1 Corintios 14 - Jiñi Tsiji' bʌ Wen T'añ cha'añ Estudio

Che' mi cha'leñob t'añ ti yan tac bʌ t'añ

¹ Chʌn cha'lenla c'uxbiya yic'ot cha'lenla wersa cha'añ mi la' taj la' c'ʌjñibal ti jiñi Espíritu, pero jiñi ñumen uts'at bʌ jiñʌch la' c'ʌjñibal ti subt'añ.

² Come jiñi mu' bʌ i cha'len t'añ ti yan tac bʌ t'añ ma'añic mi' pejcan i pi'ʌlob, cojach mi' pejcan Dios, ma'añic majqui mi' ch'ʌmben isujm, anquese ti jiñi Espíritu mi' cha'len t'añ wocol tac bʌ ti' ch'ʌmbentel isujm.

³ Jiñi mu' bʌ i cha'len subt'añ mi' xuc'chocobeñob i pusic'al wiñicob x'ixicob, mi' xic'ob ti' melol chuqui uts'at yic'ot mi' ñuq'uesʌbeñob i pusic'al.

⁴ Jiñi mu' bʌ i cha'len t'añ ti yan tac bʌ t'añ mi' bajñel taj i wenlel, pero jiñi mu' bʌ i cha'len subt'añ mi' yʌq'ueñ i wenlel xñopt'añob mu' bʌ i tempañob i bʌ.

⁵ Uts'at mi ti la' pejtelel añ la' c'ʌjñibal ti yan tac bʌ t'añ, pero ñumen uts'at mi mux la' cha'len subt'añ, come ñumen añ i c'ʌjñibal jiñi mu' bʌ i cha'len subt'añ bajche' jiñi mu' bʌ i cha'len t'añ ti yan tac bʌ t'añ, come lolom jach yan tac bʌ t'añ mi ma'añic majch mi' ñusʌben isujmlel cha'añ mi' yʌc' ti colel i cuxtʌlel xñopt'añob ti Cristo.

⁶ Wʌle quermañujob, mi woliyon ti t'añ ti yan tac bʌ t'añ che' mic tilel ba'añetla, ¿chuqui i c'ʌjñibal la' cha'añ? Cojach añ i c'ʌjñibal mi tsa' c su'beyetla ti la' t'añ jiñi tsa' bʌ pʌsbentiyon, mi jiñi ña'tʌbil bʌ c cha'añ, mi jiñi wen t'añ, o mi cʌntesa.

⁷ Jiñi música tac ja'el, che' bajche' flauta yic'ot guitarra mach bʌ cuxulic, mi mach yʌñʌlic mi' loq'uel i t'añ, ¿bajche' che' jiñi mi' caj ti cʌjñel chuqui woli ti wustʌl ti flauta yic'ot chuqui woli ti ñijcʌntel ti guitarra?

⁸ Mi mach uts'atic mi' loq'uel i t'añ trompeta, ¿majqui mi caj i chajpan i bʌ cha'añ guerra?

⁹ Che' ja'el jatetla, che' mi la' cha'len t'añ ti yam tac bʌ t'añ mach bʌ añic mi' ch'ʌmbeñob isujm, ¿bajche' che' jiñi mi caj i ña'tañob chuqui mi la' wʌl? Che' jiñi to'ol t'añ jach woliyetla.

¹⁰ Isujm añ ca'bʌl yan tac bʌ t'añ ti pañimil, ti jujunchajp añ isujmlel.

¹¹ Mi ma'añic mic ch'ʌmben isujm junchajp t'añ, che'ʌch mi' q'uelon jiñi mu' bʌ ti t'añ bajche' juntiquil ch'oyol bʌ ti yam bʌ lum, joñon ja'el mij q'uel jiñi wiñic mu' bʌ ti t'añ che' bajche' juntiquil ch'oyol bʌ ti yam bʌ lum.

¹² Che' ja'el jatetla, come la' wom la' c'ʌjñibal mu' bʌ i yʌc' jiñi Espíritu, cha'lenla wersa la' taj ca'bʌl la' c'ʌjñibal cha'añ mi' tajob i colel ti Cristo xñopt'añob mu' bʌ i tempañob i bʌ.

¹³ Jiñi cha'añ jiñi mu' bʌ i cha'len t'añ ti yam bʌ t'añ la' i c'ajtiben Dios i ña'tʌbal cha'añ mi' yʌq'ueñ isujmlel.

¹⁴ Mi wolic pejcan Dios ti yam bʌ t'añ mach bʌ j cʌñʌyic, wolic pejcan tic ch'ujlel jach, pero mach tic ña'tʌbalic.

¹⁵ ¿Bajche' yom che' jiñi? Mi caj c pejcan Dios tic ch'ujlel, mi caj c pejcan tic ña'tʌbal ja'el, mi caj c cha'len c'ay tic ch'ujlel, che' ja'el mi caj c cha'len c'ay tic ña'tʌbal.

¹⁶ Come mi ti a ch'ujlel jach ma' ch'ujutesan Dios ti' tojlel jiñi mu' bʌ i tilel i ñʌch'tan, ¿bajche' mi caj i yʌl “amén” che' ma' su'ben Dios wocolix i yʌlʌ, mi ma'añic mi' ch'ʌmben isujm chuqui wola' wʌl?

¹⁷ Isujm jatet ma' su'ben Dios wocolix i yʌlʌ ti uts'at, pero ma'añic mi' taj i wenlel ti' cuxtʌlel yam bʌ.

¹⁸ Mic su'ben Dios wocolix i yʌlʌ, come ñumen mic cha'len t'añ ti yan tac bʌ t'añ bajche' jatetla.

¹⁹ Pero ti' tojlel xñopt'añob uts'at mi cʌl jo'p'ejl t'añ yic'ot c ña'tʌbal cha'añ mij cʌntesan yaño' bʌ, mach uts'atic lujump'ejl mil t'añ ti yam bʌ t'añ mach bʌ yujilobic.

²⁰ Quermañujob, mach yomic lajal la' ña'tʌbal bajche' i ña'tʌbal alobob, mach yomic jontoletla, yom lajaletla bajche' alʌlob, yom lajal la' ña'tʌbal bajche' wiñicob año' bʌ ca'bʌl i pusic'al.

²¹ Ts'ijbubil ti mandar: “Mi caj j c'ʌmben i yej yaño' bʌ yic'ot yan tac bʌ t'añ cha'añ mic pejcan ili wiñicob x'ixicob. Pero anquese che'ʌch mic pejcañob mach yomobic i yu'bibeñon c t'añ, che'en lac Yum.”

²² Jiñi cha'añ jiñi t'añ tac mach bʌ cʌmbilic jiñʌch i yejtal i p'ʌtʌlel Dios ti' tojlel jiñi mach bʌ añic mi' ñopob Dios, pero che' añ majch mi' cha'len alt'añ, añ i c'ʌjñibal i cha'añ jiñi mu' bʌ i ñopob, ma'añic i c'ʌjñibal i cha'añ jiñi mach bʌ añic mi' ñopob.

²³ Che' mi la' tempan la' bʌ xñopt'añet bʌ la, mi ti jujuntiquiletla mi la' cha'len t'añ ti yan tac bʌ t'añ, ¿chuqui mi caj i yʌlob jiñi mach bʌ cʌntesʌbilobic yic'ot jiñi mach bʌ añic mi' ñopob? ¿Mach ba muq'uic caj i yʌlob cha'añ sojquem la' jol?

²⁴ Che' mi' yochel juntiquil mach bʌ añic mi' ñop, o mi juntiquil mach bʌ cʌntesʌbilic, mi ti pejteletla mi la' cha'len subt'añ, che' jiñi mi' jec'bentel i pusic'al cha'añ la' t'añ ti la' pejtelel, mi caj i ña'tan xmulilʌch.

²⁵ Mi' caj ti tsictiyel jiñi mucul tac bʌ ti' pusic'al, jiñi cha'añ mi caj i pʌcchocon i bʌ cha'añ mi' ch'ujutesan Dios, mi caj i yʌl cha'añ ti isujm ya'añ Dios la' wic'ot.

²⁶ Jiñi cha'añ, quermañujob ¿chuqui yom mi la cʌl? Che' mi la' tempan la' bʌ, ti jujuntiquil añ i salmo, yam bʌ añ i cʌntesʌbal, yam bʌ mi' cha'len t'añ ti yan tac bʌ t'añ, yam bʌ mi' yʌq'uentel chuqui mi' pʌs, yam bʌ mi' ñusan isujmlel jiñi yan tac bʌ t'añ. La' mejlic ti pejtelel cha'añ mi la' colel majlel ti' ñopol Dios.

²⁷ Mi añ mu' bʌ i cha'leñob t'añ ti yan tac bʌ t'añ jasʌl cha'tiquil uxtiquil, mach yomic mi' ñumel ti uxtiquil, belecña yom mi' su'bob, juntiquil la' i ñusʌben isujmlel.

²⁸ Mi ma'añic majch mi mejlel i ñusan isujmlel jiñi t'añ, mach i cha'len t'añ ti yam bʌ t'añ ba' mi' tempañob i bʌ, la' i bajñel pejcan Dios.

²⁹ Che' ja'el la' i cha'leñob subt'añ cha'tiquil uxtiquil jach, jiñi yaño' bʌ la' i yu'biñob mi toj.

³⁰ Mi añ juntiquil buchul bʌ mu' bʌ i yʌq'uentel chuqui mi caj i su'b, la' i cʌy i t'añ jiñi ñaxan bʌ.

³¹ Come ti pejteletla mi mejlel la' cha'len subt'añ ti jujuntiquiletla cha'añ mi' laj ñopob yic'ot ti' pejtelelob mi' tajob i xic'bentel.

³² Jiñi aq'uebil bʌ jump'ejl t'añ ti Dios mi mejlel i yujtesan i su'b, o mi mejlel i poj cʌy cha'añ mi' su'b yam bʌ.

³³ Come Dios ma'añic mi' mulan jiñi ju'ucña bʌ, cojach ñʌch'ʌl bʌ. Che' bajche' i tilel ti' tojlel pejtelel i cha'año' bʌ Dios baqui jach mi' tempañob i bʌ,

³⁴ jiñi x'ixicob, la' ajñicob ti ñʌch'ʌl che' mi' tempañob i bʌ xñopt'añob, come tic'bilob ti t'añ, yom mi' jac'ob i cʌntesʌntel che' bajche' mi' yʌl jiñi mandar.

³⁵ Mi añ chuqui yomob i ñop jiñi x'ixicob, la' i c'ajtibeñob i ñoxi'al ti' yotot, come mach uts'atic che' mi' cha'leñob t'añ x'ixicob ba' mi' tempañob i bʌ xñopt'añob.

³⁶ ¿Ya' ba' tsa' tejchi i t'añ Dios ba'añetla? ¿Cojach ba tsa' c'oti i t'añ Dios ya' ba'añetla?

³⁷ Mi añ majch mi' su'b i bʌ ti xsubt'añ mu' bʌ i jac'ben jiñi Espíritu, la' i ña'tan jiñʌch i mandar lac Yum jiñi tsa' bʌ c ts'ijbubeyetla.

³⁸ Pero mi añ juntiquil mach bʌ yomic i jac', mach la' jac'ben i t'añ ja'el.

³⁹ Jiñi cha'añ quermañujob, cha'lenla wersa la' taj la' c'ʌjñibal ti subt'añ, mach la' tic' jiñi mu' bʌ i cha'leñob t'añ ti yan tac bʌ t'añ.

⁴⁰ Ti pejtelel chuqui tac mi la' mel, tojʌch yom melol.