1 Juan 5 - Jiñi Tsiji' bʌ Wen T'añ cha'añ Estudio

I xuc'tʌlel lac pusic'al mu' bʌ i mʌlben jiñi pañimil

¹ Pejtelel jiñi mu' bʌ i ñop Cristojʌch jiñi Jesús, tsa'ix i yila pañimil ti Dios, majqui jach mi' c'uxbin lac Tat tsa' bʌ i yʌq'ueyonla lac cha' ilan pañimil mi' c'uxbin ja'el i yalobilob.

² La cujil woli laj c'uxbin i yalobilob che' mi laj c'uxbin Dios, che' mi lac jac'ben i mandar ja'el.

³ Come i c'uxbintel Dios jiñʌch i jac'ol i mandar, mach wocolic i mandar.

⁴ Come jiñi tsa' bʌ i yila pañimil ti Dios, mi' t'uchtan i cha'añ bʌ pañimil. Jiñʌch i t'uchtʌntel pañimil che' mi lac ñop Dios.

⁵ ¿Majqui jiñi mu' bʌ i t'uchtan jiñi pañimil? Jiñʌch woli bʌ i ñop i Yalobilʌch Dios jiñi Jesús.

I melbal jiñi Espíritu

⁶ Jiñʌch Jesucristo tsa' bʌ tili, Dios tsi' tsictesa che' bʌ tsi' ch'ʌmʌ ja' yic'ot che' bʌ tsi' yʌc'ʌ i ch'ich'el. Mach ti ja'ic jach tsi' tsictesa, pero yic'ot ja' yic'ot i ch'ich'el. Jiñi Espíritu jiñʌch mu' bʌ i yʌc' ti cʌjñel, come jiñi Espíritu isujmlelʌch.

⁷ Añ uxtiquilob año' bʌ ti panchan mu' bʌ i su'beñob isujmlel: lac Tat, Yalobil yic'ot jiñi Ch'ujul bʌ i Ch'ujlel, ili uxtiquilob juntiquilob jach.

⁸ Uxtiquilob jiñi mu' bʌ i yʌc'ob ti cʌjñel isujmlel ila ti pañimil: jiñi Espíritu yic'ot jiñi ja' yic'ot i ch'ich'el Jesús, junsujm jach chuqui mi' yʌc' ti tsictiyel ili uxchajp.

⁹ Mi lac ñop chuqui mi' yʌlob wiñicob, ñumen yom mi lac ñop chuqui tsi' yʌlʌ Dios, come tsi' yʌlʌ cha'añ mi' yʌc' ti cʌjñel i Yalobil.

¹⁰ Majqui jach mi' ñop i Yalobil Dios yujil ti' pusic'al isujmʌch ili t'añ; jiñi mach bʌ añic mi' ñop Dios tsa'ix i cuyu ti xlot, come ma'añic tsi' ñopo jiñi t'añ tsa' bʌ i yʌlʌ Dios cha'añ mi laj cʌmben i Yalobil.

¹¹ Jiñi t'añ tsa' bʌ i yʌlʌ Dios jiñʌch iliyi: Dios tsi' yʌq'ueyonla laj cuxtʌlel mach bʌ añic mi' jilel, ili laj cuxtʌlel añ ti' Yalobil Dios.

¹² Jiñi ochem bʌ ti' Yalobil Dios, añ i cuxtʌlel, jiñi mach bʌ añic i cha'añ i Yalobil Dios, ma'añic i cuxtʌlel.

I YUJTIBAL: I CɅÑOL LAJ CUXTɅLEL MACH BɅ AÑIC MI' JILEL ( 5.13-21 )

¹³ Jiñi cha'añ tsa' c ts'ijbubeyetla ili t'añ, jatetla tsa' bʌ la' ñopbe i c'aba' i Yalobil Dios, cha'añ mi la' ña'tan añix la' cuxtʌlel mach bʌ añic mi' jilel.

¹⁴ Ch'ejl lac pusic'al ti' tojlel Dios, come la cujil mi' yu'bibeñonla chuqui jach mi laj c'ajtiben che' bajche' yom i pusic'al.

¹⁵ Che' mi lac ña'tan woli' yu'bibeñonla chuqui jach mi laj c'ajtiben, la cujil tsa'ix lac taja chuqui tsa' laj c'ajtibe.

¹⁶ Mi añ majch mi' q'uel i yermañu che' woli i taj i mul mach bʌ añic mi' yʌc' ti chʌmel, la i c'ajtiben Dios cha'añ mi' ñusʌbentel i mul i yermañu, Dios mi caj i yʌq'ueñ i cuxtʌlel jiñi am bʌ i mul mach bʌ añic mi' yʌc' ti chʌmel. Añ mulil mu' bʌ i yʌc'onla ti chʌmel, ma'añic wolic su'beñetla mi yom mi la' cha'len oración cha'añ mi' ñusʌbentel.

¹⁷ Pejtelel lac melbal mach bʌ tojic, jiñʌch mulil, añ mulil mach bʌ añic mi' yʌc'onla ti chʌmel.

¹⁸ La cujil ma'añic mi' chʌn cha'len mulil jiñi tsa'ix bʌ i yila pañimil ti Dios. Jiñi xi'ba mach mejlix i chʌn tic'lan, come i Yalobil Dios mi' cʌntan.

¹⁹ La cujil i cha'añonla Dios, pejtelel i cha'año' bʌ pañimil añob ti' c'ʌb jiñi xi'ba.

²⁰ La cujil tsa'ix tili i Yalobil Dios, tsa'ix i yʌq'ueyonla lac ña'tʌbal cha'añ mi laj cʌn jiñi mero isujm bʌ. Añonla ti jiñi mero isujm bʌ jiñʌch Jesucristo, i Yalobil Dios. Jiñʌch mero Dios yic'ot laj cuxtʌlel mach bʌ añic mi' jilel.

²¹ Alobob, cʌntan la' bʌ. Mach mi la' ch'ujutesan yam bʌ dios tac. [Amén.]