Yohane 3 - Testamente Leyimpsha Xichangana

Ta Nikodema loko ayendzela Yesu.

¹ Akuli ni wanuna xikarhi ka vafarisi lweyi avaku i Nikodema, aali mun'we wa tindhuna ta vayuda.

² Siku rin'wana aya ka Yesu nivusiku, aku ka yena: “Mujondzisi, hasvitiva khwatsi lesvaku uyena mujondzisi lweyi ata ka hi ka Xikwembu; hikuva aku na munhu lweyi angayendlaka svikombiso lesvi usviyendlaka, loko Xikwembu xingali na yena.”

³ Yesu amuhlamula aku: “Nitiyisile nili ka wena, aku na munhu lweyi angatavona Mfumu wa Xikwembu, loko angatlhelanga apsaliwa ra vumbirhi.”

⁴ Nikodema aku ka yena: Loko munhu agugile, svingayendlisa kuyini kutlhela apsaliwa xana? Xana angasvikota kuvuyela khwirini ra mamana wa yena, atlhela apsaliwa ra vumbirhi ke?

⁵ Yesu amuhlamula aku: Kunene, nili ka wena: Loko munhu angapsaliwi hi mati ni Moya angakala angangheni kufumeni ka Xikwembu.

⁶ Lweyi angapsaliwa hi nyama i wa nyama, lweyi angapsaliwa hi Moya i Moya. Nyama yipsala sva nyama; kambe Moya wupsala sva moya.

⁷ Ungahlamali loko nite ka wena, svafanela lesvaku utlhela upsaliwa ka vumbirhi.

⁸ Moya wahungela lomu wurhandzaka kona, kutani utwa mpfumawulu wa wona, kambe awutivi lomu utaka hi kona ni lomu uyaka kona. Svitano ni ka hinkwavu lavapsaliwaka hi Moya.

⁹ Nikodema amuhlamula aku: Svingayendzisa kuyini svosvo.

¹⁰ Yesu amuhlamula aku: Wena uyena mujondzisi wa Israyele, kambe awusvitivi lesvi xana?

¹¹ Nitiyisile nili ka wena, hina hivulavula lesvi hisvitivaka nasvona hiveka vumboni bza lesvi hisvivoneke; kambe amipfumeli vumboni bza hina.

¹² Lesvi mingapfumeliki loko nimibzela hi sva laha misaveni, xana mitapfumelisa kuyini loko nimibzela hi sva le matilweni xana?

¹³ Aku na munhu lweyi atshamaka atlhantukela matilweni, loko angali lweyi axikeke hi le matilweni, yena N'wana-wa-Munhu.

¹⁴ Kufana ni lesvi Moxe atshamaka ahayeka nyoka mananga, N'wana-wa-Munhu na yena afanela kuhayekiwa hi mukhuva wolowo.

¹⁵ Lesvaku mani na mani lweyi apfumelaka ka yena, angatshuki alova, kambe ava ni vutomi lebzingaheliki.

¹⁶ Hikuva Xikwembu xirhandzile misava, lakakuva, xinyikile N'wana wa xona wa mun'we, lesvaku hinkwavu lava vapfumelaka ka yena vangalovi, kambe vava ni vutomi lebzingaheliki.

¹⁷ Xikwembu axirhumelanga N'wana wa xona misaveni kutayavanyisa misava, kambe akuli kuyendlela lesvaku misava yitaponisiwa ha yena.

¹⁸ Lweyi apfumelaka ka N'wana angayavanyisiwi, kambe lweyi angapfumeliki ayavanyisiwile ni svosvi, hikuva angapfumelanga ka N'wana-wa-Xikwembu lweyi anga mun'we ka xona.

¹⁹ Kuyavanyisiwa hi loku: Akuvonakala kutile misaveni, kambe vanhu varhandzile ngopfu munyama kutlula kuvonakala, hikuva mitirho ya vona ayibihile.

²⁰ Hikuva, mani na mani lweyi ayendlaka lesvobiha avenga kuvonakala, hi kolaho angati kuvonakaleni lesvaku mitirho ya yena yingati kuvonakaleni.

²¹ Kambe lweyi ahanyaka ntiyisweni, wata kuvonakaleni, lesvaku mintirho ya yena mitavoneka yili leyiyendleliweke Xikwembu.

Vumboni bzin'wana bza Yohani Mukhuvuli

²² Ndzaku ka svosvo, Yesu aya ni vajondzisiwa va yena tikweni ra Yudeya; kutani atshama kona na ali karhi akhuvula.

²³ Yohani na yena aakhuvula le Enoni, kusuhi na Salime, hikuva akuli ni mati lawa yotala kona; ni vanhu avayakona lesvaku vakukhuvuliwa.

²⁴ Hikuva Yohani aangasipfaleliwa jele.

²⁵ Kutani kuhumelela kukanetana xikarhi ka vajondzisiwa va Yohani ni Muyuda mun'we mayelanu ni mhaka ya kutibasisa.

²⁶ Hi loko vaya ka Yohani, vaku ka yena: “Mujondzisi, munhu lweyi awuli na yena ntlhatuku wa Yordani, lweyi ungavula vumboni henhla ka yena, wakhuvula na yena, kutani hinkwavu vakhirimana vaya ka yena.”

²⁷ Yohani, ahlamula aku: Amunhu angakala angakumi xanchumu loko anganyikiwanga xona hi le Tilweni.

²⁸ N'wina hi n'wexe mitimboni ta mina lesvaku nite; 'Ahi mina Mesiya, kambe nirhumiwile kumilulamisela ndlela.

²⁹ Lweyi anga ni mutekiwa i muteki; kambe munghanu wa muteki, hi lweyi ayimaka amuyingisa, atsaka hi kutsaka lokukulu, loko atwa rito ra muteki. Xilesvo, kutsaka ka mina loku hi loku kuhetisekeke.

³⁰ Yena afanela kuya akula mina niya nitsongahala.

³¹ Lweyi ata ka hi le henhla alehenhla ka hinkwavu; lweyi ahumaka misaveni i wa misava, kutani avulavula hi sva misava; lweyi ahumaka tilweni, alehenhla ka hinkwavu.

³² Kutani aveka vumboni bza lesvi asvivoneke ni kusvitwa; kambe aku na munhu lweyi apfumelaka vumboni bza yene.

³³ Lweyi apfumelaka vumboni bza yena, atiyisile lesvaku Xikwembu i ntiyiso.

³⁴ Lweyi arhumiwaka hi Xikwembu, avula marito ya Xikwembu, hikuva Xikwembu axipimi loko xinyika Moya wa xona.

³⁵ Tatana arhandza N'wana, hi kolaho asvilo hinkwasvu svinyikiwile mavokweni ya yena.

³⁶ Lweyi apfumelaka ka N'wana a ni vutomi lebzingaheliki; kambe lweyi angapfumeliki ka N'wana angakala angabzivoni vutomi; kambe avukarhi bza Xikwembu bzitshama ka yena.