Yakobo 3 - Testamente Leyimpsha Xichangana

Ta ririmi

¹ Vamakwerhu, asvifanelanga lesvaku lavotala xikarhi ka n'wina vahundzuka vajondzisi, hikuva masvitiva lesvaku kuyavanyisiwa ka hina vajondzisi, kutatika kutlula kuyavanyisiwa ka vanhu lavan'wana.

² Hina hinkwerhu hi ni svihoxo lesvotala, kambe loko munhu angahoxi kuvulavuleni ka yena, munhu yelweyo ahetisekile, wasvikota kufuma miri wa yena hinkwawu.

³ Loko hiveka matomu milon'weni ya mahanchi lesvaku matahiyingisa, hasvikota kukongomisa miri wa wona hinkwawu lomu hikurhandzaka.

⁴ Langutani svitimela sva mati tani hi xikombiso: Hambilesvi svinga svikulu svinene ni kususumetiwa hi mimoya ya matimba, svifambisiwa hi xihendzulo lexitsongo ngopfu, sviya laha mufambisi wa svona alavaka kuya kona.

⁵ Hi mukhuva wolowo, ririmi i xirho lexitsongo, kambe ritidzunisa ngopfu hi lesvikulu. Vonani hilaha xihlahla lexikulu xingahisiwaka hakona hi ndzilo lowutsongo!

⁶ Ririmi na rona i ndzilo, kuhomboloka ka rona kuringana ni tiko hi vukulu. Ri le xikarhi ka svirho sva hina, kutani rinyamisa miri hinkwawu, nasvona ritshivela ndlela hinkwayu ya ntumbuluku; kambe rona ritshiveliwa hi ndzilo wa le Tiheleni.

⁷ Tinxaka hinkwatu ta sviharhi, svinyanyana, svikokovi ni sva le lwandle, svajondzisiwa sviva svifuyiwa hi rixaka ra vanhu.

⁸ Kambe aku na munhu lweyi angakotaka kufuma ririmi; i kubiha loku kungarhuteliki, ritele hi mahlungu lawa madlayaka.

⁹ Ha rona hidzunisa Hosi, lweyi anga Tatana; nasvona ha rona hirhuketela vanhu lavayendliweke hi xifaniso xa Xikwembu.

¹⁰ Non'weni wun'we kuhuma kudzunisa ni kurhuka. Vamakwerhu, lesvi asvifaneli kuva tano.

¹¹ Xana xihlovo xingahumesa mati yonandziha ni lawa yodzuma ke?

¹² Vamakwerhu, nibzeleni, xana nkuwa wungapsala maolivha, kumbe mvhinya wungapsala makuwa ke? Asviyendleki lesvaku xihlovo xa mati lawa manga ni munyu ngopfu xipfelela mati yonandziha.

Ta vutlhari bzota hi le henhla

¹³ Xikarhi ka n'wina i mani lweyi atlhariheke, lweyi anga ni vutivi xana? Aakombise mintirho ya yena hi mahanyela lamanene, lawa manga ni vutlhari ni kutitsongahata.

¹⁴ Kambe loko timbilu ta n'wina titale hi mavondzo ni moya wotirhandza, mingatshukeni mitikulisa mihembela ntiyiso.

¹⁵ Vutlhari bzotano ahi bzona bzota hi le henhla, kambe i bza misava, bza vuhari ni bza madimoni.

¹⁶ Hikuva laha mavondzo ni moya wotirhandza svinga kona, ku ni mpfilumpfilu, ni mayendlela hinkwawu yohomboloka.

¹⁷ Kambe vutlhari bzota hi le henhla, bzi ni kurhula, ni kuwolova, ni kuyingiseta, bzitele musa ni mihandzu leyinene; kambe ngopfungopfu bzitengile; abziyi hi nghohe, kumbe kukanganyisa.

¹⁸ Kutani mihandzu ya mahanyela lamalulameke yihuma ka mbewu leyingabzaliwa hi kurhula, hi vanhu lavatirhaka mintirho ya kurhula.