Yohane 14 - Testamente Leyimpsha Xichangana

Yesu i ndlela yoya ka Tatana

¹ Timbilu ta n'wina tingakarhateki; pfumelani ka Xikwembu, ni le ka mina mipfumela.

² Tindhawu titele ndlwini ya Tatana wa mina; loko asvingaritano, anitava nimibzelile; kutani niyamilungisela kona.

³ Loko niyile kuyamilungisela kona, nitavuya; kutani nitamiteka mita ka mina, lesvaku laha ninga kona, miva kona na n'wina.

⁴ Kutani ndlela yoya laha niyaka kona mayitiva.

⁵ Tomasi aku ka yena: “Hosi, laha uyaka kona ahikutivi; ni ndlela yakona hingayitivisa kuyini xana?”

⁶ Yesu aku ka yena: “Hi mina ndlela, ni ntiyiso, ni vutomi; aku na munhu lweyi ataka ka Tatana, loko kungali ha mina.

⁷ Loko mitiva mina, mitativa ni Tatana wa mina; kusukela svosvi, mamutiva, nasvona mimuvonile.”

⁸ Filipi aku ka yena: “Hosi, hikombe Tatana, kutani svitava svihiringene.”

⁹ Yesu aku ka yena: “I khale nili na n'wina, kasi ni svosvi awusinitiva, Filipi? Lweyi anivoneke, avonile Tatana; hikolaho ka yini uku: ‘Hi kombe Tatana’?

¹⁰ Xana awupfumeli lesvaku ni le ka Tatana, ni lesvaku Tatana a le ka mina ke? Lesvi nimibzelaka svona asvihumi ka mina. Tatana lweyi anga ka mina, hi yena lweyi atirhaka mintirho leyi ya yena.

¹¹ Nipfumeleni loko niku ni le ka Tatana, ni lesvaku Tatana a le ka mina; loko minganikholwi, pfumelani hikolaho ka yona mintirho.

¹² “Nitiyisisile nili ka n'wina: Lweyi apfumelaka ka mina, na yena atayendla mintirho leyi niyiyendlaka; atayendla nileyitlulaka leyi, hikuva niya ka Tatana.

¹³ Hinkwasvu lesvi misvikombelaka hi vito ra mina, nitasviyendla, lesvaku Tatana adzunisiwa ka N'wana.

¹⁴ Loko mikombela ka mina xanchumu hi vito ra mina, nitaxiyendla.”

Ta kutshembisiwa ka Moya Lowokwetsima

¹⁵ “Loko minirhandza, mitahlayisa milawu ya mina.

¹⁶ Nitakombela Tatana, kutani yena ataminyika Muchaveleli mun'wana, lweyi angatava na n'wina hilaha kungaheliki,

¹⁷ anga Moya wa ntiyiso. Misava yingakala yingamuyamukeli, hikuva ayimuvoni, ayimutivi. N'wina mamutiva, hikuva atshama na n'wina, nasvona a le ndzeni ka n'wina.

¹⁸ “Aningamisiyi mili svirhombe; nitata ka n'wina.

¹⁹ Ndzhaku ka nkarhinyana, misava ayingahanivoni, kambe n'wina mitanivona. Lesvi nihanyaka, na n'wina mitahanya.

²⁰ Hi siku rakona, mitativa lesvaku ni le ka Tatana wa mina, ni lesvaku na n'wina mi le ka mina, kukotisa lesvi na mina ninga ka n'wina.

²¹ Lweyi ayamukeleke milawu ya mina, kutani ayihlayisa, hi yena lweyi anirhandzaka; kutani lweyi anirhandzaka, atarhandziwa hi Tatana wa mina; na mina nitamurhandza, niva nitipfuletela ka yena”

²² Yudasi (angali lweyi wa Iskariyota) aku: “Hi lesvoyini, Hosi, loko uku, utatipfuletela ka hina, kungali ka misava ke?”

²³ Yesu amuhlamula, aku: “Loko munhu anirhandza, atahlayisa rito ra mina, kutani Tatana wa mina atamurhandza, kutani hitata ka yena, hitshama na yena.

²⁴ Lweyi anganirhandziki, angahlayisi marito ya mina; kutani rito leri miritwaka, ahi ra mina, kambe i ra Tatana lweyi anirhumeke.

²⁵ “Nimitivisile svilo lesvi nahali na n'wina.

²⁶ Kambe Muchaveleli anga Moya Lowokwetsima lowu Tatana angatawurhuma hi vito ra mina, atamujondzisa hinkwasvu, ni kumutsundzuxa hinkwasvu lesvi nimibzeleke svona.

²⁷ “Nimisiyela kurhula, niminyika kurhula ka mina. Animinyiki hilaha misava yinyikaka hakona. Timbilu ta n'wina tingakarhateki, tingakhomiwi hi kuchava.

²⁸ Minitwile loko nite ka n'wina: ‘Nafamba, kutani nitatlhela nivuya niva na n'wina.’ Loko onge minirhandzile, ingi mitsakile hi lesvi niyaka ka Tatana, hikuva Tatana i nkulu kutlula mina.

²⁹ Nisvosvi, nimibzelile svilo lesvi, svingasihumelela, lesvaku loko svihumelela, mitakota kupfumela.

³⁰ Aningahavulavuli svotala na n'wina, hikuva mufumi wa misava leyi wata; kambe anga na matimba henhla ka mina.

³¹ Hinkwasvu lesvi, svilava kukomba misava lesvaku nirhandza Tatana, ni lesvaku nitirha hilaha Tatana anileleteke hakona. Sukani miyima, ahifambeni hisuka la!