Yohane 6 - Testamente Leyimpsha Xichangana

Ta kuphameliwa ka vanhu va ntlhanu wa makhulu (5 000)

¹ Ndzhaku ka svosvo Yesu asuka apela tiveni ra Galileya, ritiviwaka hiku i tiva ra Tiberiya.

² Akuli ni xitshungu lexikulu lexi axifamba na yena, hikuva axivonile mahlori lawa amayendleke hi kuhanyisa timbabzi.

³ Kutani Yesu atlhantukela ntshaveni, ayatshama hansi ni vajondzisiwa va yena.

⁴ Kutani nkhuvu wa Paska ya Vayuda awuli kusuhi.

⁵ Kuteloko Yesu atlakusa mahlo, ni loko avonile lesvaku ku ni xitshungu xinyingi lexiteke ka yena, aku ka Filipi: “Xana hingaxava kwihi svinkwa kuva vanhu lava vakota kuja ke?”

⁶ Aavula svosvo na ali kumuringa, hikuva yena n'winyi aativa lesvi angatasviyendla.

⁷ Filipi amuhlamula, aku: “Svinkwa sva tidenari ta madzana mambirhi, svingakala svingaringani hambi loko mun'wana ni mun'wana angakuma xikhemu lexitsongo ntsena.”

⁸ Mun'we wa vajondzisiwa va yena, Andreya makwavu wa Simoni Petrosi, aku ka yena:

⁹ “Ku ni mufana kola, lweyi anga ni svinkwa sva ntlhanu sva maxalana ni svihlampfana svimbirhi; kambe svingaringana mani ka vanhu votalisa xilesvi xana?”

¹⁰ Yesu aku: “Bzelani vanhu vatshamisa hansi.” Abzanyi abzitele ngopfu ndhawini yoleyo. Kutani vanhu vatshama hansi; loko vahlayiwa, avanuna avalava kuringana ntlhanu wa makhulu (5 000).

¹¹ Kutani Yesu ateka svinkwa; kuteloko akhensile, aphakela vanhu lava avatshamile; ateka ni svihlampfana, ayendzisa svosvo, hinkwavu vaja vaxurha.

¹² Loko vaxurhile, aku ka vajondzisiwa va yena: “Hlengeletani mahlanhla lawa masaleke, lesvaku kungacukumetiwi nchumu.”

¹³ Vamahlengeleta, kutani mahlanhla ya svinkwa sva ntlhanu sva maxalana, lawa masiyiweke hi lava vajeke, matata svirhundzu sva svimbirhi.

¹⁴ Vanhu lavavoneke hlori leri riyendliweke hi Yesu, avaku: “Hakunene, lweyi hi yena Muprofeta lweyi aafanela kuta misaveni.”

¹⁵ Kambe Yesu, hi kutiva lesvaku valava kuta vatamusindzisa lesvaku vamuyedla Hosi, atlhelela ntshaveni ali yexe.

Ta Yesu loko afamba henhla ka mati

¹⁶ Nimajambu, vajondzisiwa va yena vangirimela vaya tiveni.

¹⁷ Kutani vanghena botini, vatsemakanya tiva vaya Kapernawume; mpima-vayendzi, wuvafikela, Yesu angasivuya.

¹⁸ Nasvona tiva arisungula kukarhata, hikuva akuhunga moya lowukulu.

¹⁹ Loko vatlutile mpfuka woringana makume mambirhi ni ntlhanu, kumbe makume manharhu, vavona Yesu ali karhi afamba henhla ka mati, ali karhi ata kusuhi ni boti; kutani vachava.

²⁰ Kambe aku ka vona: “Hi mina, mingachaveni.”

²¹ Avalava kumunghenisa botini kambe hi nomo-lo boti rifika ribuweni laha avaya kona.

Ta vanhu loko valava Yesu

²² Loko bzixile, xitshungu lexikulu axisele ntsungeni wa tiva, xivona lesvaku akusele boti rin'we ntsena kolaho, ni lesvaku Yesu aanganghenanga botini leri vajondzisiwa va yena vangheneke ka rona, kambe vajondzisiwa avafambile vali voxe.

²³ Hambi svilitano, maboti man'wana lawa mahumaka Tiberiya matile matafika kusuhi ni laha vangajela kona svinkwa, loko Hosi yisvikatekisile.

²⁴ Kuteloko xitshungu xivonile lesvaku Yesu ni vajondzisiwa va yena avangahali kona kolaho, vanghena mabotini wolawo, vapelela Kapernawume, vali karhi valava Yesu.

²⁵ Kuteloko vamukumile ntsungeni wa tiva, vaku ka yena: “Mujondzisi, utile hi nkarhi muni laha ke?”

²⁶ Yesu avahlamula aku: “Nitiyisile hakunene nili ka n'wina: Manilava kungali hi lesvi mingavona svikombiso kambe hi lesvi mingaja svinkwa mixurha.

²⁷ Mingatirheli svakuja lesvibolaka, kambe tirhelani svakuja lesvingaboliki, svinga lesvinyikaka vutomi lebzingaheliki. Svakuja lesvi, mitanyikiwa hi N'wana-wa-Munhu, hikuva hi yena lweyi Xikwembu Tatana ximufungeke hi mfungu wa xona.”

²⁸ Vaku ka yena: “Xana hifanela kuyendla yini kutirha mintirho ya Xikwembu ke?”

²⁹ Yesu avahlamula aku: “Ntirho wa Xikwembu hi lowu: Hi lesvaku mipfumela ka lweyi ximurhumeke.”

³⁰ Kutani vaku ka yena: Loko svilitano, xana uyendla xikombiso xihi hixivona, lesvaku hitapfumela ka wena ke? Uyendla xikombiso xihi wena xana?

³¹ Vatatana va hina vajile mana mananga, hilaha kutsaliweke vaku: “‘Uvanyikile vusva lebzihumaka tilweni, vaja.’”

³² Yesu aku ka vona: “Nitiyisile, nili ka n'wina: Ahi Moxe lweyi aminyikeke vusva lebzihumaka tilweni, kambe Tatana wa mina hi yena lweyi aminyikeke vusva bza ntiyiso lebzi bzihumaka tilweni.

³³ Hikuva vusva bza Xikwembu hi lebzi bzixikaka hi le tilweni, lebzinyikaka misava vutomi.”

³⁴ Vaku ka yena: “Hosi hinyike vusva bzolebzo hi masiku hinkwawu.”

³⁵ Yesu aku ka vona: “Hi mina vusva bza vutomi; lweyi ataka ka mina, angakala angatwi ndlala, ni lweyi apfumelaka ka mina angakala angatwi torha ni siku ni rin'we.

³⁶ Kambe nimibzelile lesvaku, hambilesvi minivoneke, amipfumeli.

³⁷ Hinkwasvu lesvi Tatana aninyikaka svona, svitata ka mina; ni lweyi ataka ka mina, ningakala ningamucukumeti handle.

³⁸ Hikuva nixikile hi le tilweni, kungali kutayendla kurhandza ka mina, kambe kuyendla kurhandza ka lweyi anirhumeke.

³⁹ Kutani kurhandza ka lweyi anirhumeke, hi lesvaku ningalahlekeliwi hi lava aninyikeke vona, kambe nivapfuxa hi siku ra makumu.

⁴⁰ Tatana wa mina alava lesvaku mani na mani lweyi alangutaka N'wana, ava apfumela ka yena, ava ni vutomi lebzingaheliki, kutani mina nitamupfuxa hi siku ra makumu.”

⁴¹ Vayuda vangurangura hikolaho ka yena, hi lesvi angate: “Hi mina vusva lebzixikeke hi le tilweni.”

⁴² Kutani vaku: Xana lweyi ahi yena Yesu n'wana Yosefa, lweyi hitivaka tatana wa yena ni mamana wa yena ke? Hikolaho ka yini aku: “‘Nixikile hi le tilweni?’”

⁴³ Yesu avahlamula, aku: “Kungavi na kungurangura xikarhi ka n'wina.”

⁴⁴ Aku na munhu lweyi angataka ka mina, loko angatisiwanga ka mina hi Tatana lweyi anirhumeke, kutani mina nitamupfuxa hi siku ra makumu.

⁴⁵ Kutsaliwile tibukwini ta vaprofeta, vaku: “‘Hinkwavu vatajondzisiwa hi Xikwembu.’” Mani na mani lweyi atweke Tatana ni kujondza ka yena, wata ka mina.

⁴⁶ Asvivuli lesvaku ku ni munhu lweyi atshamaka avona Tatana, ahihim. Lweyi ahumaka ka Xikwembu, hi yena ntsena lweyi avoneke Tatana.

⁴⁷ “Nitiyisile hakunene nili ka n'wina: Lweyi apfumelaka, a ni vutomi lebzingaheliki.

⁴⁸ Mina hi mina vusva bza vutomi.

⁴⁹ Vatatana va n'wina vajile mana mananga, kambe vafile.

⁵⁰ Hi bzolebzi vusva lebzixikeke hi le tilweni lesvaku loko munhu aja bzona angakala angafi.

⁵¹ Hi mina vusva lebzi bzihanyaka lebzixikeke hi le tilweni; loko munhu aja vusva bzakona, atahanya hilaha kungaheliki, kutani vusva lebzi ningatabzinyika vanhu, i nyama ya mina; leyi ningatayinyika misava, lesvaku yihanya.”

⁵² Vayuda vaphikizana hi xivona, vaku: “Xana munhu lweyi angahinyikisa kuyini nyama ya yena lesvaku hiyija ke?”

⁵³ Yesu aku ka vona: “Nitiyisile hakunene, nili ka n'wina: Loko mingaji nyama ya N'wana-wa-Munhu, ni loko minganwi ngati ya yena, amingatava ni vutomi ka n'wina ha n'wexe.

⁵⁴ Lweyi ajaka nyama ya mina ni kunwa ngati ya mina a ni vutomi lebzingaheliki, kutani mina nitamupfuxa hi siku ra makumu.

⁵⁵ Hikuva nyama ya mina i svakuja hi ntiyiso yakona, ni ngati ya mina i svakunwa sva ntiyiso.

⁵⁶ Lweyi ajaka nyama ya mina, ni kunwa ngati ya mina, atshama ka mina, na mina nitshama ka yena.

⁵⁷ Tani hi lesvi Tatana lweyi ahanyaka anirhumeke, ni lesvi mina nihanyaka hikolaho ka Tatana, hi mukhuva wolowo na yena lweyi anijaka atahanya hikolaho ka mina.

⁵⁸ Lebzi hi bzona vusva lebzixikeke hi le tilweni; abzifani ni lebzi vatatana va n'wina vabzijeke, hikuva bzona abzivasivelanga kufa; lweyi ajaka vusva lebzi, atahanya hilaha kungaheliki.”

⁵⁹ Yesu avulile timhaka leti loko ali karhi ajondzisa sinagogeni, le Kapernawume.

Ta Vajondzisiwa lavotala loko vatshika Yesu

⁶⁰ Loko vajondzisiwa va yena lavotala vatwile lesvi, vaku: “Marito lawa manonon'hwa i mani lweyi angama twisisaka xana?”

⁶¹ Kambe Yesu aasvitiva hi le mbilwini lesvaku vajondzisiwa va yena vangurangura hi mhaka leyi, kutani aku ka vona: “Xana mhaka leyi yamukhunguvanyisa ke?

⁶² Amitavula yini loko amovona N'wana-wa-Munhu loko atlhantukela laha aali kona kusunguleni?

⁶³ Amoya hi wona lowuhanyisaka, nyama ayipfuni nchumu. Marito lawa nimibzelaka wona, i moya ni vutoni.

⁶⁴ Kambe van'wana xikarhi ka n'wina avapfumeli.” ( Hikuva Yesu asvitivile kahali kusunguleni, lesvaku i vamani lava vangatakala vangapfumeli, ni lesvaku i mani lweyi angatamuxenga.)

⁶⁵ Kutani atlhela aku: “Hikolaho nimibzeleke niku: Aku na munhu lweyi angataka ka mina, loko angapfumeleliwanga svona hi Tatana.”

⁶⁶ Kusukela nkarhini wolowo, vajondzisiwa va yena lavotala vatlhelela ndzhaku, vangahafambafambi na yena.

⁶⁷ Kutani hi loko Yesu, aku ka lava va khume ni vambirhi: “Xana na n'wina milava kufamba ke?

⁶⁸ Simoni Petrosi ahlamula, aku ka yena: Hosi, hingaya ka mani xana? Wena u ni marito ya vutomi lebzingaheliki.

⁶⁹ Kutani hina hi ni kupfumela ni kusvitiva lesvaku hi wena Muhlawuliwa wa Xikwembu.”

⁷⁰ Yesu avahlamula aku: “Xana ahi mina ningamihlawula, n'wina lava va khume ni vambirhi? Kambe mun'we wa n'wina i Diyavulosi.”

⁷¹ Aavula Yudasi, n'wana Simoni Iskariyota, hikuva hi yena lweyi aatamuxenga, hambilesvi aalimun'we wa lava va khume ni vambirhi.