2 Corintios 1 - Jiñi Tsiji' bʌ Wen T'añ cha'añ Estudio

I TEJCHIBAL ( 1.1-11 ) I yutslel i t'añ Pablo

¹ Pablojon, apóstolon i cha'añ Cristo Jesús cha'añ che' yom Dios, wʌ'an la quermañu Timoteo quic'ot, wolic ts'ijbubeñetla xñopt'añet bʌ la i cha'añ Dios ya' ti Corinto yic'ot ti pejtelel Acaya.

² La' aq'uentiquetla i yutslel i pusic'al Dios yic'ot i ñʌch'tʌlel la' pusic'al ch'oyol bʌ ti Dios lac Tat yic'ot ti lac Yum Jesucristo.

I wocol Pablo

³ La' sujbic i ñuclel Dios i Tat lac Yum Jesucristo, jiñʌch lac Tat ja'el mu' bʌ i p'untañonla, mu' bʌ i ñuq'uesan lac pusic'al ti pejtelel wocol.

⁴ Dios mi' ñuq'uesan lac pusic'al ti pejtelel lac wocol cha'añ mi lac ñuq'uesʌbeñob i pusic'al yaño' bʌ ti pejtelel i wocol, che' jiñi, mi lac ñuq'uesʌbeñob i pusic'al che' bajche' Dios tsi' ñuq'uesʌbeyonla lac pusic'al.

⁵ Come che' bajche' lac tem cha'añ jach i wocol Cristo, che' ja'el lac tem cha'añ jach i ñuq'uesʌntel lac pusic'al yic'ot Cristo.

⁶ Che' mi cu'bin lojon wocol, añ i c'ʌjñibal cha'añ mic ñuq'uesʌbeñetla la' pusic'al cha'añ mi la' coltʌntel; che' mi' ñuq'uesʌbeñon lojon c pusic'al Dios, mi mejlel c ñuq'uesʌbeñetla la' pusic'al; che'ʌch mi' yujtel cha'añ mi la' cuch wocol lajal bajche' joñon lojon.

⁷ Cujil lojon ti' xuc'tʌlel c pusic'al añ chuqui mi caj la' taj, come woli la' ñusan wocol che' bajche' joñon lojon, jiñi cha'añ woli la' taj i ñuq'uesʌntel la' pusic'al ja'el che' bajche' joñon lojon.

⁸ Quermañujob, com mi la' ña'tan tsa' cu'bi lojon ca'bʌl wocol ya' ti Asia, mach cujchic c cha'añ lojon yu'bil come wen wocol jax, tsa' jili lojon c pijtaya, tsa' c ña'ta lojon cha'añ muq'uix c chʌmel lojon.

⁹ Isujm tsa' ajq'uiyon lojon ba' colelix c chʌmel lojon yu'bil cha'añ ma'añic mic xuc'chocon lojon c pusic'al tic bajñel p'ʌtʌlel lojon, cojach ti Dios mu' bʌ i tech ch'ojyel jiñi chʌmeño' bʌ.

¹⁰ Dios tsi' yʌc'ʌyon lojon ti colel che' bʌ tsa' cʌlʌ lojon chʌmel, woli' chʌn ac'on lojon ti colel, cujil lojon tic pusic'al, Dios mi caj i chʌn ac'on lojon ti colel.

¹¹ Jatetla ja'el mi la' coltañon lojon che' mi la' pejcʌbeñon lojon Dios. Che' jiñi ca'bʌlob mi caj i su'beñob Dios wocolix i yʌlʌ cha'añ c wenlel lojon mu' bʌ c taj lojon cha'añ la' woración.

1. PABLO TSI' Q'UELE TI ÑUC I YE'TEL ( 1.12—7.16 ) Ma'añic tsa' mejli ti majlel Pablo ti Corinto

¹² Ñʌch'ʌl lojon c pusic'al come ti' p'ʌtʌlel Dios tsa' c mele lojon chuqui isujm yic'ot chuqui toj, Jiñʌch c ñuclel lojon, tsa' ajñiyon lojon ti jump'ejl lojon c pusic'al aq'uebilon bʌ lojon ti Dios, che'ʌch tsa' c pʌsʌ lojon c bʌ wʌ' ti pañimil, ñumen tsa' c mele lojon chuqui uts'at ti la' tojlel, mach che'ic bajche' mi' ña'tañob ti pañimil, pero yic'ot i yutslel i pusic'al Dios.

¹³ Come ma'añic wolic ts'ijbubeñetla chuqui mach mejlic la' pejcan yic'ot mach bʌ añic mi mejlel la' ch'ʌmben isujm, com mi la' ch'ʌmben isujm ti' pejtelel.

¹⁴ Come lamitaletla tsa'ix la' ch'ʌmbe isujm, la' ñuclelon lojon che' bajche' jatetla ja'el c ñuclelet lojon ba' ora mi' cha' tilel lac Yum Jesús.

¹⁵ Cujil xuc'ul la' pusic'al quic'ot, jiñi cha'añ tsa' c ña'ta tilel ñaxan ba'añetla cha'añ mi la' taj ti' cha'yajlel la' tijicñʌyel.

¹⁶ Com ñumel ba'añetla che' mic majlel ti Macedonia, che' loq'uemon ti Macedonia com cha' ñumel ba'añetla cha'añ mi la' coltañon sujtel ti Judea.

¹⁷ Che' bʌ tsa' c ña'ta majlel ba'añetla, ¿To'ol t'añ jach ba tsa' c cha'le? ¿Mu' ba c bajñel ña'tan chuqui com c mel? ¿Mu' ba c su'beñetla ya' talon che' mach taloñic?

¹⁸ Che' bajche' xuc'ul i pusic'al Dios ma'añic mic su'beñetla ti cha'chajp, ma'añic mic su'beñetla ya' talon che' mach taloñic.

¹⁹ Come mach cha'chajpic i t'añ Jesucristo i Yalobil Dios tsa' bʌ c su'beyetla joñon quic'ot Silvano yic'ot Timoteo, junsujm jach i t'añ Jesucristo.

²⁰ Pejtelel chuqui mi' su'beñonla Dios mi caj i ts'ʌctiyel ti Cristo, jiñi cha'añ ti Cristo mi lac su'b “Amén” cha'añ mi lac tsictesʌben i ñuclel Dios.

²¹ Diosʌch mu' bʌ i tem xuc'chocoñonla ti Cristo, Diosʌch tsa' bʌ i yajcayonla cha'añ i ye'tel,

²² jiñʌch tsa' bʌ yotsʌbeyonla lac sellojlel ba' mi' tsictiyel cha'añ i cha'añoñʌchla yic'ot tsi' yʌq'ueyonla jiñi Espíritu ti lac pusic'al.

²³ La' i q'uel c pusic'al Dios come isujm maxto añic tsa' tiliyon ti Corinto ba'añetla come mach comic c tsʌts pejcañetla.

²⁴ Mach la' yumoñic lojon cha'añ mic wersa su'beñetla chuqui yom mi la' ñop, woli j coltañetla cha'añ mi la' taj i tijicñʌyel la' pusic'al, come xuc'uletla cha'añ tsa' la' ñopo Cristo.