Deuteronomio 11 - Jiñi Tsiji' bʌ Wen T'añ cha'añ Estudio

I ñuclel lac Yum

¹ “Yom mi la' c'uxbin lac Yum Dios yic'ot yom mi la' jac'ben i t'añ tsa' bʌ i yʌlʌ, yic'ot i cʌntesʌbal, yic'ot i su'bal yic'ot i mandar ti pejtelel ora.

² Yom mi la' ña'tan —ma'añic wolic pejcan la' walobilob maxto bʌ yujilobic yic'ot maxto bʌ añic tsi' q'ueleyob bajche' mi' ju'san lac pusic'al lac Yum Dios yic'ot bajche' añ i ñuclel yic'ot bajche' yilal i p'ʌtʌlel i c'ʌb yic'ot i yejtal i p'ʌtʌlel

³ tsa' bʌ i pʌsʌ yic'ot bʌbʌq'uen tac bʌ tsa' bʌ i mele ti Egipto, ti' contra faraón, jiñi rey bʌ ti Egipto yic'ot ti' contra pejtelel jiñi año' bʌ ti jiñi lum;

⁴ tsa' la' q'uele chuqui tsa' tumbentiyob jiñi soldadojob año' bʌ ti Egipto, yic'ot i caballo tac yic'ot i carreta tac; che' bajche' lac Yum tsi' laj jisayob ya' ti Mar i c'aba' Chʌchʌc bʌ che' bʌ tsa' tiliyob ti la' pat; tsi' laj jisayob c'ʌlʌl wʌle

⁵ yic'ot pejtelel chuqui tac tsi' melbeyetla Dios ya' ti' tiquiñal lum, c'ʌlʌl che' bʌ tsa' juliyetla ti ili lum

⁶ yic'ot tsa' bʌ i mele Dios ti' tojlel Datán yic'ot Abiram, i yalobilob Eliab, tilemo' bʌ ti' p'olbal Rubén; che' bajche' tsa' cajli jiñi lum cha'añ mi' mujliyelob ochel ti' mal, temel yic'ot i yijñamob yic'ot i yalobilob yic'ot i yototob yic'ot pejtelel i yʌlac'ob ti' wut pejtelel israelob—,

⁷ jatetla tsa'ix la' q'uele pejtelel ili ñuc tac bʌ tsa' bʌ i mele lac Yum ti ca'bʌl i p'ʌtʌlel.”

I yutslel lac Yum tsa' bʌ i wʌn su'beyob

⁸ “Jiñi cha'añ yom mi la' jac' pejtelel jiñi mandar tac woli bʌ c su'beñetla wʌle, cha'añ mi la' chʌn p'ʌt-esʌntel yic'ot cha'añ mi la' wochel la' ch'ʌm jiñi lum ba' mi caj la' chumtʌl,

⁹ yic'ot cha'añ mi' ñajt añ la' ja'bilel ti ili lum, che' bajche' tsi' wʌn su'beyob lac Yum la' ñojte'elob, cha'añ mi caj i yʌq'ueñob jiñi lum yic'ot i p'olbalob, ba'añ ca'bʌl leche yic'ot cha'b.

¹⁰ Jiñi lum ba' mi caj la' wochel cha'añ mi la' ch'ʌm, mach lajalic che' bajche' i lum Egipto ba' tsa' loq'uiyetla, ya' ba' tsa' la' cha'le pac', tsa' la' jambe i bej yoc ja'lel ti la' woc cha'añ mi' yʌch'esan jiñi lum, che' bajche' mi' yʌch'esʌntel chuqui tac pʌc'bil ti pam otot.

¹¹ Jiñi lum ba' mi caj la' wochel cha'añ mi la' ch'ʌm, jiñʌch lum ba' añ wits tac yic'ot joctʌl tac, ba' mi' yʌch'esan ja'al;

¹² jiñʌch jumpejt lum mu' bʌ i cʌntan lac Yum Dios. Ti pejtelel ora mi' q'uel lac Yum Dios jiñi lum che' ti' tejchibal ja'bil c'ʌlʌl ti' yujtibal ja'bil.”

¹³ “Mi tsa' la' wen jac'ʌ pejtelel ili mandar woli bʌ c su'beñetla wʌle, mi mux la' c'uxbin lac Yum Dios yic'ot mi mux la' melben i ye'tel ti pejtelel la' pusic'al yic'ot ti pejtelel la' ch'ujlel,

¹⁴ mi caj c choc tilel ja'al che' ti' yorajlel, jiñi se'b bʌ yic'ot jiñi wi'ilix bʌ, ixcu jatetla mi caj la' cha'len c'ajbal, mi caj la' wen taj i ya'lel la' ts'usub yic'ot la' wolivo aceite.

¹⁵ Che' ja'el mi caj cʌq'ueñetla jam ti la' jamil cha'añ mi' c'ux la' wʌlac' yic'ot mi caj la' taj ca'bʌl i bʌl la' ñʌc' jinto mi la' ñaj-añ.

¹⁶ Yom tsajiletla cha'añ ma'añic mi' jac' i lotintel la' pusic'al yic'ot mach yomic mi la' tʌts' la' bʌ cha'añ mi la' ch'ujutesan yam bʌ dios tac, mach mi la' ñocchocon la' bʌ ti' tojlelob,

¹⁷ ame la' techben i mich'ajel lac Yum, che' jiñi mi caj i ñup' jiñi tocal cha'añ ma'añix mi' chʌn tilel ja'al yic'ot ma'añix mi caj i colel pʌc'ʌbʌl yic'ot mux caj la' bʌc' jilel ti ili wen bʌ lum tsa' bʌ i yʌq'ueyetla lac Yum.”

¹⁸ Jiñi cha'añ, mi caj la' chʌn ac' ti la' pusic'al yic'ot ti la' ch'ujlel pejtelel c t'añ, mi caj la' cʌch ti la' c'ʌb che' bajche' i yejtal yic'ot ti la' pam cha'añ mi la' chʌn ña'tan.

¹⁹ Mi caj la' chʌn cʌntesan la' walobilob che' buchuletla ti la' wotot, yic'ot che' mi la' cha'len xʌmbal ti bij, yic'ot che' mi la' cajel ti ñoltʌl, yic'ot che' mi la' cha' ch'ojyel.

²⁰ Mi caj la' ts'ijban ti' chumte'lel la' wotot yic'ot ti ti' la' wotot,

²¹ cha'añ mi' wen tam-esʌntel la' ja'bilel yic'ot i ja'bilel la' walobilob ti jiñi lum mu' bʌ i yʌq'ueñetla lac Yum che' bajche' tsi' wʌn su'beyob la' ñojte'elob, che'ʌch i ñajtlel la' ja'bilel che' bajche' jalel ora añ panchan ti' chañelal ili lum.

²² Come mi ts'ʌcʌl mi la' jac' pejtelel ili mandar mu' bʌ c su'beñetla yic'ot mi c'ux mi la' wu'bin lac Yum Dios yic'ot mi xuc'ul mi la' chʌn ajñel ti' bijlel cha'añ mi la' tsajcan,

²³ che' jiñi lac Yum mi caj i choc loq'uel pejtelel ili tejclum tac cha'añ mi la' ch'ʌmben i lumob, anquese ñumen ca'bʌlob yic'ot ñumen p'ʌtʌlob bajche' jatetla.

²⁴ Pejtelel jiñi lum baqui mi caj la' xʌn ñumel, la' cha'añʌch: mi' tejchel ti' tiquiñal lum c'ʌlʌl ti Líbano, yic'ot mi' tejchel ya' ti colem ja' i c'aba' Éufrates c'ʌlʌl ti mar am bʌ ti' bʌjlibal q'uiñ, la' cha'añʌch jiñi lum.

²⁵ Ma'añic majqui mi caj i wis mejlel i contrajiñetla; come lac Yum Dios mi caj i yʌq'ueñob i bʌc'ñañetla baqui jach mi la' ñumel che' bajche' tsi' wʌn su'beyetla.

²⁶ Ña'tanla: Wʌle mi cʌq'ueñetla la' yajcan bendición o i mich'ajel Dios:

²⁷ Añ bendición mi tsa' la' chʌn jac'be i mandar lac Yum Dios, woli bʌ c su'beñetla wʌle,

²⁸ pero mi caj la' tajben i mich'ajel Dios mi tsa' la' ñusʌbe i t'añ lac Yum Dios, mi tsa' loq'uiyetla ti jiñi bij woli bʌ c su'beñetla wʌle, cha'añ mi la' tsajcan majlel yam bʌ dios tac mach bʌ la' cʌñʌyic.

²⁹ “Che' tsa'ix i pʌyʌyetla ochel lac Yum Dios ti jiñi lum mu' bʌ caj la' ch'ʌm, mi caj la' su'b jiñi bendición ya' ti wits i c'aba' Gerizim, ixcu i mich'ajel Dios, mi caj la' su'b ya' ti wits i c'aba' Ebal;

³⁰ ya'ʌch añ ili wits tac ti junwejl Jordán ja' ya' ba' mi' bʌjlel q'uiñ, ya' ba' chumulob cananeojob año' bʌ ti Arabá, am bʌ ti' tojel Gilgal, ti' t'ejl jiñi c'olol te' am bʌ ti More.

³¹ Come jatetla mi caj la' c'axel ti junwejl Jordán ja' cha'añ mi caj la' majlel ti chumtʌl ti jiñi lum woli bʌ i yʌq'ueñetla lac Yum Dios. Mi caj la' ch'ʌm cha'añ mi la' chumtʌl.

³² Jiñi cha'añ, yom mi la' wen jac'ben pejtelel i cʌntesʌbal yic'ot i su'bal lac Yum woli bʌ c su'beñetla wʌle.”