Yohane 8 - Testamente Leyimpsha Xichangana

Ta Yesu loko arivalela wansati lweyi akumiweke akuwosveni

¹ Kutani-ke, Yesu aya ntshaveni ya Maolivhera.

² Nimixo, apfukisa svinene, awuyela Tempeleni; vanhu hinkwavu vata ka yena, kutani atshama hansi, asungula kuvajondzisa.

³ Vatsali ni vafarisi vatisa wansati lweyi akumiweke avuwosveni. Vamuyimisa xikarhi ka vanhu hinkwavu;

⁴ kutani vaku ka Yesu: “Mujondzisi, wansati lweyi akumiwile hakunene, ali karhi awosva.

⁵ Kutani Naweni, Moxe ahilelete lesvaku vavasati votani hifanela kuvakhandla hi maribze; xana wena uliyini ke? ”

⁶ Avavula svosvo kuli kumuringa, lesvaku vatakuma mhaka leyi vangamuvekelaka nandzu ha yona. Kambe Yesu akorhama, atsalatsala hansi ka misava hi ritiho.

⁷ Tani hi lesvi avasindzisa kumuvutisisa, a ololoka, aku ka vona: “Lweyi a ngaliki ni xijoho, xikarhi ka n'wina aarhange ahoxa ribze amukhandla.”

⁸ Atlhela akorhama, atsalatsala hansi ka misava.

⁹ Loko vatwile svosvo, vasuka hi mun'we mun'we, kusungula hi lavakulu kuyafika ka lava vatsongo; kutani Yesu asala ali yexe, lweyi wansati alikolaho xikarhi.

¹⁰ Kuteloko Yesu a ololokile angavoni munhu, handle ka lweyi wansati, aku ka wansati: “Wansati, vakwihi lava vakuhehlaka xana? Xana aku na ni mun'we lweyi akuyavanyiseke ke?”

¹¹ Yena aku: “Ni mun'we anga kona Hosi.” Yesu aku ka yena: “Na mina anikuyavanyisi; famba, kambe ungahatlhele ujoha.”

Yesu i rivoni ra misava

¹² Kutani Yesu atlhela avulavula na vona, aku: “Hi mina kuvonakala ka misava; lweyi anilandzelaka angakala angafambi munyameni ni siku ni rin'we, kambe atava ni kuvonakala ka vutomi.”

¹³ Vamubzela vafarisi vaku: “Utivekela vumboni ha wexe, vumboni bza wena ahibza ntiyiso”

¹⁴ Yesu avahlamula aku: “Ni loko nitihumesela vumboni, vumboni bza mina bzitiyile, hikuva nitiva lomu nihumaka kona, ni lomu niyaka kona; kambe n'wina amikutivi lomu nihumaka kona, ni lomu niyaka kona, amikutivi.

¹⁵ N'wina, miyavanyisa mayelanu ni nawu wa vanhu; mina aniyavanyisi munhu.

¹⁶ Ni loko hi ntiyiso niyavanyisa, kuyavanyisa ka mina i ka ntiyiso; hikuva aninoxe, kambe Tatana lweyi anirhumeke ana mina.

¹⁷ Kutani le Nawini wa n'wina, kutsaliwile lesvaku vumboni bza vanhu vambirhi bza ntiyiso.

¹⁸ Hi mina lweyi atihumeselaka vumboni, kutani na yena Tatana, lweyi anirhumeke, ahumesa vumboni henhla ka mina.”

¹⁹ Vaku ka yena: “Tatana wa wena akwihi?” Yesu ahlamula, aku: “Aminitivi, hambi ali Tatana wa mina amimuntivi; loko onge minitivile, ina mintivile Tatana wa mina.”

²⁰ Yesu avulile marito lawa loko ali karhi ajondzisa Tempeleni, laha akunhlayisiwa male ya nhlengo; kutani akuvanga ni mun'we lweyi amukhomeke, hikuva nkarhi wa yena awungasifika.

Yesu i mani xana?

²¹ Yesu atlhela kambe aku ka vona: “Mina nasuka, nafamba, kutani mitanilava, kambe mitafela kujoheni ka n'wina. Laha mina niyaka kona, mingakala mingayi.”

²² Kutani Vayuda vaku: Xana alava kutidlaya lesvi ango: “Laha niyaka kona, mingakala mingayi ke?”

²³ Aku ka vona: N'wina mihuma kola hansi, mina nihuma hi le henhla; n'wina mi va misava leyi; mina ani wa misava leyi.

²⁴ Hikolaho nimibzelaka svona, loko nite: “Mitafela svijonhweni sva n'wina. Hikuva loko mingapfumeli lesvaku Mina yihe Mina, mitafela svijonhweni sva n'wina.”

²⁵ Vaku ka yena: “Hi wena mani?” Yesu aku ka vona: “Svosvi ningamibzela svona kusukela kusunguleni, lesvaku ni yena.”

²⁶ Ni ni lesvotala lesvi nifanelaka kumibzela ni kusviyavanyisa henhla ka n'wina; kambe lweyi anirhumeke i ntiyiso wa xiviri; kutani lesvi nisvitweke ka yena lesvo, nisvivulavula ka misava.

²⁷ Kambe avativanga lesvaku aavabzela hi ta Tatana.

²⁸ Yesu aku ka vona: “Loko mitava mitlakusile N'wana-wa-Munhu, hi kona mingatativa lesvaku mina ni mani, ni lesvaku aniyendli nchumu hi kurhandza ka mina, kambe nivula svilo lesvi Tatana anijondziseke svona.

²⁹ Kutani lweyi anirhumeke, ana mina; Tatana anganitshikanga nili noxe, hikuva masiku hinkwawu niyendla lesvi svimutsakisaka.”

³⁰ Aali karhi avulavula timhaka leti na lavotala vapfumela ka yena.

Antiyiso utamitshunxa

³¹ Yesu abzela Vayuda lavapfumeleke ka yena aku ka vona: “Loko mitshama ritweni ra mina, mitava vajondzisiwa va mina hakunene;

³² nasvona mitativa ntiyiso, kutani ntiyiso wutamintshunsa.”

³³ Vamuhlamula vaku: “Hi rixaka ra Abrahamu; ahisiva svikarawa sva munhu ni siku ni rin'we. Xana uvula yini loko uku: ‘Mitava lavatshunxekeke’ ke?”

³⁴ Yesu avahlamula aku: “Nitiyisile hakunene nili ka n'wina: Mani na mani lweyi ayendlaka xijoho i xikarawa xa xijoho.

³⁵ Xikarawa axitshami hilaha kungaheliki kaya, kambe lweyi atshamaka hilaha kungaheliki i n'wana wa laha kaya.

³⁶ Hikolaho-ke, loko N'wana amitshunxa, mitava lavatshunxekeke hakunene.

³⁷ Nasvitiva lesvaku mirixaka ra Abrahamu, kambe milava kunidlaya, hikuva rito ra mina arikumi ndhawu ka n'wina.”

³⁸ Mina nivulavula hi lesvi nisvivoneke ka Tatana, kambe n'wina miyendla lesvi misvitweke svihuma ka tatana wa n'wina.

Diyavulosi hi yena tatana wa n'wina

³⁹ Vamuhlamula, vaku: “Tatana wa hina i Abrahamu.” Yesu aku ka vona: “Loko amili vana va Abrahamu, tirhani mintirho ya Abrahamu.

⁴⁰ Kambe svosvi milava kunidlaya, mina lweyi ningamibzela ntiyiso lowu niwutweke ka Xikwembu! Abrahamu angayendlanga svona lesvi.

⁴¹ N'wina miyendla mintirho ya tatana wa n'wina.” Vaku ka yena: “Hina ahipsaliwanga avuwosveni hi ni tatana mun'we ntsena, xinga Xikwembu.”

⁴² Yesu aku ka vona: “Loko Xikwembu axili tatana wa n'wina, amitanirhandza, hikuva mina nihumile, nasvona nita hi ka Xikwembu; anititisanga, kambe nirhumiwile hi yena.

⁴³ Hikolaho ka yini mingatwisisi lesvi nisvivulaka xana? I mhaka ya lesvi mitsandzekaka kuyingisa rito ra mina.

⁴⁴ Tatana wa n'wina i Diyavulosi, kutani mitsakela kuyendla kurhandza ka tatana wa n'wina. Aali mudlayi ni le kusunguleni. Angatshamanga ntiyisweni, hikuva kuhava ntiyiso ka yena. Loko avulavula mavunhwa, akombisa lesvi anga svona, hikuva i muhembi, ni tatana wa mavunhwa.

⁴⁵ Kambe mina nimibzela ntiyiso hi svona sviyendlaka lesvaku mingapfumeli.

⁴⁶ I mani ka n'wina lweyi angakombaka xijoho xa mina xana? Loko nimibzela ntiyiso, hikolaho ka yini minganipfumeli xana?

⁴⁷ Lweyi anga wa Xikwembu ayingisa marito ya Xikwembu; kambe n'wina amiyingisi hikuva amihumi ka Xikwembu.”

Loko Abrahamu angasiva kona Yesu se aali kona

⁴⁸ Vayuda vahlamala, vaku ka yena: “Xana hohemba loko hiku wena u Musamariya, ni lesvaku u ni dimoni ke?”

⁴⁹ Yesu ahlamula, aku: “Mina, a ni na dimoni, kambe nixixima Tatana wa mina, kutani n'wina aminixiximi.

⁵⁰ Anitilaveli kudzunisiwa; akona lweyi alavaka kunidzunisa, nasvona waniyavanyisaka.

⁵¹ Nitiyisile hakunene, nili ka n'wina: Munhu lweyi ahlayisaka rito ra mina, angakala angavoni rifu ni siku ni rin'we.”

⁵² Vayuda vaku ka yena: “Svosvi hasvitiva lesvaku u ni dimoni; hikuva Abrahamu afile; ni vaprofeta, vafile; kambe, wena uli: ‘Loko munhu ahlayisa rito ra wena, angakala angaringi rifu ni siku ni rin'we!’ ”

⁵³ Xana wena ulwenkulu kutlula Abrahamu tatana wa hina lweyi angafa ke? Nasvona vaprofeta na vona vafile; xana utiyendla mani ke?

⁵⁴ Yesu ahlamula, aku: “Loko nitidzunisa, kutidzunisa ka mina akupfuni nchumu. Lweyi anidzunisaka i Tatana wa mina, lweyi mingo: ‘ i Xikwembu xa n'wina.’

⁵⁵ Kutani n'wina amimuntivi, kambe mina namutiva: Loko mina nivula lesvaku animutivi, nitava nili muhembi kufana na n'wina, kambe namutiva, nasvona nihlayisa rito ra yena.

⁵⁶ Tatana wa n'wina Abrahamu atsakile ngopfu hi kuvona siku ra mina; arivonile, avuya atsaka.”

⁵⁷ Kutani Vayuda vaku ka yena: “Awusitlhanganisa ntlhanu wa makume ya malembe, kambe uli uvonile Abrahamu xana?”

⁵⁸ Yesu aku ka vona: “Nitiyisile, nili ka n'wina: Loko Abrahamu angasipsaliwa, mina se anili ‘lweyi ninga yena.’”

⁵⁹ Kutani varhola maribze kumukhandla, kambe Yesu atumbela, kutani ahuma Tempeleni.