Yohane 21 - Testamente Leyimpsha Xichangana

Ta Yesu loko atikomba ka vajondzisiwa va yena tiveni ra Tiberiya

¹ Ndzaku ka svilo lesvi hinkwasvu, Yesu atlhela atikomba ka vajondzisiwa va yena kusuhi ni tiva ra Tiberiya; atikombile hi ndlela leyi:

² Simoni Petrosi, na Tomasi lweyi vango i “hahla”, na Nataniele wa Kana tikweni ra Galileya, ni vana va Zebedeya, ni vajondzisiwa vambirhi van'wana va Yesu, avali svin'we.

³ Simoni Petrosi aku ka vona: “Niyarhiya tihlampfi.” Vaku ka yena: “Na hina hifamba na wena.” Kutani vasuka, vayanghena botini ra vona, kambe avaphasanga nchumu vusiku lebzo.

⁴ Loko risungula kuxa, Yesu aayimile ribuweni, kambe vajondzisiwa avativanga lesvaku i Yesu.

⁵ Kutani Yesu aku ka vona: “Vana vanga, miphasile xana?” Vamuhlamula, vaku: “Ahihim.”

⁶ Aku ka vona: “Hoxelani rikoka hi tlhelo ra xinene ra boti, mitaphasa.” Hi loko varihoxa, kutani vatsandzeka ni kurikoka hikolaho ka kutala ka tihlampfi.

⁷ Kutani mujondzisiwa lweyi Yesu aamurhandza aku ka Petrosi: “I Hosi!” Loko Simoni atwile lesvaku i Hosi, ayambala xiyambalu xa yena, hikuva aaxihlivilile, kutani apela tiveni.

⁸ Kambe vajondzisiwa lava van'wana vata hi boti ra vona, vakoka rikoka leri aritele hi tihlampfi, hikuva avangali kule ni ribuwa; mpfhuka wakona awulava kuringana madzana mambirhi ya mametru (200 m).

⁹ Loko vahumile vata ribuweni, vavona ndzilo wa makhala, ni tihlampfi letitlhantekiweke henhla ka wona, ni xinkwa.

¹⁰ Yesu aku ka vona: “Pambulani tihlampfi tin'wana ka leti mahakuti phasaka svosvi, mitisa halenu.”

¹¹ Simoni Petrosi anghena botini, akokela rikoka ribuweni, na ritele hi tihlampfi letikulu. Atili dzana ni ntlhanu wa makume na manharhu (153) wa tona. Kambe hambilesvi atitele ngopfu, rikoka alihandzukanga.

¹² Yesu aku ka vona: “Tanani, mitafihlula.” Kambe akuvanga ni mujondzisiwa ni mun'we lweyi angamutiyela kumuvutisa aku: “U mani?”, hikuva vasvitivile lesvaku hi yena Hosi.

¹³ Kutani Yesu ata, ateka xinkwa avanyika; ayendlisa xisvosvo ni tihlampfi.

¹⁴ Kutikomba loku ka Yesu ka vajondzisiwa va yena, akuli ka vunharhu, ndzhaku ka loko apfukile kufeni.

Risa tinyempfu ta mina!

¹⁵ Kuteloko vafihlulile, Yesu aku ka Simoni Petrosi: “Simoni, n'wana Yohani, xana wanirhandza kutlula lava hinkwavu ke?” Aku ka yena: “Ina, Hosi, wa svitiva lesvaku nakurhandza.” Yesu aku ka yena: “Risa svinyempfana sva mina.”

¹⁶ Atlhela ra vumbirhi aku ka yena: “Simoni, n'wana Yohani, xana wanirhandza ke?” Aku ka yena: “Ina, Hosi, wa svitiva lesvaku nakurhandza.” Yesu aku ka yena: “Hlayisa tinyempfu ta mina.”

¹⁷ Atlhela ra vunharhu aku ka yena: “Simoni, n'wana Yohani, xana wanirhandza ke?” Petrosi akhomiwa hi gome, hi mhaka ya lesvi amuvutiseke ra vunharhu aku: “Xana wanirhandza ke?” Kutani aku ka yena: “Hosi, utiva hinkwasvu, wa svitiva lesvaku nakurhandza.” Yesu aku ka Petrosi: “Risa tinyempfu ta mina.

¹⁸ Nitiyisisile hakunene nili ka wena: Nkarhini lowu awahali lweyi mumpsha, awuyambala hi wexe, uya lomu ulavaka kuya kona; kambe loko utava ugugile, utatsandzavuta mavoko ya wena, kutani mun'wana atakuyambexa, akuyisa lomu ungalaviki kuya kona.”

¹⁹ Aavulisa svosvo hi kuringanisa rifu leri Petrosi angatadzunisa Xikwembu ha rona. Loko Yesu avulile svosvo, aku ka yena: “Nilandze!”

Ta mujondzisiwa lweyi arhandziwaka

²⁰ Petrosi ahundzukula, kutani avona mujondzisiwa lweyi aarhandziwa hi Yesu na ali karhi avalandza. (Aali lweyi atshamaka akhigela ka Yesu, loko vali kujeni, ahlevetela aku: “Hosi, i mani lweyi angatakuxenga xana?”)

²¹ Loko Petrosi amuvonile, aku ka Yesu: “Hosi, svitakuyini hi lweyi ke?”

²² Yesu aku ka yena: “Loko nilava lesvaku atshama nikondza nivuya, svingava yini ka wena ke? Wena, nilandze!”

²³ Hikolaho rito leri angalivula rihangalaka xikarhi ka vamakwavu lesvaku mujondzisiwa lwiya, angakala angafi. Kasi Yesu angamubzelanga lesvaku angakala angafi; kambe ate: “Loko nilava lesvaku atshama nikondza nivuya, svingava yini ka wena ke?”

²⁴ Mujondzisi lweyi, hi yena lweyi avulaka vumboni bza timhaka leti, kutani atitsalile. Hasvitiva lesvaku vumboni bza yena bzitiyile.

²⁵ Kahali ni timhaka tin'wana letotala leti Yesu angatiyendla; loko atiyotsaliwa ha yin'we ni yin'we, anitshembi lesvaku misava hinkwayu ayitaringana tibuku leti atitatsaliwa.