Yohane 1 - Testamente Leyimpsha Xichangana

Rito rihundzukile munhu

¹ Kusunguleni ka svilo hinkwasvu, Rito arili kona, Rito arili ni Xikwembu, kutani Rito arili Xikwembu.

² Yena Rito aali Xikwembu kusukela kusunguleni.

³ Svilo hinkwasvu svitumbuluxiwile hi yena, kutani aku na xilo ni xin'we lexi xitumbuluxiweke loko kungali hi yena.

⁴ Vutomi abzili ka yena, kutani vutomi lebzo abzili kuvonakala ka vanhu.

⁵ Kuvonakala kutikombisa munyameni, kambe munyama awukotanga kuhlula akuvonakala.

⁶ Kuhumelela munhu lweyi arhumiweke hi Xikwembu, vito ra yena aali Yohani.

⁷ Yena atile kutava mboni, kutaveka vumboni henhla ka ta kuvonakala, lesvaku hinkwavu vatapfumela hikolaho ka yena.

⁸ Yena aa ngali kuvonakala, kambe atile kutaveka vumboni mayelanu ni takuvonakala.

⁹ Akuvonakala ka ntiyiso, loku kuvoningaka mani na mani, lweyi apsaliwaka laha misaveni.

¹⁰ Aali misaveni, kutani misava yitumbuluxiwile hi yena, kambe misava ayimutivanga.

¹¹ Atile ka lesvi asviri sva yena, kambe va yena avamuyamukelanga.

¹² Kambe, hinkwavu lava vangamuyamukela, lava vangapfumela ka vito ra yena, avanyikile matimba ya kuyendliwa vana va Xikwembu, vanga lavapfumelaka ka vito ra yena,

¹³ lava avapsaliwanga hi kurhandza ka ntumbuluku; kungali hi kunavela ka miri, kungali hi kurhandza ka wanuna, kambe hi kurhandza ka Xikwembu.

¹⁴ Rito ritihundzule nyama riva ritshama xikarhi ka hina, kutani hiva hivona akukwetsima ka yena lokunga kukwetsima ka N'wana lweyi angapsaliwa hi Tatana ali yexe, angatala hi timpsalu ni ntiyiso.

¹⁵ Yohani avekile vumboni henhla ka ta yena, kutani ahuwelela aku: Lweyi hi yena lweyi ningamibzela loko nite: “‘Lweyi ataka ndzhaku ka mina, wanitlula hi vukulu, hikuva avile kona mina ningasiva kona.’”

¹⁶ Kutani hina hinkwerhu hiyamukelile hi ntalu atimpsalu, hi kuphindha.

¹⁷ Hikuva Nawu wunyikiwile hi Moxe; kambe timpsalu ni ntiyiso svitile ha Yesu Kriste.

¹⁸ Aku na munhu lweyi atshamaka avona Xikwembu ni siku ni rin'we. N'wana wa Xikwembu lweyi angapsaliwa ali yexe, lweyi anga xifuveni xa Tatana, hi yena lweyi angayendla lesvaku Xikwembu xitiviwa.

¹⁹ Lebzi hi bzona vumboni bza Yohani, loko Vayuda va le Yerusalema varhumile vaprista ni Valevhi kuyamuvutisa, vaku: “Hi wena mani xana?”

²⁰ Angayalanga, ahlambanyile atiyisa svinene aku: “Mina, ahi mina Kriste.”

²¹ Kutani vamuvutisa vaku: “U mani-ke? Hi wena Eliya xana?” Aku: “Ani yena”. Vaku: “Hi wena Muprofeta xana?” Ahlamula, aku: “Ahihim. ”

²² Kutani vaku ka yena: “Hi wena mani xana? Hilava kutlhela ni nhlamulu ka lava vahirhumeke. Xana wena, utivula lesvaku u mani?”

²³ Aku: “Mina ni rito ra munhu lweyi ahuwelelaka mananga aku: ‘Lulamisani ndlela ya Hosi’, hilaha muprofeta Ezaya avuleke hakona.”

²⁴ Lava avarhumiwile avali van'we va Vafarisi;

²⁵ Kutani vatlhela vamuvutisa vaku: “Lesvi ungaliki Kriste, ungaliki Eliya, ungaliki yena Muprofeta, hikolaho ka yini ukhuvula xana?”

²⁶ Yohani avahlamula, aku: “Mina nikhuvula hi mati; xikarhi ka n'wina kuyimile mun'we lweyi n'wina mingamutiviki.”

²⁷ Lweyi hi yena lweyi ata ka hi le ndzhaku ka mina, lweyi hambi mina svinganifaneliki kutlhantlha tingoti ta masandhazi ya yena.

²⁸ Timhaka leti tihumelelile Betaniya ka tlhelo rin'wana ra Yordani, laha Yohani aakhuvula kona.

Yesu, i Xinyempfana xa Xikwembu

²⁹ Amundzuku wakona Yohani avona Yesu na ali karhi ata, amukongomile, kutani aku; hi lexi Xinyempfana xa Xikwembu lexisusaka svijoho sva misava!

³⁰ Hi yena lweyi nimibzeleke ta yena loko nite: Andzaku ka mina kuta wanuna lweyi anirhangeleke, hikuva aali kona mahlweni ka mina.

³¹ Mina aningamuntivi nitile nili lweyi akhuvulaka hi mati, lesvaku yena atakombisiwa Israyeleni.

³² Yohani avekile vumboni aku. Nivonile Moya wuxika hi le tilweni wufana ni xituvana, wutatshama henhla ka yena.

³³ Mina aningamutivi, kambe lweyi anirhumeke kukhuvula hi mati, anibzelile aku: Lweyi ungatavona Moya wuxikela ka yena, utshama henhla ka yena, hi yena lweyi akhuvulaka hi Moya Lowokwetsima.

³⁴ “Mina nisvivonile kutani niveka vumboni niku, lweyi hi yena N'wana wa Xikwembu.”

Ta vajondzisiwa lavorhanga va Yesu

³⁵ Mundzuku wakona, Yohani atlhela ava ka ndhawu yoleyo, ali ni vajondzisiwa va yena vambirhi.

³⁶ Avona Yesu ali karhi ahundza kutani aku: “Vonani! Hi lexi Xinyempfana xa Xikwembu!”

³⁷ Vajondzisiwa va Yohani la vambirhi vatwa lesvi asvivuleke, kutani valandza Yesu.

³⁸ Loko Yesu ahundzukula ndzhaku avavona na vali karhi vamulandza, aku ka vona: “Milava yini xana?” Vaku ka yena: “Mujondzisi utshama kwihi?”

³⁹ Yena aku ka vona: “Tanani mitakuvona.” Hi loko vafamba vayavona laha atshamaka kona, kutani vatshama siku lero na yena, nkarhi awulava kuva wa mune nimajambu.

⁴⁰ Aali Andreya, makwavu wa Simoni Petrosi, aali mun'we wa lavambirhi lavatweke lesvi Yohani asvivuleke, kutani valandza Yesu.

⁴¹ Andreya arhange akuma Simoni makwavu, kutani aku ka yena: “Hikumile Mesiya” ( hi lesvaku Kriste).

⁴² Kutani amuyisa ka Yesu. Loko Yesu amulangunta aku: “Wena u Simoni n'wana Jonasi; wena utavitaniwa Kefasi” ( lesvivulaku Petrosi, ribze ).

Filipi ateka Nataniyeli amuyisa ka Yesu

⁴³ Mundzuku wakona, Yesu aalava kuya Galileya, kutani akuma Filipi, aku ka yena: “Nilandze!”

⁴⁴ Kutani Filipi aali wa le Betisayida, doropa ra Andreya na Petrosi.

⁴⁵ Filipi akuma Nataniyeli aku ka yena: “Hikumile lweyi Moxe atsaleke timhaka ta yena Naweni; na vona vaprofeta vatitsalile: I Yesu wa le Nazareta n'wana Yosefa.”

⁴⁶ Nataniyeli aku ka yena: “Xana hi le Nazareta kungata xilo xa xinene ke?” Filipi aku ka yena: “Tana utavona ha wexe.”

⁴⁷ Yesu avona Nataniyeli ata ka yena, kutani avulavula ha yena aku: Vonani Muisrayele wa ntiyiso, lweyi kungaliki na kukanganyisa ka yena.

⁴⁸ Nataniyeli aku ka yena: “Unitivele kwihi?” Yesu amuhlamula aku: “Loko Filipi angasikuvitana mina nikuvonile na uli hansi ka nkuwa.”

⁴⁹ Nataniyeli amuhlamula aku; “Mujondzisi, wena u N'wana wa Xikwembu, wena u Hosi ya Israyele.”

⁵⁰ Yesu ahlamula aku ka yena: Xana upfumela hi lesvi ningate nikuvonile na uli hansi ka nkuwa ke? Utavona svilo lesvikulu kutlula lesvi.

⁵¹ Yesu atlhela aku ka yena: “Nitiyisile nili ka wena: Mitavona tilo ripfulekile ni tintsumi ta Xikwembu na tili karhi titlhantukela ni kuxikela henhla ka N'wana-wa-Munhu.”