Yohane 7 - Testamente Leyimpsha Xichangana

Ta vamakwavu va Yesu lava vangapfumeliki

¹ Ndzhaku ka svosvo Yesu aafambafamba Galileya; angahalavi kufambafamba Yudeya, hikuva Vayuda avalava kumudlaya.

² Nkhuvu wa Vayuda woyendleliwa minchancheni awuli kusuhi.

³ Kutani vamakwavu va yena vaku ka yena: “Suka laha, uya Yudeya lesvaku vajondzisiwa va wena na vona vatavona mintirho leyi uyiyendlaka.

⁴ Hikuva aku na munhu lweyi ayendlaka xokarhi ali xihundleni, loko alava kutiviwa matlhelweni hinkwawu; loko svilo lesvi usviyendlaka svili lesvi, tikombi ka misava hinkwayu.”

⁵ Hikuva, na vona vamakwavu va yena avangali nakupfumela ka yena.

⁶ Hi loko Yesu aku ka vona: “Nkarhi wa mina awusifika; kambe ka n'wina nkarhi wihi ni wihi wululamile.”

⁷ Misava yingakala yingamivengi, kambe mina yanivenga, hikuva nivula vumboni bza lesvaku mintirho ya yona yibihile.

⁸ N'wina tlhantukelani nkhubzeni, wolowo, mina aniyi ka wona, hikuva nkarhi wa mina awusihetiseka.

⁹ Loko avabzelile svosvo atisalela Galileya.

Ta Yesu nkhubzeni wa le minchacheni

¹⁰ Kambe loko vamakwavu va yena vafambile nkhubzeni na yena atlhantukela kona, kungali kuvonakaleni, kambe xihundleni.

¹¹ Vayuda avamulava nkhubzeni, vaku: “A kwihi munhu wakona xana?”

¹² Akuli ni kuhlevahleva ka xitshungu, hi mayelanu na yena. Van'wana avaku: “I munhu wa munene!” Van'wana avaku: “Ahihim, axenga xitshungu.”

¹³ Hambi svilitano, akuvanga ni munhu lweyi avulavuleke hi yena kuvonakaleni, hikolaho ka kuchava Vayuda.

¹⁴ Loko nkhuvu wuli xikarhi, Yesu atlhantukela Tempeleni asungula kujondzisa.

¹⁵ Vayuda vahlamala vaku: “Xana munhu lweyi amativisa kuyini maletera kasi angajondzanga?”

¹⁶ Yesu avahlamula aku: “Jondzo leyi niyijondzisaka ahi ya mina, kambe i ya lweyi anirhumeke.

¹⁷ Loko munhu alava kuyendla sva yena, atasvitiva lesvaku jondzo leyi yihuma ka Xikwembu, kumbe no tivulavulela sva mina ntsena?

¹⁸ Lweyi avulavulaka svohuma ka yena atilavela kudzunisiwa, kasi lweyi alavaka kudzunisa lweyi amurhumeke, atshembekile, kutani kuhava kuhomboloka ka yena.

¹⁹ Xana Moxe angaminyikanga Nawu ke? Hambi svilitano, kuhava ni mun'we wa n'wina lweyi ahlayisaka Nawu. Hikolaho ka yini milava kunidlaya ke?”

²⁰ Xitshungu xihlamula, xiku: “U ni dimoni wena; xana i mani lweyi alavaka kukudlaya ke?”

²¹ Yesu avahlamula aku: “Niyenndlile ntirho wun'we, kutani hinkwenu maha hlamala hikolaho ka wona.

²² Moxe aminyikile ntolovelo wa kuyimba ahi lesvaku awuhuma ka Moxe, kambe awuhuma ka vakokwana. kutani n'wina miyimbisa munhu hi siku ra Savata!

²³ Loko miyimbisa munhu hi siku ra Savata, miyendlela kuhlayisa Nawu wa Moxe; kutani xana minikarihelela yini, lesvi mina ningahanyisa munhu mirini wa yena hinkwawu hi siku ra Savata ke?

²⁴ Mingayi hi nghohe loko miyavanyisa, kambe yavanyisani hi kululama.”

Xana lweyi hi yena Mesiya xana?

²⁵ Vayaki van'wana va Yerusalema vaku: “Xana ahi yena lweyi vamulavaka kumudlaya ke?

²⁶ Vonani! Hilweyi, avulavula kuvonakaleni, kambe avavuli nchumu. Xana varhangeli vangava vasvitiva hakunene lesvaku lweyi hi yena Kriste ke?

²⁷ Hambi svilitano, hakutiva lomu lweyi ataka hi kona, kambe loko ali Kriste, siku leri angatata ha rona, kuhava munhu ni mun'we lweyi angatativa lomu ata ka hi kona.”

²⁸ Loko Yesu ali karhi ajondzisa Tempeleni, atlakusa rito, aku: “Manitiva, mitiva ni lomu nihumaka kona; anititisanga, kambe lweyi anirhumeke, yena i ntiyiso hi xiviri xa yena, kutani n'wina amimutivi.

²⁹ Mina namutiva, hikuva, nihuma ka yena, nasvona hi yena lweyi anirhumeke.”

³⁰ Kutani varingeta kumukhoma, kambe akuvanga ni mun'we lweyi angayisa voko ka yena, hikuva nkarhi wa yena awungasifika.

³¹ Lavotala xikarhi ka xitshungu vapfumela ka yena, vaku: “Loko Kriste ata, xana atayendla mahlori lawa matlulaka lawa mayendliwaka hi munhu lweyi xana?”

Malandza marhumiwa kuyakhoma Yesu

³² Vafarisi vatwa lesvi xitshungu xihlevetelaka svona mayelanu na Yesu, kutani Vaprista lavakulu ni Vafarisi varhuma malandza kuyamukhoma.

³³ Kutani Yesu aku ka vona: “nahatava na n'wina nkarhinyana, kutani ndzhaku ka svona nitaya ka lweyi anirhumeke.

³⁴ Mitanilava, kambe aminganikumi; ni laha ninga kona, mingakala mingati.”

³⁵ Hi loko Vayuda vavutisana vaku: Alava kuya kwihi munhu lweyi, lomu hingatatsandzeka kumukuma kona xana? Xana alava kuya ka Vayuda lava vahangalakeke xikarhi ka va-Griki, ni nkongometo wa kuyajondzisa va-Griki ke?

³⁶ Rito leri alivulaka rihlamusela kuyini, loko aku: Mitanilava, kambe aminganikumi ni loko aku: “‘Laha ninga kona mingakala mingati?’”

Ta milambu ya mati lawa mahanyaka

³⁷ Hi siku rogamesa ra nkhuvu, ringa lerikulu, Yesu asuka ayima, kutani atlakusa rito aku: “Loko munhu ali ni torha, aate ka mina atanwa.”

³⁸ Hilaha Tsalwa rivuleke hakona, milambu ya mati lawa mahanyaka yitakhulunga yihuma mbilwini ya lweyi apfumelaka ka mina.

³⁹ Hi kuvula svosvo, aaringanisa Moya lowu lava vangatapfumela ka yena vangatanyikiwa wona. Hikuva kufika nkarhi wolowo, Moya Lowokwetsima awungasinyikiwa, hikuva Yesu aangasitlakusiwa.

Ta kuyavana ka xitshungu

⁴⁰ Hikolaho, lavotala ka xitshungu loko vatwile marito lawa, vaku: “Lweyi hi yena Muprofeta hakunene.”

⁴¹ Van'wana vaku: “Lweyi hi yena Kriste.” Kambe van'wana vaku: “Xana Kriste angata hi le Galileya ke?

⁴² Xana Tsalwa arivulanga lesvaku Kriste atahuma rixakeni ra Davhida, avelekiwa Betlelehema, mugangeni lowu Davhida aatshama ka wona ke?”

⁴³ Hikolaho kupfuka kuyavana xikarhi ka xitshungu hi mhaka ya yena.

⁴⁴ Van'wana va vona vanavela kumukhoma, kambe akuvanga ni mun'we lweyi angayisa voko ka yena.

Vakulukumba avapfumelanga

⁴⁵ Kutani malandza mavuyela ka Vaprista lavakulu ni ka Vafarisi; vona vavavutisa, vaku: “Hikolaho ka yini mingavuyanga na yena ke?”

⁴⁶ Malandza mahlamula, maku: “Akusiva ni munhu ni siku ni rin'we lweyi avulavuleke kufana ni munhu lwiya.”

⁴⁷ Vafarisi vavahlamula, vaku: “Xana na n'wina mikangayisiwile ke?

⁴⁸ I mani ka vakulukumba ni le ka vafarisi lweyi angapfumela ka yena xana?

⁴⁹ Kambe xitshungu lexi xingativiki Nawu, xirhukaniwile.”

⁵⁰ Mun'wana wanuna, yena Nikodema, ( lweyi angatshama aya ka Yesu, nivusiku), aku ka vona:

⁵¹ “Xana Nawu wa hina wayavanyisa munhu angasiyingisiwa, ni lesvi asviyendlaka svingasitiviwa ke?”

⁵² Vamuhlamula vona vaku: “Xana na wena uhuma Galileya ke? Kambisisa svinene utakuma lesvaku kuhava muprofeta lweyi ahumaka Galileya.”

⁵³ Kutani vahangalaka, mun'wana ni mun'wana aya kaya ka yena.