2 Corintios 3 - Jiñi Tsiji' bʌ Wen T'añ cha'añ Estudio

X'e'telon cha'añ jiñi tsiji' xuc'ul bʌ t'añ

¹ ¿Woli ba c cha' wʌlʌc su'b lojon c bʌ ti uts'at? ¿Yom ba mic mel lojon che' bajche' mi' melob yaño' bʌ mu' bʌ i pʌsob majlel juñ ba' mi' yʌc'ob i bʌ ti cʌjñel? ¿Yom ba mij c'ajtibeñetla juñ mu' bʌ i yʌc'on lojon ti cʌjñel?

² I wentajetla juñ mu' bʌ i yʌc'on ti cʌjñel, ts'ijbubiletla tic pusic'al lojon, cʌmbiletla yic'ot mi la' q'uejlel ti' tojlel pejtelel wiñicob x'ixicob che' bajche' juñ.

³ Come tsiquil i juñetla Cristo tsa' bʌ c ts'ijba lojon, mach ti tintajic ts'ijbubiletla, pero yic'ot i yEspíritu jiñi cuxul bʌ Dios, mach ti xajlelic pero ti la' pusic'al.

⁴ Xuc'ulon lojon ti Dios cha'añ ti' p'ʌtʌlel Cristo.

⁵ Ma'añic c bajñel p'ʌtʌlel lojon cha'añ mic ña'tan lojon bajche' yom. Pero ch'oyolʌch ti Dios c p'ʌtʌlel lojon.

⁶ Dios tsi' yʌq'ueyon lojon c p'ʌtʌlel ti' ye'tel ti jiñi tsiji' xuc'ul bʌ t'añ, ma'añic mic su'b lojon jiñi ts'ijbubil bʌ mandar mach bʌ mejlic i coltañ wiñicob x'ixicob, mic su'b lojon laj cuxtʌlel mu' bʌ i yʌq'ueñonla jiñi Ch'ujul bʌ Espíritu. Come jiñi ts'ijbubil bʌ mandar mi' tsʌnsañonla yilal, pero jiñi Espíritu mi' yʌq'ueñonla laj cuxtʌlel.

⁷ Wen ñuc jiñi mandar mu' bʌ i yʌc'onla ti chʌmel, ts'ijbubil bʌ ti xajlel, che' bʌ tsa' aq'uentiyob israelob, ma'añic tsa' mejli i q'uelbeñob i wut Moisés cha'añ tsa' wen tsictiyi i sʌclel Dios ti' wut, anquese ora jach tsa' caji ti yajpel.

⁸ ¿Mach ba ñumen ñuquic i ye'tel jiñi Espíritu?

⁹ Mi ñuc jiñi mandar mu' bʌ i yʌc'onla ti tojmulil, ñumen ñuc jiñi t'añ mu' bʌ i yʌc'onla ti q'uejlel ti toj.

¹⁰ Jiñi cha'añ jiñi ñuc bʌ ti yam bʌ ora mach chʌn ñuquix wʌle che' bajche' jiñi c'ax ñuc bʌ.

¹¹ Mi añ i ñuclel jiñi tsa' bʌ jili, ñumen ca'bʌl i ñuclel jiñi mu' bʌ i coltañonla, come mach yujilic jilel.

¹² Jiñi cha'añ, come che'ʌch añ jiñi c pijtaya lojon, ch'ejl mic cha'len lojon t'añ,

¹³ mach che'ic bajche' Moisés, come tsi' moso i wut ti pisil ti' tojlel jiñi israelob ame q'uelbentic i wut che' bʌ wolix ti yajpel i sʌclel.

¹⁴ Pero tsa' tsʌts-ayob i pusic'al jiñi israelob, come c'ʌlʌl wʌle añ to pisil yilal ti' wutob che' mi' q'uelob jiñi oñiyi bʌ xuc'ul bʌ t'añ, come ma'añic mi' ch'ʌmbeñob isujm, pero mi' loc'sʌbentelob che' mi' ñopob Cristo.

¹⁵ C'ʌlʌl wʌle che' mi' q'uejlel i ts'ijbujel Moisés, mosbilob i pusic'al ti pisil yilal.

¹⁶ Pero che' mi' sutq'uiñob i bʌ cha'añ mi' ñopob lac Yum, mi caj i loc'sʌbentelob jiñi pisil mu' bʌ i mʌcbeñob i wut.

¹⁷ Come lac Yum jiñʌch jiñi Espíritu. Jiñi am bʌ i cha'añ i yEspíritu lac Yum librejix añ, mach chʌn cʌchʌlix ti mandar.

¹⁸ Che' jiñi quermañujob, mach chʌn mosolix lac wut yilal. Che' mi laj q'uelben i ñuclel lac Yum che' bajche' ti espejo, mi lac utsi tsictesan i ñuclel, mi laj q'uextʌyel majlel ti' yejtal Cristo che' mi' mel i ye'tel i yEspíritu lac Yum ti lac pusic'al.