Yohane 2 - Testamente Leyimpsha Xichangana

Ta nkhuvu wa Vukati le Kana

¹ Hi siku ra vunharhu, kuva ni nkhuvu wa vukati muntini wa Kana Galileya; kutani mamana wa Yesu aali kona.

² Yesu ni vajondzisiwa va yena, avarhambiwile na vona nkhubzeni wa vukati.

³ Kuteloko vhinyu rihelile, mamana wa Yesu aku ka yena: “Aku na vhinyu.”

⁴ Yesu aku ka yena: “Wansati, mhaka ya mina na wena hi yihi xana? Nkarhi wa mina awusifika.”

⁵ Mamana wa yena aku ka vatirhi, “Yendlani hinkwasvu lesvi angatamibzela svona.”

⁶ Tani hi lesvi Vayuda vatolovelaka kuhlamba vatibasisa vangasija, makhuwani ya ribze ya ntlhanu na rin'we amatikarhetiwile kolaho, rin'wana ni rin'wana alitatiwa hi makhuwana, mambirhi kumbe manharhu.

⁷ Yesu aku ka vona: “Tatani makhuwana lawa hi mati.” Kutani vamatata makhapa.

⁸ Aku ka vona: “Svosvi khanani, muyisa ka murhangeli wa nkhuvu.” Kutani vayisa.

⁹ Kuteloko murhangeli wa nkhuvu aringile mati lawa mahundzukeke vhinyu; ( kambe angativi laha rihumaka kona, asvitiviwa ntsena hi vatirhi lava avakile mati). Kutani murhangeli wa nkhuvu avitana muteki aku ka yena:

¹⁰ “Vanhu hinkwavu vatolovela kuhumesa vhinyu leri ronandziha kusunguleni kutani loko kunwiwile svinene, vahumesa leroka ringanandzihi ngopfu; kambe wena uvekile vhinyu leronandziha kufika ni svosvi!”

¹¹ Yesu asungulisa xisvosvo amahlori ya yena Kana wa Galileya, akombisa kukwetsima ka yena; kutani vajondzisiwa va yena vapfumela ka yena.

¹² Ndzhaku ka svona angirimela Kapernawume, yena ni mamana wa yena, ni vamakwavu ni vajondzisiwa va yena, vatshama kona masiku matsongo.

Yesu abasisa Tempele

¹³ Nkhuvu wa Paska ya Vayuda awuli kusuhi, kutani Yesu atlhantukela Yerusalema.

¹⁴ Le Tempeleni, akuma lava vaxavisaka tihomu ni tinyempfu, ni svituvana ni lavancincisaka timale na vatshamile.

¹⁵ Kuteloko ayendlile xisepu xa tingoti, avahlongola hinkwavu vahuma Tempeleni, na tona tihomu ni tinyempfu, ahangalasa ni male ya vancincisi awisetela ni mimeza ya vona.

¹⁶ Abzela lava avaxavisa svituvana aku: “Susani svilo lesvi laha, mingateki yindlo ya Tatana wa mina miyiyendla ya kuxavisela ka yona.”

¹⁷ Kutani vajondzisiwa va yena vatsundzuka lesvitsaliweke: “Kuhisekela yindlo ya wena kutanija.”

¹⁸ Kutani Vayuda vamuhlamula vaku ka yena; ungahikomba xikombiso xihi xa lesvaku u ni matimba yoyendla lesvi xana?

¹⁹ Yesu avahlamula aku: “Hahlulani Tempele leyi, kutani mina nitayipfuxa hi masiku manharhu.”

²⁰ Hi loko Vayuda vamuhlamula vaku: “Tempele leyi yitekile malembe ya mune wa makume ni ntlhanu ni rin'we kuyiyaka, kutani wena uli utayipfuxa hi masiku manharhu xana?”

²¹ Kambe yena aavula tempele ya miri wa yena.

²² Hikolaho loko apfukile kufeni, vajondzisiwa va yena vatsundzuka lesvaku mhaka leyi atshama ayivula; kutani vapfumela Matsalwa ni ka rito leri Yesu arivuleke.

²³ Loko ali Yerusalema nkhubzeni wa Paska, vanhu lavotala vapfumela ka yena, hi kuvona mahlori lawa amayendlaka.

²⁴ Kambe Yesu angavatshembanga, hikuva aavativa hinkwavu.

²⁵ Hikuva aangavileli lesvaku munhu aveka vumboni bza mun'wana, hikuva yena aasvitiva lesvi svingakona ka munhu.