Deuteronomio 12 - Jiñi Tsiji' bʌ Wen T'añ cha'añ Estudio

Añ jach jump'ejl Ch'ujul bʌ Ajñibʌl

¹ Jiñʌch la' tic'ol yic'ot jiñi mandar yom bʌ mi caj la' jac' ti jiñi lum woli bʌ i yʌq'ueñetla lac Yum, i Dios la' ñojte'elob, tsa' bʌ i yʌq'ueyetla cha'añ mi la' chumtʌl ti pejtelel ora che' cuxulet to la.

² Mi caj la' laj jisan pejtelel jiñi ajñibʌl tac tsa' bʌ i meleyob jiñi xchumtʌlob ya' ba' mi caj la' majlel ti chumtʌl, ba' woli i ch'ujutesañob i dios tac ti' chañelal wits, yic'ot ti bujtʌl tac, yic'ot ti' ye'bal colem te' tac.

³ Mi caj la' jemben i pulʌntib tac i diosob, mi caj la' top' i yejtal tac i diosob, mi caj la' laj pul i yejtal tac jiñi Asera, mi caj la' laj jisʌben i yejtal tac i diosob yic'ot mi caj la' yʌpben i c'aba' i diosob ti jiñi lum.

⁴ Mach che'ic mi caj la' mel ti' tojlel lac Yum Dios,

⁵ come lac Yum Dios mi caj i yajcan jump'ejl ajñibʌl ya' ti la' lum, cha'añ mi yajñel i c'aba' yic'ot ba' mi' chumtʌl; ya'ʌch ba' mi caj la' majlel la' ch'ujutesan.

⁶ Ya'i mi caj la' ch'ʌm majlel jiñi majtañʌl mu' bʌ caj i laj pulel, yic'ot majtañʌl mu' bʌ i tsʌnsʌntel, yic'ot la' diezmo tac, yic'ot la' wofrenda tac mu' bʌ la' ch'ʌm majlel ti la' c'ʌb, yic'ot majtañʌl che' mi la' wʌc' xuc'ul bʌ la' t'añ, yic'ot majtañʌl tilem bʌ ti la' pusic'al, yic'ot ñaxan bʌ i yal la' wacax, yic'ot ñaxan bʌ i yal la' tʌñʌme';

⁷ ya'i mi caj la' c'ux ti' tojlel lac Yum Dios yic'ot mi caj la' wu'bin i tijicñʌyel la' pusic'al, jatetla yic'ot la' wijñam yic'ot la' walobilob, cha'añ pejtelel i wut la' we'tel che' bajche' tsi' yʌq'ueyetla i bendición lac Yum Dios.

⁸ Mach che'ic mi caj la' mel bajche' woli lac mel ilayi, come jujuntiquil mi' mel che' bajche' yom i pusic'al,

⁹ come c'ʌlʌl wʌle maxto añic tsa' ochiyetla ya' ba' mi caj la' c'aj la' wo, ti jiñi lum mu' bʌ caj i yʌq'ueñetla lac Yum Dios.

¹⁰ Pero mi caj la' c'axel ti jiñi Jordán ja', mi caj la' chumtʌl ti jiñi lum mu' bʌ caj i yʌq'ueñetla lac Yum Dios. Jiñi mi caj i yʌq'ueñetla la' c'aj la' woj ti' tojlel la' contrajob año' bʌ ti la' joytʌlel, che' jiñi mi caj la' cha'len chumtʌl ti uts'at.

¹¹ Ti jiñi ajñibʌl mu' bʌ caj i yajcan lac Yum Dios ba' mi' yajñel i c'aba', ya'i mi caj la' laj ch'ʌm majlel pejtelel chuqui mic su'beñetla, che' bajche': pulbil bʌ majtañʌl, yic'ot tsʌnsʌbil bʌ majtañʌl, yic'ot la' diezmo tac, yic'ot la' wofrenda tac mu' bʌ la' ch'ʌm majlel ti la' c'ʌb, yic'ot pejtelel yajcʌbil bʌ i majtañ tsa' bʌ la' wʌn su'be lac Yum.

¹² Yic'ot mi caj la' wu'bin i tijicñʌyel la' pusic'al ti' tojlel lac Yum Dios, jatetla yic'ot ch'itoñ bʌ yic'ot xch'oc bʌ la walobilob, yic'ot la' wiñicob, yic'ot la' criadajob, yic'ot jiñi levijob chumulo' bʌ ti la' tejclum tac, come ma'añobic i lum ti la' tojlel.

¹³ Tsajiletla cha'añ ma'añic mi la' wʌq'uen i majtañ Dios baqui jach yom la' pusic'al;

¹⁴ cojach mi la' pul jiñi majtañʌl ya' ba' mi' yajcan lac Yum ti' tojlel junmojt israelob yic'ot ya'i mi caj la' mel pejtelel chuqui mic su'beñetla.

¹⁵ Ya' ti la' wotot, mi' mejlel la' tsʌnsan yic'ot mi' mejlel la' c'ux jiñi we'elʌl che' bajche' c'amel la' wom, che' bajche' c'amel i yutslel i pusic'al lac Yum Dios tsi' yʌq'ueyetla. Mi' mejlel i c'ux majqui jach, mi sʌc o mi mach sʌquic jiñi wiñic x'ixic, la' i c'ux che' bajche' mi' c'uxtʌl me'.

¹⁶ Cojach cha'añ ma'añic mi la' c'uxben i ch'ich'el; yom mi' la' bec' che' bajche' mi' la' bec' ja'.

¹⁷ Che' ja'el mach yomic mi' la' c'ux ti la' wotot i wut la' pʌc'ʌb tsa'ix bʌ la' wʌc'ʌ cha'añ la' diezmo, mi la' ts'usub, mi la' wolivo aceite, mi jiñic ñaxan bʌ i yal la' wacax yic'ot la' tʌñʌme', mi jiñic tsa'ix bʌ la' wʌlʌ cha'añ mi caj la' wʌq'uen lac Yum, mi jiñic majtañʌl tilem bʌ ti la' pusic'al o mi yam bʌ majtañʌl lotbil bʌ la' cha'añ,

¹⁸ cojach mi' mejlel la' c'ux ti' tojlel lac Yum Dios, ya' ti' ajñibʌl yajcʌbil bʌ i cha'añ lac Yum Dios, jatet, yic'ot ch'itoñ bʌ yic'ot xch'oc bʌ la' walobilob, yic'ot la' wiñic, yic'ot la' criada, yic'ot jiñi levita chumul bʌ ti la' lum. Mi caj la' wu'bin i tijicñʌyel la' pusic'al ti' tojlel lac Yum Dios cha'añ pejtelel la we'tel tsa' bʌ la' mele.

¹⁹ Yom tsajiletla cha'añ ma'añic mi' ñajʌyel la' cha'añ jiñi levijob che' cuxulet to la.

²⁰ Che' ba' ora lac Yum Dios mi' ñuq'uesan la' lum che' bajche' tsi' su'beyetla, che' jiñi mi caj la' wʌl: “Mi caj j c'ux we'elʌl”, come la' wom la' c'ux; jiñi cha'añ che' ba' ora la' wom la' c'ux we'elʌl, mi' mejlel la' c'ux.

²¹ Mi ñajt chumuletla ti jiñi lum yajcʌbil bʌ i cha'añ lac Yum Dios ba' mi' ch'ujutesʌntel i c'aba', che' jiñi mi' mejlel la' tsʌnsan jiñi wacax yic'ot la' tʌñʌme' tsa' bʌ i yʌq'ueyetla lac Yum, che' bajche' tsa' c su'beyetla; ya'i mi caj la' c'ux che' bajche' c'amel la' wom ya' ti la' tejclum.

²² Mi' mejlel la' c'ux che' bajche' mi la' c'ux me'; jiñi sʌc bʌ yic'ot jiñi mach bʌ sʌquic wiñic x'ixic, mi' mejlel i c'uxob ja'el.

²³ Cojach cha'añ xuc'ul mi la' wajñel cha'añ ma'añic mi la' c'uxben i ch'ich'el, come i ch'ich'el i cuxtʌlelʌch, jiñi cha'añ mach yomic mi' la' c'uxben i ch'ich'el temel yic'ot i bʌc'tal.

²⁴ Mach yomic mi' la' c'uxben i ch'ich'el, yom mi la' bec' ti lum che' bajche' ja'.

²⁵ Mach mi la' c'uxben i ch'ich'el cha'añ uts'at mi la' wajñel jatetla yic'ot la' walobilob, che' ba' ora mi la' mel chuqui uts'at ti' wut lac Yum.

²⁶ Pero jiñi tsa'ix bʌ a cʌyʌ cha'añ ma' wʌq'uen lac Yum yic'ot jiñi ofrenda tac tsa' bʌ la' wʌn alʌ cha'añ mi la' wʌc', mi caj la' ch'ʌm majlel ti jiñi ajñibʌl tsa' bʌ i yajca lac Yum.

²⁷ Mi caj la' wʌc' jiñi pulbil tac bʌ majtañʌl ti' pam jiñi pulʌntib i cha'añ lac Yum Dios, temel yic'ot i bʌc'tal yic'ot i ch'ich'el; i ch'ich'el jiñi tsʌnsʌbil bʌ majtañʌl mi caj la' bec'ben ti' pam jiñi pulʌntib i cha'añ lac Yum Dios, pero mi' mejlel la' c'uxben i bʌc'tal jiñi majtañʌl.

²⁸ Yom mi' la' wen jac' pejtelel jiñi mandar woli bʌ c su'beñetla, come che' mi la' mel chuqui uts'at yic'ot chuqui toj ti' wut lac Yum Dios, uts'at mi caj la ñusan q'uiñ, jatetla yic'ot la' walobilob ti pejtelel ora.

Tsa' wʌn su'bentiyob cha'añ ma'añic mi' ch'ujutesañob yam bʌ dios tac

²⁹ Che' ba' ora lac Yum Dios tsa'ix i jisa jiñi wiñicob x'ixicob ya' ba' mi caj la' ch'ʌm cha'añ mi la' chumtʌl ya' ti' lumob,

³⁰ tsajin la' bʌ ame la' tsajcʌbeñob i melbal, che' ba' ora tsa'ix jisʌntiyob ti la' tojlel; mach mi la' c'ajtin bajche' tsi' ch'ujutesayob i diosob, cha'añ mi la' ch'ujutesan ja'el, lajal che' bajche' tsi' ch'ujutesayob.

³¹ Mach che'ic mi caj la' mel ti' tojlel lac Yum Dios, come ts'a'lebil i cha'añ lac Yum pejtelel bi'bi' tac bʌ tsa' bʌ i melbeyob i diosob, come tsi' puluyob i yalobilob ch'itoñob yic'ot xch'octaco' bʌ cha'añ i majtañ i diosob.

³² Yom mi la' mel pejtelel woli bʌ c su'beñetla; mach mi la' xʌ' otsan la t'añ, mi yomic mi la' t'ox loc'san jiñi t'añ.