Yohane 11 - Testamente Leyimpsha Xichangana

Ta rifu ra Lazaru

¹ Siku rin'wana, wanuna lweyi avaku i Lazaru wa le Betaniya, aavabza, ali muntini wa vamakwavu Mariya na Marta.

² (Mariya, hi yena lweyi angatshama atota Hosi hi mafurha lawa yonun'hwela, atlhela amusula milenge hi misisi ya yena; kutani Lazaru lweyi aavabza, aali makwavu wa yena.)

³ Vamakwavu lava vaxisati varhumela rito ka Yesu, vaku ka yena: “Hosi, lweyi umurhandzaka wavabza.”

⁴ Loko Yesu atwa svosvo, aku: “Kuvabza loku akungayisi kufeni, kambe i ka kudzunisa Xikwembu, ni lesvaku N'wana wa Xikwembu adzunisiwa hi kolaho kakona.”

⁵ Yesu aarhandza Marta ni makwavu Mariya, arhandza na Lazaru.

⁶ Loko atwile lesvaku Lazaru wavabza, atshama masiku mambirhi laha aali kona.

⁷ Kutani ndzhaku ka svosvo aku ka vajondzisiwa: “Ahitlheleleni Yudeya.”

⁸ Vajondzisiwa vaku ka yena: “Mujondzisi, akuhundzi masiku yotala, loko Vayuda varingete kukukhandla hi maribze. Xana wahalava kutlhelela kona ke?”

⁹ Yesu ahlamula aku: “Xana siku rin'we ari na mawora ya khume ni mambirhi ke? Loko munhu afamba ninhlekanhi, angakala angawi hikuva avona hi rivoni ra misava leyi;

¹⁰ kambe loko munhu afamba nivusiku, wawa hikuva arivoni arikona ka yena.”

¹¹ Loko avulile svosvo, atlhela aku ka vona: “Lazaru murhandziwa wa hina, ayetlele, kambe niya kuyamupfuxa.”

¹² Vajondzisiwa vaku ka yena: “Hosi, loko ayetlele, atapfuka.”

¹³ Yesu aavulavula hi ta kufa ka Lazaru, kambe vona avapimisa lesvaku avulavula hi ta kuyetlela vurhongo rinene.

¹⁴ Kutani Yesu avabzela rivaleni, aku: “Lazaru afile,

¹⁵ kutani, hikolaho ka n'wina nitsakile hi lesvi aningali kona koseyo, lesvaku mitapfumela. Kambe ahiyeni ka yena!”

¹⁶ Tomasi lweyi aavuliwaka “Hahla”, aku ka vajondzisiwakulobze: “Ahiyeni na hina, lesvaku hiyafa na yena.”

Yesu i kupfuka ni vutomi

¹⁷ Kutani loko Yesu afika, akuma lesvaku Lazaru ahetile mune wa masiku na ali sirheni.

¹⁸ Doropa ra Betaniya arili kusuhi na Yerusalema; mpfhuka wakona awuli kusuhi ni makilometro manharhu.

¹⁹ Kutani Vayuda lavotala avayile ka Marta na Mariya kuyavachavelela hikolaho ka rifu ra makwavu wa vona.

²⁰ Loko Marta atwa lesvaku Yesu wata, aya mutlhangaveta; Mariya yena aatshamile ndlwini.

²¹ Kutani Marta aku ka Yesu: “Hosi, loko onge awuvile kona, makwerhu ina angafanga.

²² Kambe ni svosvi nasvitiva lesvaku hinkwasvu lesvi usvikombelaka ka Xikwembu, xona xitakunyika svona.”

²³ Yesu aku ka yena: “Makwenu atapfuka kufeni.”

²⁴ Marta aku ka yena: “Nasvitiva lesvaku atapfuka kufeni hi siku ra makumu, akupfukeni ka vafi.”

²⁵ Yesu aku ka yena: “Hi mina kupfuka ni vutomi; lweyi apfumelaka ka mina, hambi angafa, atahanya,

²⁶ kutani mani na mani lweyi ahanyaka, ava apfumela ka mina, angakala angafi ni siku ni rin'we. Xana wasvipfumela svosvo ke?”

²⁷ Aku ka yena: “Ina Hosi, napfumela lesvaku hi wena Kriste, N'wana wa Xikwembu, lweyi aafanela kuta laha misaveni.”

Yesu atlhaveka arila

²⁸ Loko Marta avulile svosvo, aya, ayavitana Mariya makwavu, amubzela hi kuhlevetela aku: “Mujondzisi akola, wakuvitana.”

²⁹ Loko Mariya atwa svosvo, apfuka hi kuhantlisa, aya ka Yesu.

³⁰ (Yesu aangasinghena xidoropanini, kambe ahali kola Marta angamutlhangaveta kona.)

³¹ Vayuda lava avali ndlwini na Mariya vali karhi vamuchavelela, loko vamuvona asuka ayima ahuma hi kuhantlisa, vamulandza hi kuyanakanya lesvaku aya le sirheni kuyarila kona.

³² Loko Mariya afika laha Yesu anga kona ni loko amuvona, akhinsama milengeni ya yena, aku ka yena: “We Hosi, loko onge awuvile kona, makwerhu ina angafanga.”

³³ Loko Yesu amuvona na ali karhi aba nkosi arila, ni loko avona Vayuda lavamuheleketaka na vona vali karhi vaba nkosi varila, atlhaveka svinene moyeni ni kutwa kuvaviseka lokukulu;

³⁴ kutani aku: “Mimuvekile kwihi xana?” Vaku ka yena: “Hosi, tana utakuvona.”

³⁵ Yesu arila.

³⁶ Kutani Vayuda vaku: “Vonani hilaha aamurhandza hakona!”

³⁷ Van'wana va vona vaku: “Yena lweyi angapfula mahlo ya lava vakufa mahlo hikolaho ka yini angakotanga kuyendla lesvaku munhu lweyi angafi xana?”

Ta Lazaru loko apfuxiwa kufeni

³⁸ Yesu atlhela atlhaveka moyeni, ata kusuhi ni sirha. Sirha rakona arili mhakwa, mhakwa yakona ayipfaliwile hi ribze.

³⁹ Yesu aku: “Susani ribze!” Marta makwavu wa mufi aku ka yena: “Kambe Hosi, svosvi kufanele kuva na kunun'hwa, hikuva kuhundzile mune wa masiku na afile.”

⁴⁰ Yesu aku ka yena: “Xana anikubzelanga lesvaku loko upfumela, utavona kukwetsima ka Xikwembu ke?”

⁴¹ Hi loko vasusa ribze, kutani Yesu alanguta tilweni, aku: “Tatana, nakukhensa, hikuva uniyingisile.

⁴² Mina nisvitivile lesvaku masiku hinkwawu waniyingisa, kambe nivulile svilo lesvi hikolaho ka xitshungu lexi xiyimeke kola, lesvaku xitaza xipfumela lesvaku hi wena lweyi anirhumeke.”

⁴³ Kuteloko avulile svosvo, ahuwelela hi rito leritlakukeke, aku: “Lazaru, humela handle!”

⁴⁴ Kutani mufi ahuma na atsondziheliwile milenge ni mavoko hi mabandichi ni ximombo xa yena na xibohiwile hi faduku. Yesu aku ka vona: “Mutlhantlheni mimutshika atifambela.”

Ta makungu ya kudlaya Yesu

⁴⁵ Lavotala xikarhi ka Vayuda lava avatile ka Mariya, loko vavonile lesvi Yesu asviyendleke, vapfumela ka yena

⁴⁶ Kambe van'wana va vona vaya ka Vafarisi, vayavabzela lesvi Yesu asviyendleke.

⁴⁷ Hi loko Vaprista lavakulu ni Vafarisi vavitana Huvu ya Sanedri, vaku: “Hitayendla yini xana, lesvi munhu lweyi ayendlaka mahlori layotala?

⁴⁸ Loko himutshikisa svosvo, hinkwavu vatapfumela ka yena, kutani Varoma vatata vatalovisa ndhawu leyi ya hina, ni kuhiheta hi rixaka.”

⁴⁹ U n'wana wa vona lweyi vange i Kayafasi, aali Muprista lwenkulu lembe rolero, kutani aku ka vona: “Amitivi nchumu n'wina;

⁵⁰ xana amivoni lesvaku hi lesvipfunaka hina loko munhu mun'we afela van'wana, handle ka lesvaku rixaka hinkwaru rilova ke?”

⁵¹ Marito lawa amangahumi ka yena; amavulile hi lesvi aali Muprista lwenkulu lembe rolero, kutani aprofeta lesvaku Yesu atafanela kufela rixaka;

⁵² nasvona kungali ntsena kufela rixaka, kambe kuli kuhlengeleta vanhu va Xikwembu lavahangalakeke, avayendla van'we.

⁵³ Kutani kusukela siku lero, Vayuda vaboha makungu ya kudlaya Yesu.

⁵⁴ Hikolaho Yesu angahafambafambanga rivaleni xikarhi ka Vayuda, kambe asuka kolaho, aya tikweni leringe kusuhi ni mananga, doropeni lerivuliwaka Efrayimi, ayatshama kona ni vajondzisiwa va yena.

⁵⁵ Nkhuvu wa Paska ya Vayuda awuli kusuhi. Lavotala lavahumaka matikweni, avatlhantukele Yerusalema vayatibasisa, nkhuvu wungasivakona.

⁵⁶ Avalava Yesu, vavutisana na vayimile Tempeleni, vaku: “Xana miyehleketa yini? Aangati nkhubzeni! Xana atata ke?”

⁵⁷ Vaprista lavakulu ni Vafarisi avaleletile lesvaku, loko mun'wana ativa laha anga kona, aavativise, lesvaku vatakota kumukhoma.