Yohane 5 - Testamente Leyimpsha Xichangana

Ta Yesu loko ahanyisa muvabzi Betisayida

¹ Ndzhaku ka svosvo, nkhuvu wa Vayuda wuvakona, kutani Yesu atlhantukela Yerusalema.

² Le Yerusalema, hi tlhelo ra nyangwa ya tinyempfu, ku ni vuhlambelo leri hi Xiheberu vange i Betesda, rirhendzeliweke hi tinxaxa ta ntlhanu wa timhandze letikulu.

³ Vanhu lavotala ngopfu lavavabzaka, kufana ni lavafeke mahlo, ni svilima, ni lava vawomeke svirho, avatolovela kutshama kona [vayimela kupfindluxiwa ka mati,

⁴ hikuva, hi nkarhi wun'wana ni wun'wana antsumi ya Hosi ayixikela vuhlambelweni, yitapfindluxa mati; kutani lweyi arhangaka kunghena loko mati mahaku pfindluxiwa, aahanyisiwa, hambi ali ni mavabzi wahi ni wahi.]

⁵ Kona kolaho, akuli ni munhu lweyi aali ni malembe ya makume manharhu ni ntlhanu ni manharhu, na ali karhi avabza.

⁶ Loko Yesu amuvona na ayetlele kolaho, ni loko ativile lesvaku avabzile nkarhi lowoleha, aku ka yena: “Xana wasvilava kuhanyisiwa ke?”

⁷ Muvabzi amuhlamula, aku: “Hosi, a ni na munhu lweyi anga ni petaka vuhlambelweni, loko mati mahaku pfindluxiwa; kutani loko niku niya kona, mun'wana anirhangela, anghena.”

⁸ Yesu aku ka yena: “Pfuka, uteka sangu ra wena, ufamba.”

⁹ Hi nomo-lo, munhu lweyi ahanyisiwa, kutani ateka sangu ra yena, afamba. Siku rakona aali Savata.

¹⁰ Hikolaho Vayuda vaku ka lweyi ahanyisiweke: “Namunhla i siku ra Savata, kutani utlula Nawu loko urhwala sangu ra wena.”

¹¹ Avahlamula, aku: Lweyi anga ni hanyisa, hi yena lweyi angate ka mina: “‘Teka sangu ra wena, ufamba!’”

¹² Vamuvutisa, vaku: “I mani munhu wakona lweyi angete ka wena, riteke ufamba, xana?”

¹³ Lweyi ahanyisiweke angativanga lesvaku i mani, hikuva Yesu aasukile hikolaho ka xitshungu lexi axiri kona.

¹⁴ Ndzhaku ka svosvo Yesu ayamukuma Tempeleni, kutani aku ka yena: “Vona, uhanyisiwile. Loko ungalavi kuweliwa hi khombo lerikulu leritlulaka lerorhanga, tshika kujoha.”

¹⁵ Kutani munhu yelweyo ayabzela Vayuda lesvaku lweyi amuhanyiseke i Yesu.

¹⁶ Hikolaho ka svona, Vayuda vasungula kuxanisa Yesu, hikuva aayendlile svilo lesvi hi siku ra Savata.

¹⁷ Kambe Yesu avabzela aku: “Kufika svosvi, Tatana wa mina angasitshika kutirha, kutani na mina, tani hi yena, natirha.”

¹⁸ Hikolaho ka svosvo, Vayuda vahundzisa hi kunavela kumudlaya, hikuva aangatlulanga Nawu wa Savata ntsena, kambe aavulile lesvaku Xikwembu i Tatana wa yena wa ntiyiso, kutani atiyendla lweyi aringanaka ni Xikwembu.

¹⁹ Hi loko Yesu aku ka vona: “Nitiyisile nili ka n'wina. N'wana angakala angatisunguleli ayendla xilo hi yexe; ayendla ntsena lexi axivoneke xiyendliwa hi Tatana wa yena; hinkwasvu lesvi Tatana asviyendlaka, na yena N'wana wasviyendla.

²⁰ Hikuva Tatana arhandza N'wana; wamukomba hinkwasvu lesvi asviyendlaka, kutani atamukomba ni mintirho leyikulu leyitlulaka nileyi, kuyendlela lesvaku n'wina mitahlamala.

²¹ Kukotisa lesvi Tatana apfuxaka vafi, atlhela avanyika vutomi, svitano na yena N'wana, anyika vutomi ka lava arhandzaka kuvanyika bzona.

²² Nasvona Tatana angayavanyisi munhu ni mun'we, kambe anyikile N'wana ntirho hinkwawu woyavanyisa,

²³ lesvaku hinkwavu vava ni xichavu ka N'wana, kukotisa lesvi vanga ni xichavu ka Tatana. Mani na mani lweyi angaliki na xichavu ka N'wana anga na xichavu ni ka Tatana lweyi amurhumeke.

²⁴ “Nitiyisile nili ka n'wina lweyi ayingisaka rito ra mina, ava apfumela ka Lweyi anirhumeke, a ni vutomi lebzingaheliki; kutani angakala angayavanyisiwi, kambe ahumile kufeni ayanghena vuton'wini.

²⁵ Nitiyisile nili ka n'wina: Nkarhi wata, ni svosvi wutile, lowu vafi vangatatwa rito ra N'wana wa Xikwembu, kutani lava varitwaka vatahanya.

²⁶ Tani hi lesvi Tatana hi yexe anga xihlovo xa vutomi, hi mukhuva wolowo anyikile N'wana kuva xihlovo xa vutomi na yena.

²⁷ Nasvona, amunyikile matimba ya kuyavanyisa, hikuva i N'wana-wa-Munhu.

²⁸ Mingahlamaleni hi mhaka leyi, hikuva nkarhi wata lowu hinkwavu lavanga masirheni vangatatwa rito ra yena,

²⁹ kutani vatahuma. Lava vayendleke lesvinene vatapfuka vaya vuton'wini lebzingaheliki, lavayendleke lesvobiha vatapfuka vaya kuyavanyisiweni. ”

³⁰ “Ningakala ningatisunguleli niyendla xilo hinoxe; niyavanyisa hilaha nibzeliwaka hakona; hi kolaho, kuyavanyisa ka mina kululamile, hikuva anilavi kuyendla kurhandza ka mina, kambe kurhandza ka lweyi anirhumeke.”

³¹ “Loko nitivekela vumboni, vumboni bza mina abzi na ntiyiso.”

³² Akona mun'wana lweyi avekaka vumboni henhla ka mina, kutani nitiva lesvaku vumboni lebzi abzivekaka henhla ka mina bzi ni ntiyiso.

³³ Mirhumelile vanhu ka Yohani, kutani avekile vumboni henhla ka ntiyiso.

³⁴ Anitiseketeli hi vumboni bzohuma ka munhu, kambe nivula timhaka leti lesvaku mitaponisiwa.

³⁵ Yohani aali ngoti ya rivoni leyipfurhaka ni kuvangama; kutani n'wina misvikhensile, mitsakela hi nkarhinyana kuvonakala ka yena.

³⁶ Kambe vumboni lebzi ninga na bzona bzitlula bza Yohani, hikuva mintirho leyi Tatana aninyikeke lesvaku niyihetisisa, yinga yona mintirho leyi niyiyendlaka, hi yona leyivekaka vumboni henhla ka mina, bza lesvaku nirhumiwile hi Tatana.

³⁷ Nasvona, Tatana lweyi anirhumeke, na yena hi ntiyiso ya yena avekile vumboni henhla ka mina. Amisitwa rito ra yena ni siku ni rin'we, ni nghohe ya yena amisiyivona.

³⁸ Rito ra yena ali yakanga ka n'wina hikuva amipfumeli ka lweyi Tatana amurhumeke.

³⁹ Mikambisisa Matsalwa, hikuva miyanakanya lesvaku, ka wona, mitakuma vutomi lebzingaheliki; kasi hi wona lawa mavekaka vumboni henhla ka mina.

⁴⁰ Kutani amisvilavi kuta ka mina lesvaku mitakuma vutomi.

⁴¹ “Anitiseketeli hi kudzunisiwa loku kuhumaka ka vanhu;

⁴² kambe namitiva n'wina, ami na rirhandzu ka Xikwembu.

⁴³ Mina nitile hi vito ra Tatana wa mina, kambe aminiyamukeli; kasi loko mun'wana angata hi vito ra yena, n'wina mitamuyamukela.

⁴⁴ Mingapfumelisa kuyini ke, kasi mitsakela kudzunisana, mun'wana ka mun'wana mingalavi kudzunisiwa loku kuhumaka ntsena ka Xikwembu?

⁴⁵ Mingapimisi lesvaku mina nitamimangalela mahlweni ka Tatana; lweyi amimangalelaka i Moxe, yena lweyi mingaveka kutshemba ka n'wina ka yena.

⁴⁶ Loko amipfumelile ka Moxe, na mina amitanipfumela; hikuva yena atsalile mayelanu ha mina.

⁴⁷ Loko mingapfumeli matsalwa ya yena, mingapfumelisa kuyini marito ya mina xana?”