Yohane 4 - Testamente Leyimpsha Xichangana

Ta Yesu ni wansati wa Musamariya

¹ Kuteloko Hosi yitivile lesvaku vafarisi vatwile vanhu vaku: “Yesu atlula Yohani hi kukuma vajondzisiwa ni kukhuvula,”

² (hambilesvi aa ngali yena Yesu hi ntiyiso lweyi aakhuvula, kambe akukhuvula vajondzisiwa va yena).

³ Loko Yesu atwile svosvo, asuka Yudeya, atlhelela Galileya.

⁴ Kambe aafanela kutsemakanya hi le tikweni ra Samariya.

⁵ Kutani afika doropeni ra le Samariya, lomu avaku i Sikari, kusuhi ni nsimu leyi Yakobe aanyikile Yosefa, n'wana wa yena.

⁶ Xihlovo xa Yakobe axili kona kolaho. Lesvi Yesu aakarhalile hi kufamba, ayahumula ka xihlovo. Asvilava kuva nkarhi wa vuntlhanu na wun'we.

⁷ Kutani kutafika wansati wa Musamariya ata kukheni ka mati. Yesu aku ka yena: Ninyike mati ninwa.

⁸ Hikuva vajondzisiwa va yena avayile doropeni kuyaxava svakuja.

⁹ Wansati wa Musamariya aku ka yena: “Lesvi wena unga Muyuda, ukombelisa kuyini mati ka mina ninga wansati wa Musamariya xana?” ( Mhaka hi lesvaku Vayuda ni Vasamariya avanganwelani mati.)

¹⁰ Yesu amuhlamula aku: “Loko onge utivile kunyika ka Xikwembu, ni lweyi ange ka wena; ninyike mati ninwa, awutava ukombela ka yena, kutani aatava akunyikile mati lawa mahanyaka.”

¹¹ Wansati aku ka yena: “Hosi, awu na xikelelo, ni xihlovo xiyentile mati lamahanyaka, ungamakuma kwihi xana?

¹² Xana wena ulwenkulu ka Yakobe Tatana wa hina, lweyi ahinyikeke xihlovo lexi, lexi na yena anganwela ka xona, yena ni vana va yena ni svifuwo sva yena ke.”

¹³ Yesu amuhlamula aku: Mani na mani lweyi anwaka mati lawa, atatlhela atwa torha.

¹⁴ Kambe, mani na mani lweyi anwaka mati lawa ni munyikaka, angatatlhela atwa torha, hikuva mati lawa ningatamunyika wona, matayendla xihlovo xa mati lawa mapfelaka hi vutomi lebzingaheliki.

¹⁵ Wansati aku ka yena: “Hosi, ninyike mati wolawo, nitakala ningahatwi torha, ningahatlheli nita kola kukheni ka wona.”

¹⁶ Yesu aku ka yena: Famba, uyavita nuna wa wena, mita halenu.

¹⁷ Wansati amuhlamula aku: Ani na nuna. Yesu aku ka yena: Uhlamule khwatsi: Loko uku a ni na nuna;

¹⁸ hikuva uvile ni ntlhanu wa vavanuna, lweyi unga na yena svosvi, ahi nuna wa wena; kolaho utiyisile.

¹⁹ Wansati aku ka yena: Hosi, nivona, lesvaku umuprofeta.

²⁰ Vatatana va hina vagandzelile ntshaveni leyi, kambe n'wina mili: “Ndhawu leyi vanhu vafanelaka kugandzela ka yona, hi le Yerusalema.”

²¹ Yesu aku ka yena: “Wansati, pfumela ka mina. Nkarhi wata lowu mingatakala mingagandzeli Tatana ntshaveni leyi, hambi kuli Yerusalema.”

²² N'wina migandzela lexi mingaxitiviki; hina higandzela lexi hixitivaka; hikuva kuponisiwa kuhuma ka Vayuda.

²³ Kambe nkarhi wata, ni svosvi se wutile, lowu vagandzeli va ntiyiso vangatagandzela Tatana hi moya ni ntiyiso, hikuva Tatana alava vagandzeli lavotano.

²⁴ Xikwembu i Moya, kutani lava vaxigandzelaka, vafanela kuxigandzela hi moya ni ntiyiso.

²⁵ Wansati aku ka yena: “Nasvitiva lesvaku Mesiya ( lweyi avuliwaka Kriste), wata; siku ataka, atahitivisa svilo hinkwasvu.”

²⁶ Yesu aku ka yena: “Hi mina, mina nivulavulaka na wena.”

²⁷ Hikamanyana wolowo vajondzisiwa va yena vavuya, kutani vahlamala hi lesvi aavulavula ni wansati; hambi svilitano, akuvanga ni mun'we; lweyi angate: “Uvutisa yini? Kumbe: Ha yini uvulavula na yena xana?”

²⁸ Kutani wansati asiya khuwana ra yena, aya doropeni ayabzela vanhu van'wana aku:

²⁹ “Tanani mitavona wanuna lweyi anganibzela hinkwasvu lesvi nitshamaka nisviyendla; xana ahi yena Kriste ke?”

³⁰ Kutani vahuma doropeni vaya ka Yesu.

³¹ Nkarhi wolowo vajondzisiwa va yena vamukhongotela, vaku: “Mujondzisi, jana!”

³² Kambe yena aku ka vona: “Svakuja ni na svona, lesvi n'wina mingasvitiviki.”

³³ Vajondzisiwa vavutisana vaku: “Xana kungava ni munhu mun'wana lweyi amutiseleke svakuja ke?”

³⁴ Yesu aku ka vona: “Svakuja sva mina i kuyendla kurhandza ka lweyi anirhumeke, ni kuheta ntirho wa yena.”

³⁵ Xana amivuli lesvaku: “Kahasale tihweti ta mune, kutani kutata ntshovelo ke? Vonani, mina nili, tlakusani mahlo milanguta masimu mawupfile kutshoveliwa.”

³⁶ Lweyi atshovelaka akuma hakelo, kutani ahlengeleta timbewu atihlengeletela kukuma vutomi lebzingaheliki; lesvaku lweyi abzalaka ni lweyi atshovelaka vakota kutsaka svin'we.

³⁷ Hikuva i ntiyiso axihlayahlaya lexi xinge: “Mun'we hi lweyi abzalaka, mun'wana hi lweyi atshovelaka.

³⁸ Mina nimirhumile kutshovela lomu n'wina mingatirhangiki kona; van'wana vatirhile, kasi n'wina misvikuma hi kutshovela, sva nyuku wa vona.”

³⁹ Vasamariya lavotala va doropa leriya, vapfumela ka Yesu hikolaho ka lesvivuliweke hi wansati, loko avekile vumboni aku: “Anibzelile hinkwasvu lesvi nisviyendleke.”

⁴⁰ Hikolaho, loko vasamariya vafikile ka Yesu, vamurhamba lesvaku ayatshama na vona; kutani aheta masiku mambirhi na vona.

⁴¹ Kutani lavotala ngopfu vapfumela hikolaho ka marito ya yena;

⁴² hi loko vabzela lweyi wansati vaku: “Ahahapfumeli hikolaho ka rito ra wena; hikuva na hina hi mutwile, kutani hasvitiva lesvaku lweyi hi yena Kriste hakunene, muponisi wa misava.”

Ta Yesu loko ahanyisa n'wana wa ndhuna

⁴³ Ndzaku ka masiku lawa mambirhi, Yesu asuka lahaya, aya Galileya.

⁴⁴ Hikuva yena Yesu hi yexe aatiyisile loko ate: Muprofeta angakhensiwi tikweni ra yena.

⁴⁵ Kuteloko afika le Galileya, Vagalileya vamuyamukela, hikuva na vona avayile nkhubzini le Yerusamela, kutani avavonile hinkwasvu lesvi asviyendleke nkhubzeni wolowo.

⁴⁶ Hikambi ra vumbirhi Yesu atlhelelela Kana wa Galileya, laha angahundzula mati mayendla vhinyu kona. Akuli ni ndhuna ya Hosi le Kapernawume, leyi ayivabzeliwa hi n'wana wa yona wa jaha.

⁴⁷ Kuteloko ndhuna ya hosi yitwile lesvaku Yesu afikile Galileya na ata hi le Yudeya, ndhuna yita ka yena, yitamukombela lesvaku angirimela ayahanyisa n'wana wa yona, lweyi aalikusuhi ni kufa.

⁴⁸ Kutani Yesu aku ka yona: “Loko mingavoni svikombiso ni mahlori amupfumeli.”

⁴⁹ Ndhuna ya hosi yiku ka Yesu: “Hosi, wangangirimela, xijahana xa mina xingasifa.”

⁵⁰ Yesu aku ka yena: “Famba, n'wana wa wena wahanya.” Andhuna yipfumela lesvi Yesu ayibzeleke svona, kutani yifamba.

⁵¹ Loko ahangirimela kuya kaya, vatirhi va yena vahuma vamutlhangaveta, vamutivisa, vaku: “jaha ra wena rihanyile.”

⁵² avavutisa nkarhi lowu n'wana angasungula kuyampsa ha wona, kutani vaku ka yena: “Tolo hi nkarhi wa ntlhanu na mambirhi, afebra ka miri wa yena ariyimile.”

⁵³ Atwisisa atatana wa jaha, lesvaku nkarhi lowuya, hi wolowu wa wun'we ni lowu Yesu angate: An'wana wa wena wahanya; Apfumela ka yena, ni njangu wa yena hinkwawu.

⁵⁴ Yesu ayendlile hlori leri ra vumbirhi loko asuka Yudeya na aya Galileya.