Yohane 18 - Testamente Leyimpsha Xichangana

Ta kukhomiwa ka Yesu

¹ Loko Yesu avulile marito lawa, ahuma ni vajondzisiwa va yena, apelela xinkovanini xa xinambzana xa Kedroni. Akuli ni ntanga kolaho, kutani ayanghena kona ni vajondzisiwa va yena.

² Yudasi muxengi na yena aativa ndhawu liya, hikuva Yesu aatolovela kuhlengeletana ni vajondzisiwa va yena kona.

³ Yudasi ateka ntlawa wa masochwa, ni valaveleli lava varhumiweke hi Vaprista lavakulu ni Vafarisi, vata ni tivoni ni svisosvani ni matlhari.

⁴ Yesu, hi kutiva hinkwasvu lesvi svingatamuhumelela, ahuma aya ka vona, aku: “Milava mani xana?”

⁵ Vamuhlamula, vaku: “Yesu wa Nazareta.” Yesu aku ka vona: “Hi mina lweyi!” Yudasi muxengi, na yena aayimile na vona kolaho.

⁶ Loko Yesu ate ka vona: “Hi mina lweyi!” Vanhlehla hi xindzhakwandzhakwani, vayawa.

⁷ Kutani avavutisa ka vumbirhi aku: “Milava mani xana?” Vaku: “Yesu wa Nazareta.”

⁸ Yesu ahlamula aku: “Nimibzelile niku: ‘Hi mina lweyi.’ Loko kunene milava mina, tshikani lava, vatifambela.”

⁹ (Asvili lesvaku rito leri angarivula rihetiseka, loko ate: “Anitshikanga ni mun'we wa lava uninyikeke vona, alova.”)

¹⁰ Simoni Petrosi lweyi aali ni tlhari arihlomula, atsema mutirhi wa Muprista lwenkulu, amuxupula ndleve ya xinene. Vito ra xikarawa lexi avaku i Malko.

¹¹ Hi loko Yesu aku ka Petrosi: “Tlhelisa mesa wa wena ankotlotweni wa wona; xana aninganweli ndzhekweni lowu Tatana aninyikeke wona xana?”

Ta Yesu hubzeni ya Anasi

¹² Ntlawa wa masochwa ni ndhuna leyikulu ya wona ni valaveleli va Vayuda, vakhoma Yesu, vamuboha.

¹³ Kutani varhanga hi kumuyisa ka Anasi. N'wana waxisati wa Anasi aatekiwile hi Kayafasi, Muprista lwenkulu wa lembe lero.

¹⁴ Hi yena Kayafasi lweyi angatshama atsundzuxa Vayuda lesvaku asvitayampsa loko munhu mun'we afela vanhu hinkwavu.

Ta Petrosi loko alandzula Yesu

¹⁵ Simoni Petrosi ni mujondzisiwa mun'we valandza Yesu; mujondzisiwa wakona aativiwa hi Muprista lwenkulu, kutani anghena hubzeni ya yindlo ya Muprista lwenkulu na Yesu.

¹⁶ Kambe Petrosi aayimile handle nyangweni. Hi loko mujondzisiwa lweyi mun'wana lweyi ativiwaka hi Muprista lwenkulu, ahuma ayavulavula ni murhangeli waxisati lweyi aali mulanguteli wa nyangwa, kutani anghenisa Petrosi.

¹⁷ Hi loko mutirhi lwiya waxisati aku ka Petrosi: “Xana awu mujondzisiwa wa munhu lweyi ke?” Aku: “Ani yena.”

¹⁸ Svikarawa ni valaveleli avatshivelile ndzilo wa makhala, hikuva akuli ni xirhami; kutani avali karhi vaworha ndzilo; na yena Petrosi aayimile na vona, aworha ndzilo.

Ta kuthethisiwa ka Yesu hi Anasi

¹⁹ Anasi Muprista lwenkulu avutisa Yesu hi ta vajondzisiwa va yena ni ta kujondzisa ka yena.

²⁰ Yesu amuhlamula, aku: “Nivulavulile rivaleni mahlweni ka vanhu hinkwavu. Nijondzisile minkarhi hinkwayu masinagogeni ni le Tempeleni, laha Vayuda hinkwavu vahlengeletanaka kona, anivulanga nchumu xihundleni.

²¹ Hikolaho ka yini uvutisa mina? Vutisa lava vatweke lesvi ningavabzela svona; vona vasvitiva lesvi nisvivuleke.”

²² Loko Yesu avulile svosvo, mun'wana wa valaveleli lweyi aayimile kolaho, aba Yesu hi mpama, aku: “Xana hi rona hlamulele ra wena ka Muprista lwenkulu ke?”

²³ Yesu amuhlamula, aku: “Loko ningavulavulanga khwatsi nikombi xihoxo xa mina, kambe loko nivulavulile hi nawu wakona, unibela yini xana?”

²⁴ Kutani Anasi amurhumela na abohiwile ka Kayafasi, Muprista lwenkulu mun'wana.

Ta Petrosi loko alandzula Yesu khambi ra vumbirhi

²⁵ Simoni Petrosi aayimile na ali karhi aworha ndzilo. Vaku ka yena: “Xana na wena awumun'we wa vajondzisiwa va yena ke?” Yena akaneta, aku: “Ani yena!”

²⁶ Mun'we wa xikarawa xa Muprista lwenkulu, xaka ra lweyi Petrosi amutsemeke ndleve, aku: “Xana anikuvonanga wena antangeni na uli na yena ke?”

²⁷ Petrosi atlhela akaneta; hi nomo-lo, nkuku wuyimba.

Ta Yesu mahlweni ka Pilato

²⁸ Kutani vasuka na Yesu ka Kayafasi, vamuyisa ndlwini ya vuhosi. Akahali mpundzu svinene; vona hi voxe avanghenanga ndlwini ya vuhosi, kuyendlela lesvaku vangatinyamisi, vatakota kuja nkhuvu wa Paska.

²⁹ Hikolaho Pilato ahuma, aya ka vona, kutani aku: “Xana mihehla munhu lweyi hi nandzu wihi ke?”

³⁰ Vahlamula vaku ka yena: “Loko munhu lweyi aangajohanga, ahingatamutisa ka wena.”

³¹ Pilato aku ka vona: “Mutekeni n'wina, miyamuthethisa hi nawu wa ka n'wina.” Vayuda vaku ka yena: “Nawu awuhipfumeleli kudlaya munhu.”

³² (Lesvi akuli kuhetisa rito leri Yesu atshamaka arivula loko afanisa rifu leri angatafanela kufa ha rona.)

³³ Pilato atlhela anghena ndlwini ya vuhosi, avitana Yesu, aku ka yena: “Xana hi wena hosi ya Vayuda ke?”

³⁴ Yesu ahlamula, aku: “Xana lesvi usvivulaka, svihuma ka wena, kumbe uyobzeliwa hi van'wana vanhu ke?”

³⁵ Pilato ahlamula aku: “Xana ni Muyuda mina ke? Vanhu va ka wena ni Vaprista lavakulu hi vona vakutiseke ka mina. Uyendlile yini xana?”

³⁶ Yesu ahlamula, aku: “Mfumu wa mina ahi wa misava leyi; loko awuli wa misava leyi, malandza ya mina amatalwa lesvaku ninganyiketiwi ka Vayuda; kambe hilaha svinga hakona, mfumu wa mina ahi wa laha misaveni.”

³⁷ Pilato aku ka yena: “Hikolaho, u hosi, ahi svona ke?” Yesu ahlamula, aku: “Kuvula wena lesvaku ni Hosi. Lesvi nipsaleliweleke svona ni lesvi ningatela svona laha misaveni, i kuta nitaveka vumboni henhla ka ntiyiso. Mani na mani lweyi anga wa ntiyiso, ayingisa rito ra mina.”

³⁸ Pilato aku ka yena: “Ntiyiso i ncini?” Loko avulile svosvo, ahuma kambe aya ka Vayuda, aku ka vona: “Anivoni nandzu ni wun'we ka yena.”

Ta Yesu loko ayavanyiseliwa rifu

³⁹ “Kambe n'wina mi ni ntolovelo wa kuva nimitshunxela munhu mun'we hi nkarhi wa Paska; xana milava lesvaku nimitshunxela hosi ya Vayuda ke?”

⁴⁰ Vahlamula hi kuhuwelela, vaku: “Kungave munhu lweyi, kambe Barabasi!” (Kasi Barabasi aali xigevenga.)