Yohane 20 - Testamente Leyimpsha Xichangana

Ta kupfuka ka Yesu kufeni

¹ Ni mpundzu wa siku ra Sonto, loko ka haphumile, Mariya wa Magadala aya sirheni, kutani ayakuma lesvaku ribze risusiwile non'weni wa sirha.

² Hi loko atsutsuma, aya ka Simoni Petrosi, ni ka mujondzisiwa lweyi mun'wana lweyi aarhandziwa hi Yesu, kutani aku ka vona: “Vasusile Hosi sirheni, kutani ahitivi lomu vangamulata kona.”

³ Hi loko Petrosi ni mujondzisiwa lweyi mun'wana vasuka vakongoma sirheni.

⁴ Vatsutsuma svin'we ha vambirhi; kambe mujondzisiwa lweyi mun'wana asiya Petrosi hi kutsutsuma, arhanga ayafika sirheni.

⁵ Akorhama ahlometela, kutani avona malasoro na mali hansi; kambe anganghenanga.

⁶ Simoni Petrosi lweyi aasale ndzhaku, na yena atafika, kutani anghena sirheni, avona malasoro na mali hansi;

⁷ kambe faduku leri aritsondzihelile nhloko ya Yesu, aringali svin'we ni malasoro kambe alipetsiwile, rivekiwa hi tlhelo.

⁸ Ndzhaku ka svosvo mujondzisiwa lweyi mun'wana, lweyi angarhanga afika sirheni, na yena anghena asvivona, kutani apfumela.

⁹ (Hikuva avangasitwisisa Tsalwa lerivulaka lesvaku Yesu aafanele kupfuka kufeni.)

¹⁰ Hi loko vajondzisiwa vatlhelela makaya.

Ta Yesu loko atikomba ka Mariya wa Magadala

¹¹ Mariya aayimile kusuhi ni sirha handle, arila. Loko akorhama kuhlometela sirheni na ali karhi arila,

¹² avona tintsumi timbirhi letiyambaleke svobasa, na titshamili, yin'we hi le tinhlokweni, yin'wana hi le milengeni, laha ntsumbu wa Yesu awulatiwile kona.

¹³ Tiku ka yena: “Wansati, urilela yini?” Aku ka tona: “Vasusile Hosi ya mina, kutani anitivi lomu vayilateke kona.”

¹⁴ Loko avulise svosvo, ahundzuluka, kutani avona Yesu na ayimile, kambe angasvitivanga lesvaku i Yesu.

¹⁵ Yesu aku ka yena: “Wansati, urilele yini? Ulava mani xana?” Yena, hi kuyehleketa lesvaku i mutirhi wa laha ntangeni, aku ka yena: “Hosi yanga, loko umususile, nibzele laha umulateke kona, kutani nitaya, niyamuteka.”

¹⁶ Yesu aku ka yena: “Mariya!” Yena ahundzukula, aku ka Yesu, hi ririmi ra Xiheberu: “Rabuni!” (Hi lesvaku “Mujondzisi”).

¹⁷ Yesu aku ka yena: “Unganikhomi, hikuva anisitlhantukela ka Tatana; kambe yana ka vamakwerhu, uyavativisa lesvaku nitlhantukela ka Tatana wa mina, anga Tatana wa n'wina, ka Xikwembu xa mina, xinga Xikwembu xa n'wina.”

¹⁸ Mariya wa Magadala ayabzela vajondzisiwa lesvaku avonile Hosi, ni lesvaku yimubzelile timhaka teto.

Ta Yesu Loko atikomba ka vajondzisiwa

¹⁹ Nimajambu ya siku lero ra Sonto, svipfalu sva laha vajondzisiwa avahlengeletanile kona asvipfaliwile, hikolaho ka kuchava Vayuda. Yesu afika, ayima xikarhi ka vona, kutani aku ka vona: “Kurhula akuve na n'wina!”

²⁰ Loko avulise svosvo, avakomba sviyandla sva yena ni rheve ra yena. Vajondzisiwa vatsaka ngopfu loko vavona Hosi.

²¹ Yesu atlhela aku ka vona: “Kurhula akuve na n'wina! Tani hi lesvi Tatana anirhumeke, na mina namirhuma.”

²² Loko avulise svosvo, avahuhutela, aku: “Yamukelani Moya Lowokwetsima.

²³ Loko mirivalela vanhu svijoho sva vona, vatarivaleliwa hakunene; loko mingarivaleli vanhu svijoho sva vona, avangarivaleliwi.”

Ta kukanakana ka Tomasi

²⁴ Tomasi, lweyi vange i “Hahla”, mun'we wa lava va khume ni vambirhi, aangali na vona loko Yesu atile.

²⁵ Kutani vajondzisiwa lava van'wana vaku ka yena: “Hivonile Hosi.” Yena aku ka vona: “Loko ningavoni timbanga ta svipikirhi sviyandleni sva yena, ni loko ninganghenisi ritiho ra mina timbangeni ta svipikirhi, ninghenisa ni xiyandla rheveni ra yena, ningakala ningapfumeli.”

²⁶ Loko kuhundzile masiku ya ntlhanu ni manharhu, vajondzisiwa vatlhela vava kona ndlwini. Tomasi na yena aali na vona. Yesu ata, svipfalu asvipfaliwile, ayima xikarhi ka vona, aku: “Kurhula akuve na n'wina!”

²⁷ Kutani aku ka Tomasi: “Tisa ritiho ra wena laha, ulanguta ni sviyandla sva mina; tshambuluta xiyandla xa wena, uxinghenisa rheveni ra mina; ungahakanakani, kambe pfumela!”

²⁸ Tomasi amuhlamula, aku: “Hosi yanga ni Xikwembu xanga!”

²⁹ Yesu aku ka yena: “Xana upfumela hi lesvi unganivona ke? Vakatekile lava vapfumelaka, hambi loko vangavonanga.”

Nkongometo wa buku leyi

³⁰ Yesu ayendlile mahlori man'wana lawa yotala mahlweni ka vajondzisiwa va yena, lawa amatsaliwanga bukwini leyi.

³¹ Kambe timhaka leti titsaleliwile n'wina, lesvaku mitakota kupfumela lesvaku Yesu i Kriste, N'wana wa Xikwembu, ni lesvaku, hi mhaka ya kupfumela, miva ni vutomi vitweni ra yena.