Deuteronomio 13 - Jiñi Tsiji' bʌ Wen T'añ cha'añ Estudio

¹ Che' mi' tilel ti la' tojlel juntiquil x'alt'añ o juntiquil mu' bʌ i ñajlen chuqui mi' yujtel, mi tsi' su'beyetla jump'ejl i yejtal cha'añ chuqui mi caj i yujtel,

² mi tsa' ts'ʌctiyi i yejtal tsa' bʌ i yʌlʌ yic'ot i yejtal i p'ʌtʌlel, mi tsi' su'beyet: “Conla ba'añ jiñi dios tac mach bʌ laj cʌñʌyic cha'añ mi lac ch'ujutesan”,

³ mach mi la' ñʌch'tʌben i t'añ jiñi x'alt'añ yic'ot jiñi mu' bʌ i ñajlen chuqui tac mi' yujtel, come lac Yum Dios woli' q'uelbeñetla la' pusic'al cha'añ mi' tsictiyel mi woli la' c'uxbin lac Yum Dios ti pejtelel la' pusic'al yic'ot ti pejtelel la' ch'ujlel.

⁴ Yom mi la' chʌn cha'len xʌmbal ti' bijlel lac Yum Dios, cojach jiñi yom mi la' bʌc'ñan; yom mi la' jac'ben i mandar yic'ot yom mi la' wu'biben i t'añ; yom mi la' ch'ujutesan yic'ot yom chʌn xuc'uletla ti' tojlel.

⁵ Jiñi x'alt'añ o jiñi xñajal yom mi' chʌmel, come tsi' su'beyetla cha'añ mi la' cha'len jontolil ti' tojlel lac Yum Dios tsa' bʌ i loc'sayetla ti Egipto yic'ot tsa' bʌ i mʌñʌyetla loq'uel ti majtañ e'tel. Jiñi payxo x'alt'añ tsi' ñopo i choquetla loq'uel ti' bijlel lac Yum Dios tsa' bʌ i su'beyetla cha'añ mi la' chʌn ajñel ti' bijlel lac Yum. Cojach bajche' jiñi mi caj a choc loq'uel jiñi mulil ti la' tojlel.

⁶ Mi woli i su'beñet a weran, i yalobil a ña', o mi a walobil mi ch'itoñ o mi xch'oc, mi a wijñam, mi a cʌñʌ bʌ, mi tsi' mucu su'beyet: “Conla cha'añ mi lac ch'ujutesan yam bʌ dios tac”, mach bʌ la' cʌñʌyic yic'ot mach bʌ añic tsi' cʌñʌyob la' ñojte'elob,

⁷ —i diosob jiñi tejclum tac am bʌ ti la' joytʌlel, mi lʌc'ʌl añ o mi ñajt añ ti la' tojlel o añ ti ñajt bʌ pañimil—,

⁸ mach mi la' ñopben i t'añ mi yomic mi la' ñʌch'tʌben i t'añ, ma'añic mi caj la' to'ol q'uel, ma'añic mi caj la' p'untan yic'ot ma'añic mi caj la' to'ol mucben i mul,

⁹ mi caj la' tsʌnsan; ñaxan ma' jul, ti wi'il mi caj la' jul ti la' pejtelel.

¹⁰ Mi caj la' jul ti xajlel jinto mi' chʌmel, come tsi' ña'ta i loc'sañetla ti' tojlel lac Yum Dios tsa' bʌ i pʌyʌyetla loq'uel ti' lumal Egipto ba'añ majtañ e'tel,

¹¹ cha'añ mi yu'biñob pejtelel israelob yic'ot cha'añ mi' cha'leñob bʌq'uen, che' jiñi ma'añix mi caj i chʌn melob che' bajche' jiñi.

¹² Mi woli la' wu'bin t'añ ti' tojlel junmojt tejclum ba' woli' i yʌq'ueñetla lac Yum cha'añ mi la' chumtʌl ti jiñi lum,

¹³ mi ya' loq'uem ti la' tojlel jiñi xjontolil woli bʌ i su'beñob jiñi wiñicob x'ixicob ti jiñi tejclum, mi woli i yʌl: “Conla cha'añ mi lac ch'ujutesan yam bʌ dios tac”, mach bʌ la' cʌñʌyic,

¹⁴ yom mi la' wen c'ajtin mi isujm jiñi t'añ. Mi isujmʌch tsi' teche jiñi jontolil ti la' tojlel,

¹⁵ wersa mi caj la' tsʌnsañob ti espada jiñi chumulo' bʌ ti jiñi tejclum, mi caj la' jisan pejtelel chuqui añ i cha'añob, che' ja'el mi caj la' tsʌnsʌbeñob i yʌlac' ti espada.

¹⁶ Mi caj a laj much'quibeñob i chu'bʌañ ya' ti yojlil tejclum, che' jiñi mi caj a tsuc'ben i c'ʌc'al jiñi tejclum yic'ot pejtelel i chu'bʌañob, cha'añ pulbil bʌ i majtañ lac Yum Dios. Mi caj i cʌytʌl jiñi tejclum che' bajche' mach bʌ añix i c'ʌjñibal ti pejtelel ora; ma'añix ba' ora mi caj i chʌn wa'chocontel jiñi tejclum.

¹⁷ Ma'añic mi caj a wis ch'ʌm jiñi chocbilix bʌ i cha'añ Dios, cha'añ mi' lajmel i mich'ajel lac Yum, cha'añ mi' pʌs i yutslel i pusic'al yic'ot cha'añ mi' p'untañetla, yic'ot cha'añ mi' p'ojlesañetla che' bajche' tsi' wʌn su'beyob la' ñojte'elob;

¹⁸ che'ʌch mi caj i yujtel mi mux la' jac'ben i t'añ lac Yum Dios, mi mux la' mel pejtelel che' bajche' mi yʌl jiñi mandar tac woli bʌ c su'beñetla wʌle, cha'añ mi la' mel chuqui toj ti' wut lac Yum Dios.