2 Timoteo 1 - Jiñi Tsiji' bʌ Wen T'añ cha'añ Estudio

I yutslel i t'añ

¹ Pablojon, apóstolon i cha'añ Jesucristo che' bajche' yom Dios, che' bajche' wʌn albʌl i cha'añ Dios cha'añ mi caj i yʌq'ueñonla laj cuxtʌlel ti Cristo Jesús.

² Mic ts'ijbubeñet ili juñ, Timoteo, c'uxbibil bʌ calobil. La' i yʌq'ueñet i yutslel i pusic'al yic'ot a p'untʌntel yic'ot i ñʌch'tʌlel a pusic'al ch'oyol bʌ ti Dios lac Tat yic'ot Jesucristo lac Yum.

I yʌc'ol ti cʌñol Cristo

³ Mic su'ben Dios wocolix i yʌlʌ, come wolic melben i ye'tel ti' sʌclel c pusic'al che' bajche' c ñojte'elob, mic chʌn ña'tañet che' mic pejcan Dios, ti q'uiñil ti ac'ʌlel.

⁴ Che' mic ña'tʌbeñet a wuq'uel, comix j q'uelet cha'añ mi' cha' ñuc añ c pusic'al.

⁵ Wolic ña'tan bajche' tsa' ñopo Dios ti isujm che' bajche' ti ñaxan tsi' ñopo a chuchu' Loida yic'ot a ña' Eunice. Wʌle cujil wola' ñop ja'el.

⁶ Jiñi cha'añ mij c'ajtesʌbeñet cha'añ ma' chʌn p'ʌt-esan a c'ʌjñibal ti Dios tsa' bʌ aq'uentiyet che' bʌ tsa' cʌc'ʌ j c'ʌb ti a jol.

⁷ Yom ch'ejlonla, come i yespíritu Dios ma'añic mi yʌc'onla ti bʌq'uen, pero tsi' yʌq'ueyonla lac p'ʌtʌlel yic'ot laj c'uxbiya, tsi' yʌq'ueyonla i bajñel p'ʌtʌlel lac pusic'al.

⁸ Jiñi cha'añ mach a cha'len quisin che' ma' wʌc' ti cʌjñel lac Yum, mach yomic ma' wu'bin quisin cha'añ xñujp'elon i cha'añ lac Yum, ti' p'ʌtʌlel Dios, ñusan wocol quic'ot cha'añ jiñi wen t'añ.

⁹ Dios tsi' coltayonla; tsi' pʌyʌyonla cha'añ ch'ujul mi la cajñel ti' tojlel; mach cha'añic wen bʌ lac melbal, pero cha'añ che' yom i pusic'al tsi' pʌyʌyonla ti' yonlel i yutslel tsa' bʌ i yʌq'ueyonla ti oñiyi yic'ot Cristo Jesús,

¹⁰ pero wʌle tsiquilix i yutslel cha'añ tsa' tili Cristo Jesús, la caj Coltaya tsa' bʌ i jisʌbe i p'ʌtʌlel lac mul mu' bʌ i yʌc'onla ti chʌmel. Tsi' ch'ʌmbeyonla laj cuxtʌlel mach bʌ yujilic chʌmel, che' bajche' mi' tsictesʌbeñonla ti jiñi wen t'añ.

¹¹ Wa'chocobilon cha'añ mic su'beñob [gentilob] jiñi wen t'añ. Chocbilon majlel ti subt'añ yic'ot ti cʌntesa ti' tojlelob.

¹² Jiñi cha'añ woli cu'bin wocol, pero ma'añic woliyon ti quisin. Come cʌñʌl c cha'añ Dios tsa' bʌ c ñopo. Cujil añ i p'ʌtʌlel cha'añ mi' cʌntan jiñi tsa' bʌ i yʌc'ʌ tic wenta c'ʌlʌl ti jiñi wi'il bʌ q'uiñ.

¹³ Ti' xuc'tʌlel a pusic'al yic'ot ti a c'uxbiya ti Cristo Jesús, chʌn lajin a cʌntesa yic'ot toj bʌ c t'añ tsa' bʌ a wu'bi.

¹⁴ Cʌntan jiñi uts'at tac bʌ tsa' bʌ i yʌc'ʌ ti a wenta jiñi Ch'ujul bʌ Espíritu chumul bʌ ti lac pusic'al.

¹⁵ Come a wujilix, cha'añ tsa'ix i cʌyʌyoñob Figelo yic'ot Hermógenes yic'ot pejtelel año' bʌ ti Asia.

¹⁶ La' p'untʌnticob ti lac Yum jiñi año' bʌ ti' yotot Onesíforo, come ca'bʌl tsi' ñuq'uesʌbeyon c pusic'al, ma'añic tsi' quisñiyon anquese cʌchʌlon ti cadena.

¹⁷ Pero che' bʌ tsa' juli ti Roma tsi' wersa sʌclayon, jinto tsi' tajayon.

¹⁸ La' i taj i p'untʌntel ti Dios ti' tojlel lac Yum ti jiñi tal to bʌ q'uiñ. Wen cʌñʌl a cha'añ bajche' tsi' coltayonla Onesíforo ya' ti Éfeso. Eunice yic'ot Loida: I ña' yic'ot i chuchu' Timoteo (2 Tm 1.5; Hch 16.1) Febe: Diaconisa ti' tojlel xñopt'añob ti Cencrea (Rm 16.1-2) Jezabel: Jiñʌch ñuc bʌ xlot ti' tojlel xñopt'añob ti Tiatira (Ap 2.20-23) Lidia: Xchoñoñel ti Filipos (Hch 16.11-15) Priscila: Jiñʌch i yijñam Aquila yic'ot i pi'ʌl ti e'tel Pablo (Hch 18.1-4, 18-19, 24-26; Rm 16.3-5; 1 Cor 16.19; 2 Tm 4.19) Tabita/Dorcas: Tsa' bʌ i teche ch'ojyel (Hch 9.36-42) Safira: Jiñʌch i yijñam Ananías, tsa' bʌ i lotiyob jiñi Ch'ujul bʌ Espíritu (Hch 5.1-11)