Yohane 19 - Testamente Leyimpsha Xichangana

¹ Kutani Pilato ateka Yesu, amunyiketa lesvaku vamuba.

² Kutani masochwa maluka hari ya mintwa, mayitlhanteka nhlokweni ya yena, mamuyambexa xiyambalu xovangama xa xivunguvungu;

³ matshinela kusuhi na yena maku: “Xeweni, Hosi ya Vayuda!” Kutani mamuba hi timpama.

⁴ Pilato atlhela ahuma, aku ka Vayuda: “Vonani, nimihumesela yena, mitativa lesvaku anikumi nandzu niwun'we ka yena”

⁵ Yesu ahuma, na atlhantekiwile hari ya mintwa nhlokweni, na ayambalile xiyambalu xovangama xa xivunguvungu. Pilato aku ka vona: “Vonani, hi yelweyi munhu wa n'wina!”

⁶ Loko Vaprista lavakulu ni valaveleli vamuvona, vahuwelela, vaku: “Muvambe! Muvambe!” Pilato aku ka vona: “Mutekeni, n'wina hi n'wexe, miyamuvamba; hikuva mina anikumi nandzu ka yena.”

⁷ Vayuda vamuhlamula, vaku: “Hi ni nawu, kutani hi nawu wa hina afanele kufa, hikuva atiyendlile N'wana wa Xikwembu.”

⁸ Loko Pilato atwa mhaka leyi, achava ngopfu,

⁹ atlhelela ndlwini ya vuhosi, aku ka Yesu: “Uhuma kwihi xana?” Yesu angamuhlamuli.

¹⁰ Pilato aku ka yena: “Xana wayala kuvulavula na mina ke? Xana awusvitivi lesvaku ni ni matimba ya kukutshunxa, ni matimba ya kukuvamba ke?”

¹¹ Yesu ahlamula, aku: “Awungatava ni matimba henhla ka mina nikutsongo, loko awungamanyikiwanga hi le henhla. Hikolaho, lweyi anga ni nyiketa ka wena, aninandzu lowukulu ngopfu.”

¹² Loko Pilato atwa mhaka leyi, alava ndlela yomutshunxa; kambe Vayuda vahuwelela, vaku: “Loko utshunxa munhu lweyi, awumunghana wa hosi Khezari; mani na mani lweyi atiyendlaka hosi, alwa na Khezari.”

¹³ Loko Pilato atwa marito wolawo, ahumesa Yesu handle, kutani atshama xitulwini xa kuyavanyisa, ndhawini leyi vange i “Xiyandlala hi maribze” (hi ririmi ra Xiheberu i “Gavata”).

¹⁴ Arili siku ra kulungisela Paska, kutani awulava kuva nkarhi wa vuntlhanu na wun'we. Hi loko Pilato aku ka Vayuda: “Vonani, hi leyi Hosi ya n'wina!”

¹⁵ Vona vahuwelela, vaku: “Mususe! Mususe! Muvambe!” Pilato aku ka vona: “Xana nitavamba hosi ya n'wina ke?” Vaprista lavakulu vahlamula, vaku: “Ahi na hosi loko angali Khezari ntsena.”

¹⁶ Hi loko Pilato avanyiketa Yesu, lesvaku ayavambiwa. Vateka Yesu,

Ta kuvambiwa ka Yesu

¹⁷ kutani ahuma na atirwalele xihambanu xa yena, aya ndhawini leyi avaku i “Ndhawu ya Pala”, leyi hi Xiheberu vange i “Gologota”.

¹⁸ Vamuvamba kolaho, na ali ni van'wana vambirhi, mun'we hi tlhelo rin'wana, mun'wana hi tlhelo lerin'wana, Yesu ali xikarhi.

¹⁹ Pilato atsala ni papela ra xitiviso, arinameka henhla ka xihambanu. Lesvi asvitsaliwile hi lesvi: “Yesu wa Nazareta, Hosi ya Vayuda.”

²⁰ Vayuda lavotala vajondza papela lero, hikuva ndhawu leyi Yesu angavambiwela ka yona, ayili kusuhi ni doropa; na svona, papela aritsaliwile hi Xiheberu, ni Xilatini, ni Xigirika.

²¹ Hikolaho Vaprista lavakulu va Vayuda vaku ka Pilato: “Ungatsali svaku: ‘Hosi ya Vayuda’, kambe tsala uku: ‘Hi yena lweyi angate: Ni Hosi ya Vayuda’.”

²² Pilato ahlamula, aku: “Lexi ningaxitsala, nixitsalile!”

²³ Loko masochwa mavambile Yesu, vateka sviyambalu sva yena, vasviyavanyisa hi mambutsa ya mune, vaphakana ha wona; vateka ni nkhancu, kambe nkhancu wakona awungarhungiwanga, awulukiwile wuli nguvu yin'we kusukela henhla kufikela hansi.

²⁴ Kutani vabzelana, vaku: “Hingawuhandzuleni, kambe ahihlahluveni hi tinhlolo, hitativa lesvaku wutava wa mani.” Lesvi akuli kuhetisa Tsalwa leringe: “Vayavelane sviyambalu sva mina, vasvihlahluva hi nhlolo.” Hi lesvi masochwa mangayendla svona.

²⁵ Nkarhini wolowo, mamana wa Yesu, ni makwavu Mariya, nsati wa Klopasi, na Mariya wa Magadala, avayimile kusuhi ni xihambanu.

²⁶ Yesu avona mamana wa yena, avona ni mujondzisiwa lweyi aamurhandza na ayimile kusuhi na yena, kutani aku ka mamana wa yena: “Wansati, vona, n'wana wa wena hi lweyi!”

²⁷ Kutani aku ka mujondzisiwa: “Vona, mamana wa wena hi lweyi!” Kusukela nkarhi wolowo, mujondzisiwa lweyi amuyamukela, amurhurhela kaya ka yena.

Ta kufa ka Yesu

²⁸ Yesu, hi kutiva lesvaku svilo hinkwasvu svihetisekile, aku: “Ni ni torha”, kuli kuhetisa Matsalwa.

²⁹ Mbita leyi ayitele hi ntsuvi ayivekiwile kolaho, kutani vapeta xiponjhi xitala hi ntsuvi, vaxitlhoma ka rihlanga ra nsinya wa hisopa, vayisa non'weni wa yena.

³⁰ Loko Yesu anwile, akuma lesvaku i ntsuvi, aku: “Svihetisekile.” Kutani akorhamisa nhloko, afa.

Ta loko vatlhava rheve ra Yesu

³¹ Arili siku leri rhangelaka Savata. Hikolaho, Vayuda vakombela Pilato lesvaku milenge ya lava vavambiweke yitshoviwa, ni lesvaku mintsumbu yihawuliwa; lesvi akuli kuyendlela lesvaku yingasali xihambanwini hi Savata, hikuva siku rakona ra Savata arili lerikulu.

³² Hi loko masochwa mata, matshova milenge ya lweyi worhanga ni lweyi mun'wana wa vumbirhi.

³³ Kutani vata ka Yesu, kambe loko vavona lesvaku afile, avamutshovanga milenge.

³⁴ hambi svilitano, mun'we wa masochwa amutlhava rheve hi tlhari, kutani hi nomo-lo kuhuma ngati ni mati.

³⁵ Lweyi asvivoneke, avula vumboni lesvaku na n'wina mitakota kupfumela. Vumboni bza yena bzitiyile, kutani wasvitiva lesvaku avula ntiyiso.

³⁶ Hakunene timhaka leti tihumelelile lesvaku Tsalwa rihetiseka, leringe: “Aku na rhambu ni rin'we ra yena leringatatshoviwa.”

³⁷ Nakambe Tsalwa rin'wana rili: “Vatahlalela lweyi vamutlhaveke.”

Ta kulahliwa ka Yesu

³⁸ Ndzaku ka svosvo, Yosefa wa Arimatiya akombela ka Pilato akumpfumeleliwa kuyahawula ntsumbu wa Yesu. Yosefa lweyi aali mujondzisiwa wa Yesu, kambe xihundleni, hi kuchava Vayuda. Kutani Pilato amupfumelela. Hi loko ayahawula ntsumbu wa Yesu.

³⁹ Nikodema, lweyi atshamaka ata nivusiku ka Yesu, na yena afika atisa mafurha ya mira lawa mapatsanyesiweke ni mhangana, lawa malavaka kuringana makume manharhu ya makilu (30 kg) kutika ka wona.

⁴⁰ Kutani vateka ntsumbu wa Yesu, vawuphutsela hi malasoro lawa amacheliwile mafurha yonun'hwela, hi mukhuva lowu Vayuda valahlaka ha wona.

⁴¹ Akuli ni ntanga ndhawini leyi angavambiwa ka yona, kutani laha ntangeni akuli ni sirha lerimpsha, leri akungasilahliwa munhu ka rona.

⁴² Valata Yesu kona, hikolaho ka lesvi Vayuda avatilungisela Savata, hikuva sirha arili kusuhi.