Colosenses 4 - Jiñi Tsiji' bʌ Wen T'añ cha'añ Estudio

¹ Yumʌlob, melbenla chuqui uts'at yic'ot chuqui toj jiñi x'e'telob la' cha'añ, come la wujil añ la' Yum ja'el ya' ti panchan.

² Chʌn cha'lenla oración ti' xuc'tʌlel la' pusic'al, yom ch'ejletla ti oración, su'benla Dios wocolix i yʌlʌ;

³ tajayon lojon ti oración ja'el come ñup'ulon cha'añ jiñi wen t'añ, c'ajtibenla Dios cha'añ mi' chajpʌbeñon ba' mic su'b majlel jiñi wen t'añ yic'ot isujmlel Cristo mach bʌ tsictiyemic ti yam bʌ ora,

⁴ cha'añ mic tsictesan majlel che' bajche' yom.

⁵ Ajñenla ti uts'at ti' tojlel jiñi maxto bʌ ochemobic ti' t'añ Dios, c'ʌñʌla ti ts'ʌcʌl jujump'ejl q'uiñ ti' tojlel Dios.

⁶ Ti pejtelel ora cha'lenla uts bʌ t'añ am bʌ i yʌts'mil yu'bil, wen ña'tanla bajche' yom mi la' jac'ben i t'añ jujuntiquil che' mi' pejcañetla.

I YUJTIBAL: I YUTSLEL I T'AÑ ( 4.7-18 )

⁷ Jiñi c'uxbibil bʌ la quermañu Tíquico mi caj i su'beñetla pejtel chuqui wolic mel, jiñʌch xuc'ul bʌ c pi'ʌl ti e'tel ti lac Yum.

⁸ Jiñi cha'añ wolic choc tilel ba'añetla cha'añ mi' la' ña'tan bajche' añon lojon yic'ot cha'añ mi' ñuq'uesʌbeñetla la' pusic'al,

⁹ mi' tilel yic'ot Onésimo jiñi xuc'ul bʌ quermañu, c'uxbibil bʌ lac cha'añ, loq'uem bʌ ba'añetla. Jiñi mi caj i su'beñetla pejtelel chuqui woli ti ujtel ilayi.

¹⁰ Aristarco, jiñi c pi'ʌl ti ñujp'el, mi' yʌq'ueñetla saludo yic'ot Marcos i yalobil i yumijel Bernabé, che' bajche' tsa' c su'beyetla ti yam bʌ ora; yom mi la' pʌy ochel Marcos mi tsa' c'oti ba'añetla;

¹¹ mi' yʌq'ueñetla saludo Jesús, jiñi am bʌ i cha'p'ejlel i c'aba' Justo; ti pejtelel jiñi judíojob cojach cha'tiquil uxtiquil woli' coltañoñob ti e'tel cha'añ i yumʌntel Dios, jiñobʌch tsa' bʌ i ñuq'uesʌbeyoñob c pusic'al.

¹² Mi' yʌq'ueñetla saludo Epafras x'e'tel i cha'añ Cristo tsa' bʌ loq'ui ba'añetla, ti pejtelel ora woli' chʌn cha'len wersa oración cha'añ xuc'ul mi la' wajñel, cha'añ ts'ʌcʌl mi la' laj ña'tan pejtelel chuqui yom Dios.

¹³ Come mic su'beñetla, Epafras ca'bʌl woli' i chʌn ña'tañetla, woli' i ña'tan ja'el pejtelel ya' bʌ añob ti Laodicea yic'ot ti Hierápolis.

¹⁴ Lucas jiñi c'uxbibil bʌ xts'ʌcaya, mi' yʌq'ueñetla saludo, che' ja'el Demas mi yʌq'ueñetla saludo.

¹⁵ Aq'uenla saludo la quermañujob ya' bʌ añob ti Laodicea yic'ot Ninfa yic'ot xñopt'añob mu' bʌ i tempañob i bʌ ti' yotot Ninfa.

¹⁶ Che' mi' yujtel ti q'uejlel ili juñ ba'añetla, aq'uenla i q'uelob ja'el jiñi xñopt'añob mu' bʌ i tempañob i bʌ ya' ti Laodicea, yom mi la' q'uel ja'el jiñi juñ tsa' bʌ chojqui majlel ya' ti Laodicea.

¹⁷ Su'benla Arquipo che' bajche' iliyi: “Chʌcʌ q'uele a bʌ cha'añ ts'ʌcʌl ma' mel a we'tel tsa' bʌ i yʌq'ueyet lac Yum.”

¹⁸ Joñon, Pablo, tsa' c ts'ijba ili saludo tij c'ʌb. Ña'tanla cʌchʌlon ti cadena. La' ajñic la' wic'ot i yutslel i pusic'al Dios. [Amén]