Yohane 9 - Testamente Leyimpsha Xichangana

Ta Yesu loko ahanyisa munhu lweyi angapsaliwa na afile mahlo

¹ Loko Yesu ali karhi ahundza, avona munhu lweyi angapsaliwa na afile mahlo.

² Kutani vajondzisiwa va yena vamuvutisa vaku: Mujondzisi, i xijoho xa mani lexiyendleke lesvaku munhu lweyi apsaliwa na angavoni: “I xa yena kumbe i xa vapsali va yena ke?”

³ Yesu ahlamula aku: Akujohanga yena, kumbe vapsali va yena, kambe apsaliwile na afile mahlo lesvaku mintirho ya Xikwembu yitavoneka ha yena.

⁴ Hifanela kutirha mintirho ya lweyi anirhumeke, jambu ringasipela; vusiku bzata, lebzi munhu angatakala angahakoti kutirha.

⁵ Loko nahali kona laha misaveni, ni kuvonakala ka misava.

⁶ Kuteloko avulile svosvo, apshitela hansi, apfuva madaka hi marhi; atota mahlo ya munhu yelweyo hi madaka yakona,

⁷ kutani aku ka yena: “Famba uyahlamba xihlobzeni xa silowama ( hi lesvaku ‘Xirhumiwa’)”. Kutani ayahlamba, avuya na ali karhi avona.

⁸ Avayakelani va yena ni lava avatolovela kumuvona na ali mukombeli, vaku: “Xana ahi yena lweyi aatolovela kutshama na ali karhi akombela ke?”

⁹ Van'wana vaku: “Hi yena.” Van'wana vaku: “Ahihim, ahi yena, kambe ofana na yena.” Yena hi yexe aku: “Hi mina!”

¹⁰ Kutani vaku ka yena: “Mahlo ya wena mahanyanyisiwile hi mukhuva wihi xana?”

¹¹ Yena ahlamula, aku: “Wanuna lweyi vango i Yesu, apfuve madaka, anitota mahlo hi wona, kutani ate ka mina: ‘ Famba uyahlamba axihlobzeni xa Silowama.’ Niyile, niyahlamba, kutani nikotile kuvona.”

¹² Vaku ka yena: “A kwihi wanuna wakona?” Aku: “Anikutivi.”

Vafarisi vakambisisa ta kuhanyisiwa ka wanuna lweyi

¹³ Vateka munhu lweyi aafile mahlo vamuyisa ka vafarisi.

¹⁴ Kutani siku leri Yesu apfuveke madaka ha rona, ahanyisa mahlo ya munhu lwiya, aali Savata.

¹⁵ Vafarisi vayengeta vavutisisa munhu lweyi kutiva hilaha ahanyisiweke hakona. Aku ka vona: “Anitotile mahlo hi madaka; niyile niyahlamba, kutani svosvi nikota kuvona.”

¹⁶ Van'wana xikarhi ka vafarisi vaku: “Lweyi ayendleke svilo lesvi angahumi ka Xikwembu, hikuva anga na mhaka ni siku ra Savata.” Van'wana vaku: “Xana munhu wa mujohi angasvikotisa kuyini kuyendla mahlori lawa yotanu ke?” Kutani kuva ni kuyavana xikarhi ka vona.

¹⁷ Vatlhela vavutisa lweyi aafile mahlo, vaku: “Wena uliyini hi yena, lesvi unge, akuhanyisile mahlo?” Yena aku: “I muprofeta!”

¹⁸ Avayuda avapfumelanga loko vabzeliwa lesvaku munhu lwiya khale aafile mahlo, ni lesvaku svosvi ahundzuke lweyi akotaka kuvona; kutani vavitana vapsali va yena,

¹⁹ vavavutisa, vaku: “Xana lweyi i n'wana wa n'wina lweyi minge, apsaliwile na afile mahlo ke? Svosvi asvikotisa kuyini kuvona xana?”

²⁰ Vapsali va yena vahlamula vaku: “Hasvitiva lesvaku lweyi i n'wana wa hina, ni lesvaku apsaliwile na afile mahlo;

²¹ kambe lexi xiyendlaka lesvaku svosvi akota kuvona, ahixitivi, ni lweyi amuhanyiseke mahlo, ahimutivi. Muvutiseni, akulile, atatihlamulela ha yexe.”

²² Vapsali va yena avavula svosvo hi kuchava Vayuda, hikuva Vayuda avatwananile lesvaku, loko munhu mun'we angatshuka aveka vumboni lesvaku Yesu i Kriste, atahlongoliwa sinagogeni.

²³ Hikolaho vapsali va yena vangate: “Akulile, muvutiseni.”

²⁴ Vatlhela vavitana kambe munhu lweyi aafile mahlo, vaku ka yena; “Dzunisa Xikwembu! Hina hasvitiva lesvaku munhu lweyi i mujohi.”

²⁵ Yena aku: “Mina anisvitivi loko alimujohi; nhotiva xilo xin'we ntsena, hi lesvaku aningavoni, kasi svosvi se na vona,”

²⁶ vaku ka yena: “Ayendlile yini ka wena? Akuhanyisile mahlo hi mayedlela wahi ke?”

²⁷ Avahlamula, aku: “Nimibzelile khale, kambe amitwisisi; hikolaho ka yini milava kutlhela mintwa mhaka leyi xana? Xana na n'wina milava kuva vajondzisiwa va yena ke?”

²⁸ Kutani vamurhukatela vaku: “‘Hi wena unga mujondzisiwa wa yena; hina hi vajondzisiwa va Moxe.’”

²⁹ Hasvitiva lesvaku Xikwembu xivulavulile na Moxe; kambe wanuna lweyi, ahikutivi lomu ahumaka kona.

³⁰ Lweyi ahanyisiweke avahlamula, aku: “Hiyo mhaka leyihlamalisaka! Amikutivi lomu ahumaka kona, kambe anihanyisile mahlo!

³¹ Hasvitiva lesvaku Xikwembu axiyingisi vajohi; kambe loko munhu achava Xikwembu, ayendla kurhandza ka xona, Xikwembu xa muyingisa.

³² Ahisisvitwa ni siku ni rin'we, lesvaku munhu lweyi apsaliweke na angavoni, angava ahanyisiwa mahlo hi munhu mun'wana.

³³ Loko onge munhu lweyi angahumanga hika Xikwembu, ingi angakotanga kuyendla nchumu.”

³⁴ Vamuhlamula vaku: “Wena upsaliwile chakeni ra svijoho, ungajondzisa hina xana?” Kutani vamuhlongola ahuma handle.

Ta kufa mahlo ya moya

³⁵ Yesu atwa lesvaku vamuhlongolile, kutani loko amukumile, aku ka yena: “Xana wapfumela ka N'wana-wa-Munhu ke?”

³⁶ Ahlamula aku: “I mani Hosi, lesvaku nitakota kupfumela ka yena?”

³⁷ Yesu aku ka yena: “Umuvonile, hi yena lweyi avulavulaka na wena.”

³⁸ Wanuna ahlamula aku: “Hosi, napfumela!” Kutani akhinsama mahlweni ka Yesu amukhongela.

³⁹ Yesu aku: “Nitile misaveni leyi kutayavanyisa vanhu, lesvaku lava vangavoniki vakota kuvona, ni lesvaku lava vavonaka vahundzuka lavo-fa-mahlo.”

⁴⁰ Vafarisi van'wana lava avali na yena, loko vatwa marito lawa, kutani vaku ka yena: “Xana na hina hifile mahlo ke?”

⁴¹ Yesu aku ka vona: Loko amifile mahlo, amingatava ni nandzu; kambe svosvi, lesvi minge: “‘Havona; hi kolaho svijoho sva n'wina svitshama ka n'wina.’”