1 Juan 2 - Jiñi Tsiji' bʌ Wen T'añ cha'añ Estudio

Cristo, jiñi la caj pejcaya

¹ C'uxbibil bʌ calobilob, wolic ts'ijbubeñetla ili juñ cha'añ mach mi la' cha'len mulil. Mi añ majqui tsi' cha'le mulil, añ la caj pejcaya ti' tojlel lac Tat, jiñʌch Jesucristo, jiñi Toj Bʌ.

² Jiñʌch tsa' bʌ i yu'bi i mich'ajel Dios ti' caj lac mul, mach jiñic jach lac mul pero i mul ja'el pejtelel año' bʌ ti pañimil.

³ Mi woli lac jac'ben i mandar Dios, che' jiñi cʌñʌlix lac cha'añ Jesús.

⁴ Jiñi mu' bʌ i yʌl: J cʌñʌyʌch Jesús, pero mi ma'añic mi' jac' i mandar Dios, woli ti lot jiñi wiñic, ma'añic isujmlel ti' pusic'al.

⁵ Jiñi mu' bʌ i jac'ben i t'añ Jesús, woli' wen c'uxbin Dios; che' jiñi la cujil añonla ti Jesús.

⁶ Jiñi mu' bʌ i yʌl woli' yajñel ti Jesús la' ajñic che' bajche' tsa' ajñi Jesús.

Jiñi tsiji' bʌ mandar

⁷ Hermañujob, mach tsijibic ili mandar woli bʌ c ts'ijbubeñetla, pero jiñʌch oñiyix bʌ mandar tsa' bʌ su'bentiyetla ti' cajibal. Jiñi oñiyix bʌ mandar jiñʌch jiñi t'añ tsa'ix bʌ la' wu'bi c'ʌlʌl ti' cajibal.

⁸ Anquese oñiyix pero tsijibʌch jiñi mandar woli bʌ c ts'ijbubeñetla, tsiquil isujmlel ti Jesús yic'ot ti jatetla, come wolix ti ñumel ic'yoch'an bʌ pañimil, wolix ti wen tsictiyel i sʌclel pañimil, jiñi isujm bʌ.

⁹ Jiñi mu' bʌ i lon al woli' yajñel ti' sʌclel pañimil che' woli' ts'a'len i yermañu, añ to ti ic'yoch'an bʌ pañimil.

¹⁰ Jiñi mu' bʌ i c'uxbin i yermañu, añix ti' sʌclel pañimil, ma'añic mi' yʌsan ti mulil i yermañu.

¹¹ Pero jiñi mu' bʌ i ts'a'len i yermañu añ ti ic'yoch'an bʌ pañimil, mi' cha'len xʌmbal ti ic'yoch'an bʌ pañimil, yic'ot mach yujilic baqui mi' majlel, come ma'añic mi' c'otel i wut cha'añ i yi'ic'lel pañimil.

¹² Wolic ts'ijbubeñetla calobilob, come ñusʌbilix la' mul cha'añ ti c'aba' Jesús.

¹³ Wolic ts'ijbubeñetla tatʌlet bʌ la, come cʌmbilix la' cha'añ jiñi am bʌ ti' cajibal pañimil. Wolic ts'ijbubeñetla ch'itoñob, xch'octacob come t'uchtʌbilix la' cha'añ jiñi xjontolil. Wolic ts'ijbubeñetla calobilob, come cʌmbilix la' cha'añ lac Tat.

¹⁴ Tsa'ix c ts'ijbubeyetla tatʌlob, come cʌmbil la' cha'añ jiñi am bʌ ti' cajibal pañimil. Tsa'ix c ts'ijbubeyetla ch'itoñob, xch'octacob, come p'ʌtʌletla. I t'añ Dios woli' yajñel ti la' pusic'al, come t'uchtʌbilix la' cha'añ jiñi xjontolil.

¹⁵ Mach la' c'uxbin i cha'añ bʌ pañimil mi chuqui añ ti pañimil. Come jiñi mu' bʌ i c'uxbin i cha'añ bʌ pañimil, ma'añic mi' c'uxbin lac Tat.

¹⁶ Come pejtelel chuqui añ ti pañimil, i colosojlel lac pusic'al yic'ot i ts'i'lel lac wut, yic'ot i chañ-esʌntel lac bʌ, mach ch'oyolic ti lac Tat pero ch'oyol ti pañimil.

¹⁷ I cha'año' bʌ pañimil mi caj i jilelob yic'ot i colosojlel i pusic'al, pero jiñi mu' bʌ i mel che' bajche' yom Dios mi yajñel ti pejtelel ora.

Jiñi xcontra Cristo

¹⁸ Calobilob, jiñʌch cojix bʌ q'uiñ tac. Tsa' la' wu'bi tal jiñi xcontra Cristo, wʌle añobix ca'bʌl mu' bʌ i contrajiñob Cristo, jiñi cha'añ la cujil añoñixla ti cojix bʌ q'uiñ tac.

¹⁹ Tsa' loq'uiyob majlel ti lac tojlel come mach lac cha'añobic, come lac cha'añobic wʌ' to añob la quic'ot c'ʌlʌl wʌle; pero tsa' loq'uiyob cha'añ mi' tsictiyel mach ti' pejtelelobic lac cha'añob.

²⁰ Pero jatetla aq'uebiletixla jiñi Ch'ujul bʌ Espíritu, jiñi cha'añ mi la' cʌmben isujmlel ti la' pejtelel.

²¹ Tsa' c ts'ijbubeyetla, mach cha'añic mach la' cʌñʌyic isujmlel, pero cʌntesʌbiletixla, la' wujil chuqui isujm yic'ot chuqui mach isujmic, mach tilemic lot ti jiñi isujm bʌ.

²² ¿Majqui xlot? ¿Mach ba jiñic mu' bʌ i yʌl mach Cristojic jiñi Jesús? Jiñʌch xcontra Cristo mu' bʌ i yʌl mach i Tatic Cristo jiñi Dios, yic'ot mach i Yalobilic Dios jiñi Cristo.

²³ Majqui jach mi' yʌl mach i Yalobilic Dios jiñi Cristo mach i cha'añic lac Tat. Pero jiñi mu' bʌ i su'b i Yalobilʌch Dios jiñi Jesús i cha'añʌch lac Tat.

²⁴ La' cʌlec ti la' pusic'al jiñi tsa' bʌ la' ñʌch'ta c'ʌlʌl ti' cajibal. Mi woli' cʌytʌl ti la' pusic'al jiñi tsa' bʌ la' ñʌch'ta c'ʌlʌl ti' cajibal, che' ja'el, mi caj la' chʌn ajñel ti lac Tat yic'ot ti Yalobil.

²⁵ Dios mi' yʌq'ueñonla laj cuxtʌlel mach bʌ añic mi' jilel che' bajche' wʌn albil i cha'añ.

²⁶ Tsa' c ts'ijbubeyetla ili t'añ cha'añ ma'añic mi la' jac'ben jiñi yomo' bʌ i lotiñetla.

²⁷ Tsa'ix aq'uentiyetla jiñi Ch'ujul bʌ Espíritu woli bʌ i chʌn ajñel ti jatetla, jiñi cha'añ mach wersajic mi' cʌntesañetla yam bʌ, come cʌntesʌbiletla ti Espíritu ti pejtelel chuqui yom. Isujmʌch i cʌntesa, mach lotic. Che' bajche' tsi' cʌntesayetla, che'ʌch yom mi la' chʌn ajñel ti Jesús.

²⁸ Wʌle, alobob, chʌn ajñenla ti Cristo, cha'añ che' mi tsictiyel xuc'ul mi la cajñel, cha'añ che' mi' tilel ti' cha'yajlel ma'añic mi caj la cu'bin quisin ti' tojlel.

²⁹ La' wujil tojʌch Cristo, la' wujil ja'el tsa'ix i yilayob pañimil ti Dios pejtelel mu' bʌ i melob chuqui toj.