Yohane 17 - Testamente Leyimpsha Xichangana

Ta Yesu loko akhongelela vajondzisiwa

¹ Yesu avulile timhaka leti. Kutani atlakusa mahlo, alanguta tilweni, aku: “Tatana, nkarhi wufikile; dzunisa N'wana wa wena, lesvaku N'wana akudzunisa.

² Hakunene, umunyikile vuhosi henhla ka vanhu hinkwavu, lesvaku hinkwavu lava umunyikeke vona, yena avanyika vutomi lebzingaheliki.

³ Kambe vutomi lebzingaheliki, hi lesvaku vakutiva, wena ntsena unga Xikwembu xa ntiyiso, na Yesu Kriste lweyi umurhumeke.

⁴ “Nikudzunisile laha misaveni, hi kuheta ntirho lowu uninyikeke wona lesvaku niwutirha.

⁵ Svosvi Tatana, nidzunise mahlweni ka wena hi kudzuneka loku anili nakona ka wena, matilo ni misava svingasivakona.

⁶ “Nikutivisile ka vanhu lava uninyikeke vona vali lavahlawuliweke misaveni; avali va wena; uninyikile vona, kutani vahlayisile rito ra wena.

⁷ Svosvi vasvitiva lesvaku hinkwasvu lesvi uninyikeke svona, svihuma ka wena,

⁸ hikuva nivanyikile marito lawa uninyikeke wona; vamayamukelile, kutani vajondzile hakunene lesvaku nihuma ka wena, kutani vapfumelile lesvaku nirhumiwile hi wena.

⁹ Navakhongelela; anikhongeleli misava, kambe nikhongelela lava uninyikeke vona, hikuva i va wena.

¹⁰ Hinkwasvu lesvinga sva mina, i sva wena; ni sva wena, i sva mina; kutani nidzunisiwile hikolaho ka svona.

¹¹ Anahali misaveni, kambe vona va laha misaveni, kutani nita koseyo ka wena. Tatana lweyi akwetsimeke, vahlayise hi matimba ya vito ra wena, leri uninyikeke rona, lesvaku vava mun'we kufana na hina.

¹² Loko nahali na vona, anivahlayisa hi matimba ya vito ra wena leri uninyikeke rona; nivabiyelelile, kutani akuvanga ni mun'we wa vona lweyi aloveke, loko angali munhu lweyi aafanela kulova, lesvaku Matsalwa mahetiseka.

¹³ Svosvi nita koseyo ka wena, kutani nivula svilo lesvi nili misaveni, lesvaku kutsaka ka mina kuva loku kuhetisekeke ka vona.

¹⁴ Nivanyikile rito ra wena, kutani vanhu va misava vavavengile, hikuva ahi va misava, tani hi lesvi na mina ningaliki wa misava.

¹⁵ Anikombeli lesvaku uvasusa misaveni, kambe hi lesvaku uvalwela ka lweyi wobiha.

¹⁶ Ahi va misava, tani hi lesvi na mina ningaliki wa misava.

¹⁷ Vakwetsimisi antiyisweni; rito ra wena i ntiyiso.

¹⁸ Tani hi lesvi unirhumeke misaveni, na mina nivarhumile misaveni.

¹⁹ Kutani nitikwetsimisa hikolaho ka vona, lesvaku na vona vakwetsimisiwa antiyisweni.

²⁰ “Anikhongeleli vona ntsena, kambe nikhongelela ni lava vangatapfumela ka mina hi rito ra vona;

²¹ ninavela lesvaku hinkwavu vava mun'we, kufana ni lesvi wena Tatana unga ka mina, na mina ninga ka wena, lesvaku na vona vava ka hina, kutani misava yitapfumela lesvaku unirhumile.

²² Nivanyikile kudzuneka loku uninyikeke kona, lesvaku vava mun'we kufana na hina hinga mun'we:

²³ Mina ka vona, na wena ka mina, lesvaku vayendliwa lavahetisekeke, vakondza vava mun'we, kutani vanhu va misava vatativa lesvaku unirhumile, ni lesvaku uvarhandzile kufana ni lesvi unirhandziseke xisvona.

²⁴ Tatana, nilava lesvaku hinkwavu lava uninyikeke vona, vava na mina laha ninga kona; vatahamba vahlalela kukwetsima ka mina loku uninyikeke kona, hikuva unirhandzile misava yingasitumbuluxiwa.

²⁵ Tatana lweyi alulameke, misava ayikutivanga, kambe mina nikutivile, kutani vanhu lava vasvitivile lesvaku nirhumiwile hi wena.

²⁶ Nikutivisile ka vona; nahata kutivisa, lesvaku rirhandzu leri unirhandzeke ha rona, riva ka vona, na mina niva ka vona.”