Yuda 1 - Testamente Leyimpsha Xichangana

Kuxeweta

¹ Mina Yuda, nandza wa Yesu Kriste ni makwavu wa Yakobe, nitsalela lava Xikwembu Tatana xivavitaneke, lavahanyaka rirhandzwini ra xona, na vali karhi vahlayisiwa hi Yesu Kriste, nili:

² Musa, ni kurhula, ni rirhandzu, asvive na n'wina hi ntalu.

Vajondzisi va mavunhwa

³ Varhandziwa, aninavela ngopfu kumitsalela timhaka ta kuponisiwa lokunga ka hina hinkwerhu, kambe nikumile lesvaku svanifanela kumitsalela nimikhongotela kulwela vupfumeli lebzi Xikwembu xibzinyikeke kan'we vahlawuliwa va xona.

⁴ Hikuva vanhu van'wana vangungumelile vanghena xikarhi ka hina; kuyavanyisiwa ka vona kulungisiwe khale. I vanhu lavangaliki na mhaka ni vukhongeli; vahundzula timpsalu ta Xikwembu xa hina, vayendla sva manyala ha tona, nasvona valandzula Yesu Kriste, yena N'winyi wa hinkwasvu ni Hosi ya hina.

⁵ Hambilesvi mitivaka svinene timhaka leti, ninavela kumitsundzuxa lesvaku Hosi yiponisile Vaisrayele, yivahumesa tikweni ra Gibita, kambe ndzhaku ka svosvo, yihelisile lava vangapfumelangiki.

⁶ Nasvona ku ni tintsumi letingahlayisangiki xiyimu xa tona, kambe tisukile laha akuli kaya ka tona; hi kolaho, Xikwembu xibohile tintsumi takona hi machini, xitipfalela hilaha kungaheliki xinyameni lexichavisaka, tirindzela siku lerikulu ra kuyavanyisiwa.

⁷ Svahafana na Sodoma na Gomora, ni madoropa lawa amali kusuhi na wona, lawa amahanya vuwosvini kufana ni tintsumi letiya ni kutinyiketa kunaveleni ka sva manyala: Madoropa lawaya svosvi mahundzuke xitsundzuxu hi kubiwa mahisiwa hi ndzilo lowungaheliki.

⁸ Na vona vanhu lava, vahanyisa xisvosvo: Vanyamisa miri wa vona hi milorho ya vona. Ava na mhaka ni vuhosi bza Xikwembu, vasandza ni matimba ya svivumbiwa sva le tilweni.

⁹ Kasi Mikayele ntsuminkulu, loko alwetana na Diyavulosi vaphikizana hi ntsumbu wa Moxe, achavile kuyavanyisa Diyavulosi ni kuhumesa marito ya kumusandza, kambe ate: “AHosi ayikutshinye!”

¹⁰ Kambe vanhu lava vasandza xihi na xihi lexi vangaxitwisisiki, kutani vayendla svilo lesvi vasvitivaka hi ntumbuluku kufana ni sviharhi sva nhova; hi svona lesvi svivalovisaka.

¹¹ Vabuyagwana! Hikuva vakhomile ndlela ya Kayini; hi kunavela bindzu, vatinyiketa mintirhweni leyohomboloka ya Balamu, vatilovisa hi vupfukeli bzofana ni bza Kora.

¹² Vanhu lava i svivati minkhubzeni ya n'wina ya rirhandzu, loko vali karhi vacina vanwa ngopfu na vangali na tingana, vatiphina voxe. I marefu lawa mangahava mpfula, lawa mayisiwaka hala ni hala hi kuhunga ka mimoya; i minsinya ya vuxika yopfumala mihandzu, leyidlayiweke kambirhi hi kutsuvuliwa ni timintsu;

¹³ i magandlati yoleva ya lwandle, lawa matlhutlhaka khuvi ra tingana ta vona; i tinyeleti totsendzeleka letihlayiseliweke munyama lowukulu ngopfu, hilaha kungaheliki.

¹⁴ Avile Enoke, munhu wa rixaka ra vuntlhanu kusukela ka Adamu, lweyi aprofeteke mayelanu ni vanhu volavo aku: “Vonani, Hosi yifikile ni vakwetsimi va yona va madzanadzana,

¹⁵ kutayavanyisa hinkwavu, ni kukholwisa hinkwavu va ka vona lavangaliki ni vukhongeli henhla ka mintirho ya vona hinkwayu leyi vayiyendleke hi kusandza, ni le henhla ka marito hinkwawu ya vusandzi lawa vajohi lavangaliki ni vukhongeli vamavuleke henhla ka yona.”

¹⁶ Lava i vanhu votshamela kungurangura ni kuvilela, lavasusumetiwaka hi kunavela ka vona lokobiha, vanhu vamanyunyu lavatikulisaka, lavakanganyisaka van'wana hi kuvabumabumela, kasi valava kuvuyeliwa.

Svitsundzuxu ni svileriso

¹⁷ Kambe n'wina varhandziwa, mifanele kutsundzuka lesvivuliweke khale hi vapostola va Hosi ya hina Yesu Kriste;

¹⁸ vamibzelile vaku: “Minkarhini leyohetelela, kutahumelela vasandzi lavasusumetiwaka hi kunavela ka vona lokobiha vangachavi Xikwembu.”

¹⁹ Hi vona vavangaka kuyavana ka vanhu; hikuva i vanhu lavafambisiwaka hi kunavela ka nyama, ava na Moya.

²⁰ Kambe n'wina, varhandziwa, tiyakeni kupfumeleni ka n'wina lokokwetsima ngopfu, Khongelani hi matimba ni Moya Lowokwetsima.

²¹ Tshamani rirhandzwini ra Xikwembu. Langutelani musa wa Hosi ya hina Yesu Kriste lowuyisaka vuton'wini lebzingaheliki.

²² Twelani vusiwana lavakanakanaka.

²³ Ponisani van'wana hi kuvawutla ndzilweni; van'wana mivatsetselela na mili ni kutivonela: Mifanela kunyenya hambi ali sviyambalu sva vona svinene, lesvinyamisiweke hi sva misava leyi.

Xikhongelo xodzunisa Hosi

²⁴ Eka yena lweyi anga ni matimba ya kumihlayisa lesvaku mingakhunguvanyeki miwa, ka yena lweyi akwetsimaka, lweyi akotaka kumiyimisa mahlweni ka yena na mingali na xivati, na mitsakile svinene kutwalisiweni ka yena.

²⁵ Ka xona Xikwembu xili xin'we, muponisi wa hina ha Yesu Kriste Hosi ya hina, ku ni kutwala, ni vukulukumba, ni kufuma, ni matimba, kusukela minkarhini hinkwayu leyihundzeke, ni svosvi, ni hilaha kungaheliki. Amen.