Deuteronomio 15 - Jiñi Tsiji' bʌ Wen T'añ cha'añ Estudio

I ja'bilel che' mi' ñusʌntel bet tac

¹ Ti wuwucp'ejl ja'b wersa mi caj la' ñusʌben la' bʌ la' bet.

² Che' bajche' iliyi mi caj la' mel: Jiñi tsa' bʌ i yʌc'ʌ i chu'bʌañ ti majan ti' tojlel i pi'ʌlob mi caj i jisʌben i bet; mach mejlic i chʌn c'ajtiben i pi'ʌl, come tsa'ix tsictiyi cha'añ i yorajlel i ñusʌntel betʌl che' bajche' tsi' yʌlʌ lac Yum.

³ Mi' mejlel la' c'ajtiben i q'uexol la' taq'uiñ jiñi tilemo' bʌ ti yam bʌ lum mi añ i bet, pero mi caj la' ñusʌben i bet la' pi'ʌlob ti Israel.

⁴ Cha'añ che' jiñi ma'añic mi caj i tajtʌl p'ump'uño' bʌ ti la' tojlel come lac Yum Dios mi caj i yʌq'ueñetla ca'bʌl bendición ya' ti jiñi lum mu' bʌ caj i yʌq'ueñetla ba' mi la' majlel ti chumtʌl,

⁵ mi chʌn xuc'ul mi la' wu'biben i t'añ lac Yum Dios cha'añ mi la' jac'ben yic'ot cha'añ mi la ts'ʌctesan pejtelel i mandar woli bʌ c su'beñetla wʌle.

⁶ Come lac Yum Dios mi caj i yʌq'ueñetla bendición che' bajche' tsi' su'beyetla, mi caj la' wʌq'ueñob ti majan ca'bʌl tejclum tac, pero jatetla ma'añic mi caj la' c'ajtin ti majan; ca'bʌl tejclum tac mi caj i yochelob ti la' wenta cha'añ mi' yumañetla, pero jatetla ma'añic mi caj la' yumañob.

Majan ti' tojlel p'ump'uño' bʌ

⁷ Che' añ juntiquil p'ump'un bʌ la' pi'ʌl ya' ti la' lumal mu' bʌ caj i yʌq'ueñetla lac Yum Dios, mach yomic mi tsʌts-an la' pusic'al, mi yomic che' jach mi la' to'ol q'uel jiñi p'ump'un bʌ la' pi'ʌl,

⁸ pero yom mi la' wʌq'uen ti majan che' bajche' c'amel yom.

⁹ Tsajin la' bʌ ame la' wotsan jontol bʌ ña'tʌbalʌl ti la' pusic'al, ame la' wʌl: “Wolix ti lʌc'tiyel wucp'ejl ja'b che' mi' ñusʌbentelob i bet”, che' jiñi che' jach mi caj a to'ol q'uel a pi'ʌl jiñi p'ump'un bʌ cha'añ ma'añic ma' wʌq'uen chuqui yom, che' jiñi bʌbʌq'uen mi' pejcan lac Yum ti a contra, che' jiñi ma' taj a mul.

¹⁰ Yom mi la' wʌq'uen ti pejtelel la' pusic'al, mach yomic cha'chajp la' pusic'al che' mi la' wʌq'uen, come mi caj i coltañetla lac Yum Dios ti pejtelel la' we'tel yic'ot ti pejtelel chuqui ma' mel.

¹¹ Come añ p'ump'uño' bʌ la' wic'ot ti pejtelel ora; jiñi cha'añ wolic su'beñetla cha'añ yom mi la' coltañ p'ump'uño' bʌ la' pi'ʌlob yic'ot jiñi junyajlel mach bʌ añobic i chu'bʌañ.

Mandar tac cha'añ mozojob

¹² Mi woli i chombeñet i bʌ juntiquil a pi'ʌl cha'añ mi yochel ti a mozo, mi wiñic mi x'ixic ti Israel, wʌcp'ejl ja'b mi caj i melbeñet a we'tel, pero che' ti' wucp'ejlel ja'b mi caj a cʌy ti libre.

¹³ Che' mi' loq'uel ti a wenta mach a to'ol choc sujtel che' meq'uel i c'ʌb,

¹⁴ pero yom ma' wʌq'uen ti' tijicñʌyel a pusic'al a tʌñʌme' tac yic'ot a trigo, yic'ot i ya'lel a ts'usub; mi caj a wʌq'uen jiñi a chu'bʌañ tsa' bʌ i yʌq'ueyet lac Yum.

¹⁵ Yom mi la' ña'tan cha'añ ti yam bʌ ora mozojetla ti' lumal Egipto, pero lac Yum Dios tsi' loc'sayetla; jiñi cha'añ woli cʌq'ueñetla wʌle ili mandar.

¹⁶ Pero mi jiñi a mozo tsi' su'beyet: “Ma'añic mi caj cʌyet” mi che'en, come ti' caj c'ux mi yu'biñet yic'ot jiñi año' bʌ ti a wotot yic'ot cha'añ ti' caj uts'at añ a wic'ot,

¹⁷ che' jiñi yom ma' ch'ʌm acuxan cha'añ ma' ñʌp'chocoben i chiquin ti puerta cha'añ ma' ch'u'ben, che' jiñi a mozojʌch mi' yajñel ti pejtelel ora. Che'ʌch yom ma' melben ja'el jiñi x'ixic bʌ a mozo.

¹⁸ Mach yomic wocol ma' wu'bin che' ma' wʌc' ti libre a mozo, come tsi' melbeyet a we'tel wʌcp'ejl ja'b, come i ye'tel lajal tsa' tojo yilal che' bajche' ojlil i tojol jump'ejl q'uiñ i ye'tel juntiquil x'e'tel; che' jiñi a Yum Dios mi caj i wen coltañet ti pejtelel chuqui ma' mel.

I majtañ lac Yum ñaxan bʌ i yal alʌc'ʌl tac

¹⁹ Yom mi la' wʌq'uen lac Yum Dios pejtelel i tat bʌ ñaxan bʌ i yal la' wacax yic'ot la' tʌñʌme'. Mach yomic ma' c'ʌn ti e'tel ñaxan bʌ i yal a wacax yic'ot mach yomic ma' tsepben i tsutsel ñaxan bʌ i yal a tʌñʌme',

²⁰ come mi caj a c'ux ti jujump'ejl ja'b ti' tojlel a Yum Dios, jatet yic'ot jiñi a pi'ʌlob año' bʌ ti a wotot, ya' ti jiñi ajñibʌl yajcʌbil bʌ i cha'añ lac Yum.

²¹ Pero mi mach c'oq'uic jiñi alʌc'ʌl, mi xpots', mi mach weñic i yoc, mi añ yam bʌ mach bʌ weñic ti' tojlel, mach mi la' tsʌnsʌben lac Yum Dios.

²² Ya' jach yom mi la' c'ux baqui chumuletla; mi bi'bi'etla o mi sʌquetla, mi' mejlel la' c'ux che' bajche' mi la' c'ux chijmay yic'ot tat me'.

²³ Cojach cha'añ ma'añic mi la' c'uxben i ch'ich'el; yom mi la' bec'ben ti lum che' bajche' mi la' bec' ja'.