caj i chʌmel. Che'ʌch mi caj lajmel jontolil ti' tojlel israelob.

¹³ Che' mi yu'biñob pejtelel wiñicob x'ixicob, mi' cajelob ti bʌq'uen, che' jiñi ma'añix mi caj i chʌn chañ-esañob i bʌ.

Che' bajche' yom mi' mel i ye'tel rey

¹⁴ Che' ochemetix ti jiñi lum woli bʌ i yʌq'ueñet a Yum Dios, che' añix ti a wenta cha'añ ma' chumtʌl, che' jiñi mi caj a wʌl: “Mi caj wa'chocon c rey che' bajche' yan tac bʌ tejclum año' bʌ tic joytʌlel.”

¹⁵ Isujm mi caj a wa'chocon che' bajche' a rey jiñi yajcʌbil bʌ i cha'añ a Yum Dios. Mi caj a wa'chocon ti rey juntiquil a pi'ʌl bʌ ti Israel; mach yomic ma' wotsan ti rey juntiquil wiñic ñajt bʌ ch'oyol mach bʌ israelic.

¹⁶ Pero jiñi rey mach yomic mi' p'ojlesan ca'bʌl i caballo tac, mi yomic mi' cha' choc majlel wiñicob ti Egipto cha'añ mi' taj ca'bʌl i caballo tac, come lac Yum tsi' yʌlʌ: “Mach yomic mi la' chʌn sujtel ti jiñi bij ba' tsa' tiliyetla.”

¹⁷ Che' ja'el mach yomic mi' pʌy ca'bʌl i yijñam cha'añ ma'añic mi' sojquel i pusic'al; mi yomic mi' tempan ca'bʌl plata yic'ot oro.

¹⁸ Che' mi' buchtʌl ti' yumʌntel jiñi rey, che' jiñi mi caj i cha' ts'ijban ti juñ pejtelel jiñi mandar lotbil bʌ i cha'añ jiñi motomajob levijo' bʌ.

¹⁹ Jiñi rey yom añ ti' c'ʌb jiñi juñ cha'añ mi' pejcan ti jujump'ejl q'uiñ che' cuxul to, cha'añ mi' ñop i bʌc'ñan i Yum Dios, yic'ot cha'añ mi' jac' ti' pejtelel jiñi mandar yic'ot i su'bal, cha'añ mi' mel che' bajche' ts'ijbubil.

²⁰ Che' jiñi ma'añic mi caj i chañ-esan i bʌ ti' tojlel i pi'ʌlob, yic'ot ma'añic mi caj i tʌts' i bʌ ti jiñi mandar mi ti' ñoj mi ti' ts'ej, cha'añ che' jiñi jal mi caj i cha'len yumʌntel ti Israel, yic'ot i yalobilob ja'el.