Apocalipsis 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-8 ) Tsi' pʌsʌ i bʌ Jesucristo

¹ Jiñʌch i tsictesʌbal Jesucristo. Dios tsi' yʌq'ue Cristo cha'añ mi' pʌsben i wiñicob chuqui tac mach jalic mi' caj ti ujtel. Cristo tsi' choco tilel i yángel ba'añ Juan, i wiñic Cristo cha'añ mi' tsictesan.

² Juan tsi' su'bu isujmlel i t'añ Dios yic'ot isujmlel Jesucristo yic'ot pejtelel chuqui tac tsi' q'uele.

³ Tijicña jiñi mu' bʌ i q'uel yic'ot jiñi mu' bʌ i yu'biñob jiñi t'añ ts'ijbubil bʌ ti ili juñ, yic'ot jiñi mu' bʌ i jac'ob chuqui tac ts'ijbubil ilayi, come lʌc'ʌlix i yorajlel.

I yutslel i t'añ Juan ti tojlel jiñi wucmojt xñopt'añob

⁴ Juañon, mic ts'ijbubeñetla ili juñ wucmojt xñopt'añet bʌ la mu' bʌ la' tempan la' bʌ ya' ti Asia: La' i yʌq'ueñetla i yutslel yic'ot i ñʌch'tʌlel i pusic'al Dios jiñi am bʌ wʌle, jiñi am bʌ ti wajali, jiñi tal to bʌ, yic'ot jiñi wuctiquil espíritu año' bʌ ti' tojel i buchlib Dios,

⁵ yic'ot ja'el Jesucristo, jiñi xuc'ul bʌ Testigo mu' bʌ i yʌc' ti cʌjñel isujmlel, jiñʌch tsa' bʌ ñaxan tejchi loq'uel ba'añ chʌmeño' bʌ; i yumʌch jiñi reyob ti pañimil. Cristo mi' c'uxbiñonla. Tsi' pocbeyonla loq'uel lac mul ti' ch'ich'el.

⁶ Tsi' yotsayonla ti rey yic'ot ti motomaj ti' tojlel Dios i Tat, la' aq'uentic Jesucristo i ñuclel yic'ot i p'ʌtʌlel ti pejtelel ora. Amén.

⁷ Awilan, tal ti tocal. Pejtelel wiñicob x'ixicob yic'ot jiñi tsa' bʌ i jeq'ueyob mi caj i q'uelob. Pejtelel jujunchajp wiñicob x'ixicob ti pañimil mi' cajelob ti ca'bʌl uq'uel che' mi' tilel Cristo. Che'ʌch yom, amén.

⁸ Joñon tsa' c teche pejtelel chuqui tac añ, mi cʌq'uen i jilibal, añon ti' tejchibal, añon ti' jilibal, che'en lac Yum. Joñoñʌch jiñi am bʌ wʌle, jiñi am bʌ ti wajali, jiñi tal to bʌ, jiñi Mach bʌ Añic i P'isol i P'ʌtʌlel.

1. I CɅNTESɅNTEL JIÑI WUCMOJT XÑOPT'AÑOB ( 1.9—3.22 ) Tsi' q'uele Cristo

⁹ Joñon, Juan, a wermañujon mu' bʌ c tem u'bin wocol quic'otetla cha'añ Jesús, temel añonla ti' yumʌntel, temel woli laj cuch wocol che' mi lac pijtan Jesús, añon ti lum joyol bʌ ti ja' i c'aba' Patmos cha'añ ti caj i su'bol i t'añ Dios yic'ot isujmlel Jesús.

¹⁰ Tsa' bujt'i c pusic'al ti' yEspíritu Dios ti jiñi q'uiñ che' mi ch'ujutesʌntel lac Yum, tsa' cu'bi c'am bʌ t'añ tic pat che' bajche' trompeta,

¹¹ tsi' yʌlʌ: Joñon tsa' c teche pejtelel chuqui tac añ, mi cʌq'uen i jilibal, añon ti ñaxan, añon ti' yujtibal. Ts'ijban ti juñ chuqui tac ma' q'uel, chocbeñob majlel jiñi wucmojt xñopt'añob mu' bʌ i tempañob i bʌ ya' ti Asia, jiñi año' bʌ ti Éfeso, ti Esmirna, ti Pérgamo, ti Tiatira, ti Sardis, ti Filadelfia, yic'ot ti Laodicea.

¹² Tsa' c sutq'ui c bʌ cha'añ mij q'uel majqui woli' pejcañon. Che' bʌ tsa' c sutq'ui c bʌ tsa' q'uele wucts'ijt lámpara melbil bʌ ti oro.

¹³ Ti' yojlil jiñi wucts'ijt lámpara tsa' q'uele i Yalobil Wiñic lʌpʌl i cha'añ pʌl jexan bʌ i bujc c'ʌlʌl ti yoc. Cʌchʌl i tajñ ti' cajchiñʌc' melbil bʌ ti oro.

¹⁴ Sʌsʌc i tsutsel i jol bajche' sʌsʌc bʌ i tsutsel tʌñʌme', sʌsʌc bajche' i ña'al tsʌñal. Woli ti lejmel i wut che' bajche' c'ajc.

¹⁵ Lajal i yoc bajche' lemlaw bʌ c'ʌnc'ʌn taq'uiñ, sʌc-esʌbil bʌ ti c'ajc, che'ʌch i t'añ bajche' ju'ucña bʌ ja'.

¹⁶ Ti ñoj bʌ i c'ʌb añ wucp'ejl ec', woli' loq'uel ti' yej junts'ijt espada jay bʌ i yej ti' cha'wejlel, che'ʌch i wut bajche' jiñi q'uiñ che' ti xinq'uiñil.

¹⁷ Che' bʌ tsa' j q'uele, tsa' yajliyon ti yoc che' bajche' chʌmeñ bʌ, tsi' yʌc'ʌ ñoj bʌ i c'ʌb tic jol, tsi' su'beyon: Mach a cha'len bʌq'uen, añon ti ñaxan, añon ti' yujtibal.

¹⁸ Joñoñʌch jiñi cuxul bʌ, tsa' chʌmiyon, awilan, cha' cuxulon ti pejtelel ora, [amén.] Añ tic p'ʌtʌlel jiñi chʌmeño' bʌ yic'ot i yajñib chʌmeño' bʌ.

¹⁹ Ts'ijban chuqui tsa' q'uele, yic'ot chuqui añ wʌle yic'ot chuqui mi caj i yujtel.

²⁰ Mi caj c su'beñet isujmlel jiñi wucp'ejl ec' tsa' bʌ a q'uele ti ñoj bʌ j c'ʌb, yic'ot jiñi wucts'ijt lámpara melbil bʌ ti oro: Jiñi wucp'ejl ec' jiñʌch ángelob mu' bʌ i yajñel yic'ot jiñi wucmojt xñopt'añob; Jiñi wucts'ijt lámpara tsa' bʌ a q'uele, jiñʌch wucmojt xñopt'añob mu' bʌ i tempañob i bʌ.