Vakolosa 4 - Testamente Leyimpsha Xichangana

¹ Vinyi, hanyani ni svikarawa sva n'wina hi ndlela ya kululama, hi mfanelo, na mili karhi mitiva lesvaku na n'wina mi ni n'winyi matilweni.

Ta mikhongotelo

² Yanani mahlweni mitiyisela mikhongelweni, mihitekela kona mili karhi mikhensa;

³ na hina mihikhongelela, lesvaku Xikwembu xihipfulela nyangwa yojondzisa Rito ra xona, lesvaku hitavula rivaleni xihundla xa Kriste, lexi ninga jele hikolaho ka xona.

⁴ Kombelani lesvaku nixihlamusela hilaha svifanelaka hakona, loko nixitwalisa.

⁵ Tirhisanani ni va le handle hi kutlhariha, na mili karhi milondzovota nkama lowu minga na wona.

⁶ Kuvulavula ka n'wina akuve lokunene, loku kunandzihaka masiku hinkwawu, mitativa hilaha mifanelaka kuhlamula mun'wana ni mun'wana hakona.

Ta marungula yohetelela

⁷ Tikiko, makwerhu lweyi arhandzekaka, mutirhi lweyi atshembekeke ni mutirhikulorhi ntirhweni wa Hosi, atamitivisa timhaka hinkwatu ta mina, hilaha tiyimeke hakona.

⁸ Nimurhuma ata ka n'wina hikolaho ka svosvo, lesvaku mitativa hilaha hihanyaka hakona, ni lesvaku atatiyisa timbilu ta n'wina.

⁹ Ana Onezimo, makwerhu lweyi atshembekeke, lweyi arhandzekaka, lweyi anga mun'we wa n'wina; vatamitivisa hinkwasvu lesvihumeleleke halenu.

¹⁰ Arixtarko, lweyi anga jele svin'we na mina, wamirungula; svafana na Marka makwavu wa Barnaba, lweyi nimileleteke lesvaku mimuyamukela, loko ata koseno .

¹¹ Na yena Yesu lweyi avuliwaka Yusto, wamirungula. Hi vona ntsena, xikarhi ka Vayuda lavapfumeleke, lavangatirha na mina ntirhweni wa Mfumu wa Xikwembu; vanitiyisile svinene.

¹² Epafrasi, lweyi anga mun'we wa n'wina, mutirhi wa Yesu Kriste, wamirungula; wa mitsundzuka svinene masiku hinkwawu mikhongelweni ya yena, akombela lesvaku miva lavahetisekeke ni lavatiyeke, kuyendleni ka hinkwasvu lesvi Xikwembu xisvirhandzaka.

¹³ Ni mboni ya lesvaku atikarhatela n'wina svinene, n'wina ni lava vanga le Lawudokiya, ni le Hiyerapolisi.

¹⁴ Luka, dokodela lweyi arhandzekaka, wamirungula svin'we na Demasi.

¹⁵ Rungulani vamakwerhu lava vanga le Lawudokiya, na mamana Nimfa, ni kereke leyihlengeletanaka ndlwini ya yena.

¹⁶ Kutani loko papela leri rihlayiwile xikarhi ka n'wina, vonani lesvaku rihlayiwa ni le kerekeni ya Lawudokiya, ni lesvaku na n'wina mihlaya papela leri rihumaka le Lawudokiya.

¹⁷ Nasvona bzelani Arkipo, miku: “Vona lesvaku timfanelo leti unyikiweke tona ntirhweni wa Hosi utihetisisa svinene.”

¹⁸ Nitsala lesvi hi xiyandla xa mina, nili: Hi mina Pawulo! Mingarivaleni lesvaku ni le jele. Timpsalu ta Xikwembu ative na n'wina!