Deuteronomio 14 - Jiñi Tsiji' bʌ Wen T'añ cha'añ Estudio

¹ Come i yalobiletla lac Yum Dios; mach mi la' tsep la' bʌc'tal, mi yomic mi la' jujchin i tsutsel la' jol cha'añ ti' caj jiñi chʌmeño' bʌ.

² Come ch'ujul bʌ i tejclumetla lac Yum Dios. Tsi' yajcayetla ti' tojlel pejtelel jiñi tejclum tac am bʌ ti pañimil cha'añ mi la' wajñel ti cojach bʌ i tejclum lac Yum.

Jiñi sʌc bʌ yic'ot bi'bi' bʌ bʌte'el tac

³ Mach yomic mi la' c'ux jiñi bi'bi' tac bʌ bʌte'el.

⁴ Jiñʌch ili bʌte'el tac mu' bʌ i mejlel la' c'ux: wacax, tʌñʌme', chivo,

⁵ chijmay, me', xch'aj me', mate' chivo, íbice, me' lajal bʌ i colemlel bajche' wacax yic'ot mate'el tʌñʌme'.

⁶ Che' ja'el mi' mejlel la' c'ux pejtelel alʌc'ʌl tac xac'al tac bʌ i pacaralel i yoc yic'ot yujil bʌ cha' letsel i buc'bal cha'añ mi' cha' jach'.

⁷ Pero mach yomic mi la' c'ux jiñi yujil bʌ cha' letsel i buc'bal cha'añ mi' cha' jach' mi mach xac'alic i pacaralel i yoc che' bajche' camello yic'ot t'ul, yic'ot ujchib, anquese xac'al i pacaralel i yoc tac pero mach yujilic letsel i buc'bal cha'añ mi' cha' jach'; yom mi la' q'uel ti bi'bi'.

⁸ Che' ja'el mach mi la' c'ux jiñi chitam, anquese xac'al i pacaralel i yoc, pero mach yujilic cha' letsel i buc'bal cha'añ mi' cha' jach'; yom mi la' q'uel ti bi'bi'. Mach yomic mi la' c'ux, mi yomic mi la' tʌl che' chʌmeñix ili alʌc'ʌl tac.

⁹ Jiñi añ tac bʌ ti ja', cojach mi' mejlel la' c'ux jiñi añ tac bʌ i welo' ja' yic'ot i sujl.

¹⁰ Pero pejtelel jiñi mach bʌ añic i welo' ja' yic'ot i sujl mach yomic mi la' c'ux; yom mi la' q'uel ti bi'bi'.

¹¹ Mi' mejlel la' c'ux pejtelel jiñi sʌc tac bʌ mate'el mut.

¹² Pero jiñi mate' mut tac mach bʌ mejlic la' c'ux jiñʌch: xiye', xta'jol, azor, yic'ot

¹³ jiñi xtop'bac, milano ti' chajp ti' chajp,

¹⁴ xwachin ti' chajp ti' chajp,

¹⁵ avestruz, alʌ xcuj, gaviota yic'ot xiye' ti' chajp ti' chajp,

¹⁶ colem xcuj, ibis, calamón,

¹⁷ i pechil mar, xta'jol, somormujo,

¹⁸ cigüeña, ja'al pech, abubilla yic'ot suts'.

¹⁹ Pejtelel i yalʌ chʌñil pañimil yujil tac bʌ wejlel mach mejlic la' c'ux; yom mi la' q'uel ti bi'bi'.

²⁰ Pero mi' mejlel la' c'ux pejtelel te'lemut sʌc bʌ.

²¹ Mach yomic mi la' c'ux jiñi chʌmeñ bʌ alʌc'ʌl mi bʌte'el. Mi' mejlel la' wʌq'uen jiñi wiñicob ñajt bʌ ch'oyolob chumulo' bʌ ti la' lumal, jiñi mi' mejlel i c'uxob; o mi mejlel la' chombeñob jiñi ñajt bʌ ch'oyolob, come jatetla ch'ujul bʌ i tejclumetla lac Yum Dios. Mach mi la' ch'ʌx jiñi alʌ chivo ti ya'lel i chu' i ña'.

Mandar cha'añ jiñi diezmo

²² Ti jujump'ejl ja'b wersa mi caj la' wʌc' i diezmojlel pejtelel i wut la' pʌc'ʌb.

²³ Mi caj la' c'ux ti' tojlel lac Yum Dios ya' ti ajñibʌl yajcʌbil bʌ i cha'añ ba' mi' ch'ujutesʌntel; jiñʌch i diezmojlel la' wixim, i ya'lel la' ts'usub yic'ot la' wolivo aceite yic'ot i yʌx-al tac la' wacax yic'ot la' tʌñʌme', cha'añ mi la' ñop la' bʌc'ñan lac Yum Dios ti pejtelel q'uiñ.

²⁴ Mi wen ñajt jiñi ajñibʌl yajcʌbil bʌ i cha'añ lac Yum Dios, mi wocol mi la' cuchben majlel i majtañ ya' baqui mi' ch'ujutesʌntel i c'aba', che' ca'bʌlix woli' p'ojlel la' chu'bʌañ cha'añ i yutslel i pusic'al Dios,

²⁵ che' jiñi mi' mejlel la' chon cha'añ mi la' ch'ʌmben majlel i tojol ya' ti ajñibʌl tsa' bʌ i yajca lac Yum Dios.

²⁶ Che' c'otemetixla mi caj la' c'ʌn jiñi taq'uiñ cha'añ mi la' mʌn pejtelel chuqui tac la' wom, che' bajche' wacax, tʌñʌme', i ya'lel ts'usub, mi tsaj o mi paj-esʌbilix, o mi chuqui tac jach la' wom. Mi caj la' c'ux yic'ot pejtelel la' pi'ʌlob ti' tijicñʌyel la' pusic'al ya' ti' tojlel lac Yum Dios.

²⁷ Ma'añic mi caj la' to'ol q'uel jiñi levijob chumulo' bʌ ti la' lumal, come ma'añobic i lum la' wic'ot.

²⁸ Ti' jilibal tac u'uxp'ejl ja'b mi caj la' loc'ben pejtelel i diezmojlel la' pʌc'ʌb yic'ot la' wʌlac' mu' bʌ la' taj ti jiñi ja'bil; mi caj la' lot ya' ti la' tejclum tac.

²⁹ Ya'i mi caj i c'otelob jiñi levijob come ma'añobic i lum ti la' tojlel yic'ot jiñi ch'oyolo' bʌ ti yam bʌ lum yic'ot jiñi me'ba' alʌlob yic'ot me'ba' x'ixicob am bʌ ti la' tejclum tac; mi caj la' wʌq'ueñob cha'añ mi' c'uxob jinto mi' ñaj-añob, cha'añ che' jiñi mi caj la' wʌq'uentel i yutslel i pusic'al lac Yum Dios ti pejtelel la' we'tel.