Deuteronomio 16 - Jiñi Tsiji' bʌ Wen T'añ cha'añ Estudio

Jiñi q'uiñijel tac ti jujump'ejl ja'b

¹ Ti jujump'ejl ja'b che' ti Abib yom mi la' mel q'uiñijel cha'añ Pascua ti' tojlel lac Yum Dios, come ti jiñi uw che' ti Abib, che' ti ac'ʌlel lac Yum Dios tsi' loc'sayetla ti Egipto.

² Mi caj la' tsʌnsan jiñi tʌñʌme' yic'ot i ña'al wacax cha'añ i Pascua lac Yum Dios ti jiñi ajñibʌl yajcʌbil bʌ i cha'añ lac Yum ba' mi' ch'ujutesʌntel i c'aba'.

³ Mach mi la' c'ux jiñi we'elʌl yic'ot waj mach bʌ añic i levadurajlel; wucp'ejl q'uiñ mi caj la' c'ux waj mach bʌ añic i levadurajlel, come jiñʌch i yejtal la' wocol cha'añ ba ora tsa' loq'uiyetla ti' lumal Egipto, cha'añ mi la' chʌn ña'tan ti pejtelel ora che' cuxulet to la ti jiñi q'uiñ che' bʌ tsa' loq'uiyetla ti' lumal Egipto.

⁴ Wucp'ejl q'uiñ mach yomic mi' tajtʌl waj am bʌ i levadurajlel ti' pejtelel la' lumal. Che' ti' tejchibal q'uiñijel, che' ti ic'ajel, che' mi la' tsʌnsan jiñi wacax o jiñi tʌñʌme', mach yomic mi' cʌytʌl i colojbal cha'añ i yijc'ʌlal.

⁵ Mach mejlic la' tsʌnsan jiñi majtañʌl cha'añ Pascua baqui jach bʌ la' lumal tac mu' bʌ i yʌq'ueñetla lac Yum Dios,

⁶ cojach ti jiñi ajñibʌl yajcʌbil bʌ i cha'añ lac Yum Dios ba' mi' ch'ujutesʌntel i c'aba'. Ya'i mi caj la' tsʌnsan jiñi majtañʌl cha'añ Pascua, che' ti ic'ajel, che' woli ti bʌjlel q'uiñ, come jiñʌch che' ti jiñi ic'ajel che' bʌ tsa' loq'uiyetla ti Egipto.

⁷ Jiñi we'elʌl yom mi la' pojpon yic'ot yom mi la' c'ux ya' ti ajñibʌl yajcʌbil bʌ i cha'añ lac Yum Dios; che' ti sʌc'ajel mi' mejlel la' cha' sujtel ti la' wotot.

⁸ Wʌcp'ejl q'uiñ yom mi la' c'ux jiñi waj mach bʌ añic i levadurajlel yic'ot che' ti' wucp'ejlel q'uiñ jiñʌch ch'ujul bʌ q'uiñijel i cha'añ bʌ lac Yum Dios. Mach yomic mi la' cha'len e'tel ti jiñi q'uiñ.

⁹ Wucp'ejl semana mi caj la' tsic; che' mi la' tech la' tuc' i wut trigo mi caj la' tech la' tsic wucp'ejl semana.

¹⁰ Mi caj la' mel jiñi ch'ujul bʌ q'uiñijel cha'añ semana tac cha'añ i ch'ujutesʌntel lac Yum Dios; mi caj la' ch'ʌmben majlel i majtañ pasem bʌ ti la' pusic'al loc'sʌbil bʌ ti pejtelel chuqui tac tsa' bʌ la' taja ti la' we'tel che' bajche' c'amel tsi' yʌq'ueyetla lac Yum Dios.

¹¹ Mi caj la' wu'bin i tijicñʌyel la' pusic'al ti' tojlel lac Yum Dios, ti jiñi ajñibʌl yajcʌbil bʌ i cha'añ lac Yum Dios ba' mi' ch'ujutesʌntel i c'aba', jatet yic'ot ch'itoñ bʌ, yic'ot xch'oc bʌ la' walobilob, yic'ot la' wiñicob, yic'ot la' criadajob, yic'ot jiñi levijob ya' bʌ chumulob la' wic'ot, yic'ot jiñi ñajt bʌ ch'oyolob, yic'ot me'ba' alʌlob, yic'ot me'ba' x'ixicob ya' bʌ chumulob la' wic'ot.

¹² Ña'tanla bajche' tsa' la' cha'le majtañ e'tel ti Egipto. Jac'ʌla ti uts'at pejtelel ili mandar.

¹³ Wucp'ejl q'uiñ mi caj la' mel ch'ujul bʌ q'uiñijel cha'añ lejchempat tac che' ujtemix la' tuc' la' trigo, yic'ot che' mi' yujtel la' yʌts' la' ts'usub.

¹⁴ Mi caj la' wu'bin i tijicñʌyel la' pusic'al ti jiñi ch'ujul bʌ q'uiñijel tac, jatet, yic'ot ch'itoñ bʌ yic'ot xch'oc bʌ la' walobilob, yic'ot la' wiñicob, yic'ot la' criadajob, yic'ot jiñi levijob, yic'ot jiñi ñajt bʌ ch'oyolob, yic'ot me'ba' alʌlob, yic'ot me'ba' x'ixicob ya' bʌ chumulob ti la' lumal.

¹⁵ Wucp'ejl q'uiñ mi caj la' cha'len ch'ujul bʌ q'uiñijel cha'añ i ch'ujutesʌntel lac Yum Dios ya' ti jiñi ajñibʌl yajcʌbil bʌ i cha'añ lac Yum, come lac Yum tsi' pʌsbeñetla i yutslel ti pejtelel i wut la' pʌc'ʌb yic'ot ti pejtelel la' we'tel, che' jiñi wen tijicña mi caj la' wu'bin.

¹⁶ Uxyajl ti jujump'ejl ja'b mi caj i majlel pejtelel wiñicob ya' ti ajñibʌl yajcʌbil bʌ i cha'añ lac Yum Dios, jiñʌch che' ti' q'uiñilel waj mach bʌ añic i levadurajlel, yic'ot ti' q'uiñilel jiñi semana tac, yic'ot ti' q'uiñilel Tabernáculo. Mach yomic mi juntiquilic to'ol meq'uel i c'ʌb mi' majlel ti' tojlel lac Yum;

¹⁷ ti jujuntiquil mi caj i yʌc' i yofrenda che' bajche' tsi' colta lac Yum Dios ti' pejtelel i ye'tel.

Che' bajche' yom jiñi toj bʌ meloñel

¹⁸ Ti pejtelel tejclum tac mu' bʌ caj i yʌq'ueñetla lac Yum Dios, mi caj la' wa'chocon juezob yic'ot año' bʌ i ye'tel ti jujunmojt i p'olbal Israel cha'añ mi' cha'leñob meloñel ti toj ti' tojlel i pi'ʌlob.

¹⁹ Mach yomic mi la' jem jiñi toj bʌ, mach yomic jelchojc jach mi la' c'uxbin la' pi'ʌlob mi yomic mi la' mucul ch'ʌm taq'uiñ ti' tojlelob, come jiñi mucul bʌ majtañʌl mi' mʌcbeñob i wut jiñi año' bʌ i ña'tʌbal yic'ot mi' socbeñob i t'añ jiñi tojo' bʌ.

²⁰ Pejtelel jiñi toj bʌ meloñel jiñʌch yom bʌ mi la' tsajcan, cha'añ cuxul mi la' wajñel yic'ot cha'añ mi la' ch'ʌm lum mu' bʌ caj i yʌq'ueñetla lac Yum Dios.

²¹ Mach mi la' wa'chocon i yejtal x'ixic bʌ dios i c'aba' Asera ya' ti' t'ejl ba'añ i pulʌntib i majtañ lac Yum Dios tsa' bʌ a mele,

²² mi yomic mi la' wa'chocon i yejtal yam bʌ dios tac, come ts'a' mi' q'uel lac Yum Dios.