Yohane 16 - Testamente Leyimpsha Xichangana

Ta ntirho wa Moya Lowokwetsima

¹ “Nimibzelile timhaka leti lesvaku mitakala mingakhunguvanyeki.

² Vatamihlongola masinagogeni; na svona, kutata nkarhi lowu mani na mini lweyi amidlayaka angatayanakanya lesvaku atirhela Xikwembu.

³ Vatamiyendla svilo lesvi hikuva avahitivanga, hambi Tatana hambi mina.

⁴ Kambe nimibzelile timhaka leti lesvaku loko nkarhi wa kuhumelela ka tona wufika, mitatsundzuka lesvaku nivulavulile hi tona ka n'wina. “Animibzelanga svilo lesvi kusunguleni, hikuva anahali na n'wina.

⁵ Kambe svosvi niya ka lweyi anirhumeke, kutani aku na mun'we wa n'wina lweyi anivutisaka, aku: ‘Uya kwihi xana?’

⁶ Kambe hi mhaka ya lesvi nimibzeleke svilo lesvi, timbilu ta n'wina titele hi gome.

⁷ Hambi svilitano, namibzela ntiyiso: Svitava svinene ka n'wina loko nifamba. Hikuva loko ningafambi, Muchaveleli angakala angati ka n'wina; kambe loko nifamba, nitamurhumela ata ka n'wina.

⁸ Loko ata, atakholwisa misava hi ta kujoha, ni kululama, ni kuyavanyisa:

⁹ Hi ta kujoha, hikuva avapfumeli ka mina;

¹⁰ hi ta kululama, hikuva niya ka Tatana, kutani amingahanivoni;

¹¹ hi ta kuyavanyisa, hikuva mufumi wa misava leyi ayavanyisiwile.

¹² “Nahali ni lesvotala lesvi nifanelaka kumibzela svona, kambe svingamitikela svosvi.

¹³ Kambe loko yena ata, anga Moya wa ntiyiso, atamifambisa ndleleni hinkwayu ya ntiyiso; hikuva angakala angavulavuli svohuma ka yena; kambe xin'wana ni xin'wana lexi axitwaka, ataxivula; nasvona atamitivisa lesvi svingatata.

¹⁴ Atanidzunisa, hikuva lesvi amitivisaka svona, atava asvikuma ka mina.

¹⁵ Hinkwasvu lesvi Tatana anga na svona, i sva mina; hi kolaho ningavula lesvaku, lesvi amitivisaka svona, atava asvikuma ka mina.

Kuvaviseka kutahundzuka kutsaka

¹⁶ “Ndzhaku ka nkarhinyana, amingahanivoni; kutani ndzhaku ka nkarhinyana kambe, mitanivona.”

¹⁷ Van'wana xikarhi ka vajondzisiwa va yena vavutisana, vaku: “Xana avula yini, loko aku ka hina: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke? Nilesvi ange: ‘Hikuva niya ka Tatana’ ke?”

¹⁸ Vayengeta vaku: “Xana avula yini, loko aku: ‘Ndzhaku ka nkarhinyana’, ke? Ahitivi lesvaku avula yini!”

¹⁹ Yesu asvitivile lesvaku valava kumuvutisa, kutani aku ka vona: “Xana mivutisana hi letoyini xikarhi ka n'wina? Xana hi lesvi ningate: ‘Ndzhaku ka nkarhinyana, aminganivoni, kutani ndzhaku ka nkarhinyana kambe, mitanivona’ ke?

²⁰ Nitiyisisile nili ka n'wina: Mitarila miva mikolola, kambe misava yona yitatsaka; mitatwa kuvaviseka, kambe kuvaviseka ka n'wina kutahundzuka kutsaka.

²¹ Loko wansati aveleka, atwa kuvava lokukulu, hikuva nkarhi wa yena wufikile; kambe loko avelekile n'wana, warivala maxangu ya yena hikolaho ka kutsaka, hi lesvi kungavelekiwa munhu misaveni.

²² Svitano na n'wina: Mitwa kuvaviseka svosvi, kambe nitatlhela nimivona, kutani timbilu ta n'wina titatsaka, kutani aku na munhu lweyi angatamitekela kutsaka ka n'wina.

²³ “Hi siku rakona, amingahanivutisi nchumu. Nitiyisisile nili ka n'wina: Hinkwasvu lesvi mingatasvikombela ka Tatana hi vito ra mina, ataminyika svona.

²⁴ Kufika svosvi, amisikombela nchumu hi vito ra mina; kombelani, mitanyikiwa, lesvaku kutsaka ka n'wina kuva loku kuhetisekeke.

Ta kuhlula misava

²⁵ “Nimibzelile timhaka leti hi kuvulavula hi svifaniso; kambe nkarhi wata, lowu ningataka ningahavulavuli na n'wina hi mukhuva lowu; kambe nitamibzela sva Tatana rivaleni ningarhendzeleki.

²⁶ Loko siku rakona rifika, mitakombela hi vito ra mina, kambe anivuli lesvaku nitamikombelela ka Tatana,

²⁷ hikuva Tatana hi yexe wa mirhandza. Amirhandza hikuva minirhandzile, miva mipfumela lesvaku nihuma ka Xikwembu.

²⁸ Nihumile ka Tatana, kutani nitile misaveni; svosvi nitlhela nisuka misaveni, niya ka Tatana.”

²⁹ Vajondzisiwa va yena vaku ka yena: “Aha! Svosvi uvulavula rivaleni ungarhendzeleki; awahavulavuli hi svifaniso.

³⁰ Svosvi hatwisisa lesvaku utiva svilo hinkwasvu, kutani asvifaneli lesvaku munhu akuvutisa nchumu; hikolaho ka svona, hapfumela lesvaku uhuma ka Xikwembu.”

³¹ Yesu avahlamula, aku: “Svosvi mapfumela xana?

³² Vonani, nkarhi wata, ni svosvi wufikile, lowu mingatahangalaka ha wona, mun'wana ni mun'wana atlhelela kaya ka yena, minisiya nilinoxe; hambi svilitano aninoxe, hikuva Tatana ana mina.

³³ Nimibzelile svilo lesvi lesvaku miva ni kurhula ka mina. La misaveni, mitava ni mahlomulu, kambe tiyani timbilu, nihlulile misava.”