2 Pedro 3 - Jiñi Tsiji' bʌ Wen T'añ cha'añ Estudio

I q'uiñilel lac Yum mu' bʌ i tilel

¹ C'uxbibilet bʌ la, jiñʌch i cha'q'uejlel bʌ cuñ tsa' bʌ c melbeyetla, i cha'yajlel woli xic'beñetla cha'añ mi la' chʌn ña'tan chuqui sʌc.

² Yom c'ajal la' cha'añ i t'añ jiñi ch'ujul bʌ x'alt'añob ti oñiyi yic'ot i mandar lac Yum la caj Coltaya che' bajche' tsi' su'beyetla jiñi apóstolob;

³ Yom mi la' ña'tan cha'añ talob xwajleyajob ti wi'il bʌ q'uiñ tac, mi caj i cha'leñob xʌmbal ñumel ti pañimil ti' colosojlel i pusic'al,

⁴ mi caj i yʌlob: ¿Bacan tsiquil woli' cha' tilel che' bajche' tsi' yʌlʌ? C'ʌlʌl che' bʌ tsa' chʌmiyob lac ñojte'el c'ʌlʌl wʌle, lajal jach woli' yajñel pejtelel chuqui tac añ che' bajche' ti' cajibal pañimil.

⁵ Mach yomic i p'isob ti' wenta bajche' tsa' ajñi panchan ti wajali, cha'añ ti' t'añ jach Dios tsi' mele pañimil, jiñi lum tsa' loq'ui ti ja', jiñi cha'añ joyolʌch ti ja'.

⁶ Ti but'ja' tsa' jejmi jiñi pañimil am bʌ ti oñiyi.

⁷ Ti jiñi jach bʌ i t'añ Dios woli' cʌntʌntel jiñi panchan yic'ot pañimil am bʌ wʌle, mi' caj i pulel ti c'ajc che' ti' q'uiñilel melo' mulil, ya'i mi' caj i tojob i mul wiñicob x'ixicob mu' bʌ i ñusañob Dios.

⁸ C'uxbibilet bʌ la, ña'tanla junlajal mi' q'uel jump'ejl q'uiñ lac Yum bajche' ojlil i yuxbajc' (1,000) ja'b. Che' ja'el, junlajal mi' q'uel ojlil i yuxbajc' ja'b bajche' jump'ejl q'uiñ.

⁹ Lac Yum ma'añic mi' jalitesan i mel chuqui albil i cha'añ che' bajche' mi' lon alob cha'tiquil uxtiquil, woli' pijtañonla come mach yomic mi' sajtel mi juntiquilic, pero yom mi laj cʌy lac mul ti lac pejtelel.

¹⁰ I q'uiñilel lac Yum mi caj i tilel che' bajche' xujch' [ti ac'ʌlel] ti c'am bʌ i t'añ mi' caj ti jilel panchan, mi' caj ti ulmʌl ti c'ajc pejtelel chuqui tac añ, mi' caj ti laj pulel pañimil yic'ot pejtelel melbil tac bʌ ti pañimil.

¹¹ Mi che'ʌch mi' caj ti ulmʌl ti pejtelel, ¿bajche' yom mi la' wajñel che' jiñi? Yom ch'ujuletla, yom toj bʌ la' melbal,

¹² yom ch'ejl la' pusic'al mi la' pijtan i q'uiñilel Dios, yom bʌxetla ti' ye'tel Dios ba' ora mi' tilel jiñi q'uiñ, come ti jiñi q'uiñ jiñi panchan yic'ot pejtelel chuqui tac añ mi caj i laj ulmʌl ti c'ajc;

¹³ pero joñonla woli lac pijtan tsiji' bʌ panchan yic'ot tsiji' bʌ pañimil ba' mi' mejlel chuqui toj che' bajche' albil i cha'añ Dios.

¹⁴ Jiñi cha'añ c'uxbibilet bʌ la, che' woli la' pijtan jiñi q'uiñ, yom mi la' cha'len wersa cha'añ mi la' wajñel ti ch'ujul cha'añ sʌquetla, yic'ot ñʌch'ʌl la' pusic'al che' mi' tajetla Jesús.

¹⁵ Ña'tanla woli ti pijt lac Yum, jinto mi' coltʌntel wiñicob x'ixicob; che'ʌch tsi' ts'ijbubeyetla ja'el jiñi c'uxbibil bʌ la quermañu Pablo che' bajche' Dios tsi' cʌntesa.

¹⁶ Che'ʌch tsi' ts'ijba Pablo ti pejtelel i juñ, añ wocol tac bʌ mach bʌ wen tsiquilic isujmlel mach bʌ orajic mi lac ch'ʌmben isujm, jiñi mach bʌ añobic i ña'tʌbal yic'ot jiñi mach bʌ xuc'ulobic mi' socbeñob isujmlel che' bajche' mi' socbeñob isujmlel yam bʌ i Ts'ijbujel Dios. Woli' bajñel chocob i bʌ ti tojmulil.

¹⁷ Jiñi cha'añ c'uxbibilet bʌ la, tsa'ix la' wu'bi tal tojmulil, tsajiletla ame lotintiquetla ame la' ñopben i sojquemal jiñi xjontolilob, ame muq'uic la' cʌy la' ñop chuqui isujm.

¹⁸ Yom mi la' taj la' colel ti Cristo, jiñʌch che' mi la' cʌmben i yutslel i pusic'al yic'ot i ña'tʌbal lac Yum Jesucristo la caj Coltaya. La' su'bentic i ñuclel wʌle yic'ot ti pejtelel ora. Amén.