Deuteronomio 10 - Jiñi Tsiji' bʌ Wen T'añ cha'añ Estudio

Tsijibtesʌntel jiñi xuc'ul bʌ t'añ

¹ Ti jim bʌ ora lac Yum tsi' su'beyon: “Cha' toj-esan yam bʌ cha'q'uejl xajlel che' bajche' jiñi ñaxan bʌ yic'ot letsen ti wits tic tojlel. Mele ja'el jump'ejl Arca.

² Mi caj c ts'ijban ya' ti xajlel jiñi t'añ am bʌ ti ñaxan bʌ xajlel tac tsa' bʌ a top'o, che' jiñi mux caj a wʌc' ti' mal Arca.”

³ Che' jiñi tsa' c mele Arca ti acacia te', tsa' c toj-esa cha'q'uejl xajlel che' bajche' jiñi ñaxan bʌ, che' jiñi tsa' letsiyon majlel ti wits yic'ot jiñi cha'q'uejl xajlel tij c'ʌb.

⁴ Lac Yum tsi' cha' ts'ijba jiñi t'añ am bʌ ti ñaxan: jiñʌch jiñi lujump'ejl mandar tsa' bʌ i yʌlʌ lac Yum ya' ti' yojlil c'ajc ti wits, che' tempʌbil pejtelel wiñicob x'ixicob. Lac Yum tsi' yʌq'ueyon jiñi cha'q'uejl xajlel.

⁵ Che' jiñi tsa' cha' sujtiyon, tsa' ju'biyon tilel ti jiñi wits, tsa' cotsa jiñi cha'q'uejl xajlel ya' ti Arca tsa' bʌ c mele. Ya' to añ wʌle, che' bajche' tsi' su'beyon lac Yum.

⁶ (Ti wi'il tsa' loq'uiyob jiñi israelob ti Beerot-bene-jaacán, tsa' majliyob ti Mosera. Ya'i tsa' chʌmi Aarón yic'ot ya'i tsi' mucuyob. Jiñi tsa' bʌ i ch'ʌmbe i motomajil Aarón jiñʌch i yalobil i c'aba' Eleazar.

⁷ Tsa' loq'uiyob ti Mosera tsa' majliyob ti Gudgoda. Tsa' loq'uiyob ti Gudgoda, tsa' majliyob ti Jotbata, jiñʌch lum ba'añ ca'bʌl pa' am bʌ i ya'lel.

⁸ Ti jim bʌ ora lac Yum tsi' wa'choco i p'olbal Leví cha'añ mi' ch'ʌmob majlel jiñi Arca ba' lotol jiñi xuc'ul bʌ i t'añ lac Yum, cha'añ mi' chʌn ajñelob jiñi levijob ti' tojlel lac Yum, cha'añ mi' melbeñob i ye'tel yic'ot cha'añ mi' yʌc'ob i yutslel i t'añ ti' c'aba' lac Yum, che' bajche' woli' melob c'ʌlʌl wʌle.

⁹ Jiñi cha'añ jiñi levijob ma'añic tsi' tajayob i lum che' bajche' i pi'ʌlob, come lac Yum i wentajʌch i lumob, che' bajche' lac Yum Dios tsi' su'beyob.)

¹⁰ Ya' tsa' ajñiyon ti jiñi wits che' bajche' ti ñaxan, cha'c'al q'uiñ yic'ot cha'c'al ac'ʌlel. Lac Yum tsi' ñʌch'tʌbeyon c t'añ ti jim bʌ q'uiñ, jiñi cha'añ ma'añic tsi' jisayetla.

¹¹ Lac Yum tsi' su'beyon: “Ch'ojyen, teche a xʌmbal, cucu ti ñaxan ti' tojel i wut jiñi wiñicob x'ixicob cha'añ mi yochelob yic'ot cha'añ mi' ch'ʌmob jiñi lum woli bʌ cʌq'ueñob che' bajche' tsa' c wʌn su'beyob la' ñojte'elob.”

Jiñi mu' bʌ i c'ajtin Dios cha'añ mi lac mel

¹² Jiñi cha'añ wʌle israelob, ¿chuqui woli' c'ajtibeñetla lac Yum Dios? Jiñi yom bʌ jiñʌch cha'añ mi la' bʌc'ñan lac Yum Dios, cha'añ mi la' chʌn cha'len xʌmbal ti' bijlel, cha'añ mi la' c'uxbin yic'ot cha'añ mi la' chʌn melben i ye'tel lac Yum Dios ti pejtelel la' pusic'al yic'ot ti pejtelel la' ch'ujlel,

¹³ cha'añ yom xuc'ul mi' la' jac' pejtelel i mandar lac Yum yic'ot pejtelel i t'añ woli bʌ c su'beñetla wʌle, cha'añ mi' la' taj la' wenlel.

¹⁴ Come laj i cha'añʌch lac Yum Dios jiñi panchan c'ʌlʌl ti' chañelal tac yic'ot pejtelel lum yic'ot pejtelel chuqui tac añ ti pañimil.

¹⁵ Cojach la' tatob uts'at tsa' q'uejliyob ti lac Yum yic'ot c'ux tsi' yu'biyob; jiñi cha'añ tsi' yajcayetla come i p'olbaletla, ma'añic tsi' yajca yan tac bʌ tejclum che' bajche' woli la' q'uel wʌle.

¹⁶ Jiñi cha'añ yom mi la' sʌc-esan la' pusic'al i yejtal bʌ tsep pʌchʌlel, yic'ot mach yomic mi la' chʌn ac' ti tsʌts-an la' pusic'al.

¹⁷ Come lac Yum Dios, i Diosʌch jiñi diosob, i Yumʌch jiñi yumʌlob; wen ñuc bʌ Dios, wen p'ʌtʌl bʌ yic'ot wen bʌc'ñʌbil bʌ, mach bʌ jelchojquic mi' c'uxbin wiñicob x'ixicob, mi muq'uic i ch'ʌm i majtañ cha'añ mi' ñusan jontolil,

¹⁸ mi' coltañ me'ba' alʌlob yic'ot me'ba' x'ixicob cha'añ ma'añic mi' tic'lʌntelob, mi' c'uxbin ja'el jiñi ñajt bʌ ch'oyolob, mi yʌq'ueñ i bʌl i ñʌc' yic'ot i pislel.

¹⁹ Jiñi cha'añ yom mi la' c'uxbin ja'el jiñi wiñicob tilemo' bʌ ti yam bʌ lum, come ti yam bʌ ora, jatetla ja'el tsa' chumleyetla ti Egipto ba' mach la' lumalic.

²⁰ Yom mi la' bʌc'ñan lac Yum Dios, jiñi jach yom mi la' melben i ye'tel, yom mi la' tsajcan yic'ot cojach yom mi la' wa'chocon la' t'añ ti' c'aba' lac Yum.

²¹ Jiñʌch yom bʌ mi la' ch'ujutesan; jiñʌch la' Dios tsa' bʌ i mele jiñi ñuc tac bʌ yic'ot bʌbʌq'uen tac bʌ tsa' bʌ la' q'uele.

²² La' ñojte'elob tsa' ju'biyob majlel ti Egipto yic'ot i yalobilob añob che' bajche' lujuntiquil i chʌnc'al (70) wiñicob ti' pejtelelob, pero wʌle ca'bʌletixla come lac Yum Dios tsa'ix i p'ojlesayetla che' bajche' jiñi ec' tac ti panchan.