Yohane 10 - Testamente Leyimpsha Xichangana

Yesu i Mubzisi lwenene

¹ “Nitiyisile nili ka n'wina: Lweyi angangheniki hi nyangwa xib'aleni xa tinyempfu, kambe aphondla hi kun'wana, i muyivi, nasvona i xigevenga.”

² Kambe mubzisi wa tinyempfu anghena hi nyangwa.

³ Mulaveleli wa nyangwa wamupfulela, kutani tinyempfu titwa rito ra yena; avitana tinyempfu letinga ta yena hi mavito ya tona, atihumesela handle.

⁴ Loko ahumesile letinga ta yena hinkwatu, atirhangela mahlweni, kutani tinyempfu tamulandzela, hikuva titiva rito ra yena;

⁵ tingakala tingalandzi munhu lweyi tingamutiviki; titamubaleka, hikuva atitivi rito ra van'wana.

⁶ Yesu avabzelile xifaniso lexi, kambe vona avatwisisanga lesvi aavabzela svona.

Yesu hi yena nyangwa

⁷ Yesu atlhela aku ka vona: “Nitiyisile nili ka n'wina: Hi mina nyangwa ya tinyempfu.”

⁸ Hinkwavu lava vateke ningasita, i vayivi, nasvona i svigevenga, kambe tinyempfu ativayingisanga.

⁹ Hi mina nyangwa. Loko munhu anghena ha mina, ataponisiwa; atanghena atlhela ahuma, akuma ni majelo.

¹⁰ Muyivi atela ntsena kuyiva, ni kudlaya, ni kuhahlula; mina nitile lesvaku tinyempfu tiva ni vutomi, tibzikuma hi ntalu.

¹¹ “Hi mina mubzisi lwenene. Mubzisi lwenene anyiketa vutomi bza yena afela tinyempfu.

¹² Lweyi atirhelaka male, angaliki mubzisi kumbe n'winyi wa tinyempfu, asiya tinyempfu atsutsuma loko avona hlolwa rita; kutani hlolwa ritikhoma ni kutihangalasa.

¹³ Mhaka hi lesvaku i mutirheli wa male ntsena, angakhatali hi tinyempfu.

¹⁴ Hi mina mubzisi lwenene; nitiva leti tinga ta mina, ni leti tinga ta mina tanitiva.

¹⁵ Tani hilaha Tatana anitivaka hakona, ni hilaha na mina nitivaka Tatana hakona; kutani ninyiketa vutomi bza mina nifela tinyempfu.

¹⁶ Nasvona ni ni tinyempfu tin'wana leti tingaliki ta xib'ala lexi; na tona nifanela kutivuyisa; titayingisa rito ra mina, kutani titayendla ntlhambi wun'we, tiva ni mubzisi mun'we.

¹⁷ Hikolaho, Tatana wanirhandza, hikuva ninyiketa vutomi bza mina, lesvaku nitatlhela nibzikuma.

¹⁸ Aku na munhu lweyi anitekelaka bzona, kambe nabzinyiketa hi kurhandza ka mina; ni ni matimba ya kubzinyiketa, nasvona ni ni matimba ya kutlhela nibzikuma. Hi svona lesvi Tatana wa mina anibzeleke kuyendla svona.”

¹⁹ Kuyavana kutlhela kuva kona xikarhi ka Vayuda hikolaho ka marito wolawo.

²⁰ Lavotala xikarhi ka vona avaku: “A ni dimoni, ahlangane nhloko! Mimuyingisela yini xana?”

²¹ Kambe van'wana avaku: “Marito lawa ahi ya munhu lweyi anga ni dimoni. Xana dimoni ringapfula mahlo ya lavo vangafa mahlo, ke?”

Ta kuthethisiwa ka Yesu

²² Nkhuvu wa kukhangula tempele awuli kona le Yerusalema, kambe arili vuxika,

²³ kutani Yesu aafambafamba ka rikupakupa ra tempele ya Solomoni.

²⁴ Hi loko Vayuda vamurhendzela, vaku ka yena; “Utahikanakanisa kufika rini xana? Loko uli yena Kriste, hibzeli livaleni.”

²⁵ Yesu avahlamula aku: “Nimibzelile, kambe amipfumeli. Mintirho leyi niyiyendlaka hi vito ra Tatana wa mina, yiveka vumboni henhla ka mina.”

²⁶ Kambe amipfumeli, hikuva ami tinyempfu ta mina.

²⁷ Tinyimpfu ta mina tiyingisa rito ra mina; mina natitiva, kutani tanilandzela.

²⁸ Kutani nitinyika vutomi lebzingaheliki; tingakala tingalovi, nasvona aku na munhu lweyi angatativutla vokweni ra mina.

²⁹ Tatana wa mina lweyi aninyikeke tona, i nkulu kutlula hinkwasvu; hi kolaho, aku na munhu ni mun'we lweyi angakotaka kutivutla vokweni ra Tatana wa mina.

³⁰ Mina na Tatana hi mun'we.

³¹ Vayuda vatlhela varhola maribze valava kumukhandla.

³² Yesu avahlamula aku ka vona: “Nimikombile mintirho leyotala leyinene; leyihumaka ka Tatana; xana, ka yona, hi wihi ntirho lowu minikhandlelaka wona ke?”

³³ Vayuda vamuhlamula vaku: “Ahikukhandli hi ntirho lowunene, kambe hi lesvi usandzaka Xikwembu, ni lesvi utiyendlaka Xikwembu, kasi wena u munhu ntsena.”

³⁴ Yesu avahlamula, aku: “Xana akutsaliwanga Naweni wa n'wina lesvaku: Mina nite: ‘N'wina mi svikwembu’ xana?”

³⁵ Hikolaho, loko nawu uvavitile svikwembu lavaya avakongomiwa hi rito ra Xikwembu (kutani amatsalwa mangacinciwi).

³⁶ Kutani-ke, hikolaho ka yini miku: “Asandza Xikwembu hi mhaka ya lesvi ningate: Ni N'wana-wa-Xikwembu xana? Kasi hi mina lweyi Tatana angamukwetsimisa ni kumurhuma misaveni.

³⁷ Loko ningayendli mintirho ya Tatana wa mina minganipfumeli!

³⁸ Kambe loko niyendla yona, hambi minganipfumeli, pfumelani yona mintirho, mitativa ni kutwisisa lesvaku Tatana a le ka mina, na mina ni le ka Tatana.”

³⁹ Hi loko varingeta kambe kumukhoma, kambe apshetemuka mavokweni ya vona.

⁴⁰ Kutani atlhela atsemakanya nambu wa Yordani, ayalaha Yohani aakhuvula kona kusunguleni, kutani atshama kona.

⁴¹ Lavotala vata ka yena vaku: “Yohani angayendlanga xikombiso ni xin'we, kambe hinkwasvu lesvi Yohani angasvi vula henhla ka munhu lweyi, svitiyile.”

⁴² Kutani lavotala vapfumela ka yena ndhaweni yoleyo.