1 Pedro 5 - Jiñi Tsiji' bʌ Wen T'añ cha'añ Estudio

4. CɅNTESA TI CHAJP TI' CHAJP ( 5.1-11 ) Jiñi ancianojob

¹ Ti wocol t'añ mic su'beñob ancianojob ti la' tojlel, come ancianojon ja'el, che' ja'el testigojon cha'añ tsi' cuchu wocol Cristo, joñon ja'el mi caj cʌq'uentel c ñuclel yic'ot Cristo che' mi' tsictiyel:

² Cʌntanla i tʌñʌme' Dios año' bʌ ti la' wenta, mach cha'añic xic'bebiletla, pero ti pejtelel la' pusic'al che' bajche' yom Dios; mach cha'añic ganar, pero cha'añ che' yom la' pusic'al,

³ mach yomic mi la' chañ-esan la' bʌ ti' tojlel jiñi tʌñʌme' año' bʌ ti la' wenta, pero yom mi la' pʌsbeñob ti la' melbal bajche' yom mi' melob.

⁴ Che' mi' tsictiyel jiñi ñuc bʌ Xcʌnta tʌñʌme', mi caj la' wʌq'uentel corona i yejtal bʌ la' ñuclel mach bʌ añic mi' jilel.

Jiñi ch'itoñ wiñicob

⁵ Che' ja'el, ch'itoñ wiñicob, ac'ʌ la' bʌ ti' wenta ancianojob; ti la' pejtelel chʌn mele la' bʌ ti pec' ti' tojlel la' pi'ʌlob, come “Dios mi' contrajin jiñi mu' bʌ i chañ-esañob i bʌ. Mi' yʌq'ueñ i yutslel i pusic'al jiñi mu' bʌ i peq'uesañob i bʌ.”

⁶ Ac'ʌ la' bʌ ti pec' ti p'ʌtʌl bʌ i c'ʌb Dios, cha'añ mi' yʌq'ueñetla la' ñuclel che' ti' yorajlel.

⁷ Ac'ʌla ti' wenta Dios pejtelel la' c'oj-ol, come jiñʌch woli' cʌntañetla.

⁸ Ña'tanla pañimil, chʌcʌ q'uele la' bʌ, come jiñi xi'ba, jiñi la' contra, woli ti pam ñumel che' bajche' colem bajlum woli bʌ ti jujuj t'añ, woli' chijtan i colojm cha'añ mi' c'ux.

⁹ Cha'lenla wersa ti' contra xi'ba, xuc'ul yom la' pusic'al ti Dios, ña'tanla cha'añ lajal woli' yu'biñob wocol la' wermañujob ti pejtelel pañimil.

¹⁰ Pero jiñi Dios am bʌ ca'bʌl i yutslel i pusic'al, tsi' pʌyʌyetla cha'añ temel mi la' wajñel yic'ot Cristo ti' ñuclel i yumʌntel mach bʌ añic mi' jilel, jiñi cha'añ che' bʌ tsa'ix la' jumuc' ñusa wocol, mi caj i ñuq'uesan la' pusic'al ya' ti' tojlel, mi caj i xuc'chocoñetla, mi caj i p'ʌt-esañetla.

¹¹ La' tsictiyic i ñuclel yic'ot i p'ʌtʌlel ti pejtelel ora. Amén.

I YUJTIBAL I YUTSLEL I T'AÑ ( 5.12-14 )

¹² Ti' c'ʌb la quermañu Silvano jiñi xuc'ul bʌ mij q'uel, tsa' c ts'ijbubeyetla ili ch'och'oc bʌ juñ, cha'añ mic xic'beñetla, yic'ot ja'el cha'añ mi cʌc' ti cʌjñel jiñi isujm bʌ i yutslel i pusic'al Dios ba' cʌyʌletla.

¹³ Jiñi xñopt'añob mu' bʌ i tempañob i bʌ ya' ti Babilonia, tem yajcʌbilo' bʌ la' wic'ot, jiñi calobil Marcos mi' yʌq'ueñetla saludo ja'el.

¹⁴ Aq'uen la' bʌ cortesía, ts'ujts'un la' bʌ yic'ot c'uxbiya. La' aq'uentiquetla i ñʌch'tʌlel la' pusic'al pejtel añet bʌ la ti Cristo. Amén.