Vakolosa 3 - Testamente Leyimpsha Xichangana

¹ Hikolaho loko mipfuxiwile kufeni na Kriste, lavani svilo lesvinga henhla laha Kriste atshameke kona, vokweni ra xinene ra Xikwembu.

² Tsundzukani svilo lesvinga henhla, kungali svilo sva laha misaveni.

³ Hikuva mifile, kutani vutomi bza n'wina bzitumbetiwile na Kriste ka Xikwembu.

⁴ Vutomi bza n'wina bza xiviri i Kriste, kutani loko ahumelela, na n'wina mitahumelela na yena kukwetsimeni.

Ta kuhanya ka khale ni ta kuhanya lokumpsha

⁵ Loko svilitano, dlayani lesvi svinga sva misava ka n'wina, hi lesvaku vuwosvi, ni sva nsila, ni kuhisekela sva tingana, ni kunavela lokobiha, ni makwanga, kunga kugandzela svikwembu sva hava.

⁶ Hikolaho ka svona vukarhi bza Xikwembu bzita [henhla ka lavatiyalisaka].

⁷ Hi svona lesvi khale amihanya ka svona, loko mahafumiwa hi svona.

⁸ Kambe svosvi, svicukumeteni hinkwasvu, kunga kukarhata, ni kuleva, ni tihanyi. Kulumbeta, ni mavulavulela ya nsila, svingatshuki svihuma milon'wini ya n'wina.

⁹ Mingahembelaneni, lesvi mihlivileke mahanyela ya n'wina ya khale ni mintirho ya wona;

¹⁰ hikuva miyambalile munhu wa mahanyela lamampsha lweyi apfuxetiwaka minkama hinkwayu, lesvaku mikota kutiva hi kuhetiseka Xikwembu lexi ximitumbuluxeke hi xifaniso xa xona.

¹¹ Laha aku na Mugirika ni Muyuda, aku na lweyi ayimbeke ni lweyi angayimbangiki, aku na munhu wa matiko ni munhu wa hava, aku na xikarawa ni mutshunxeki, kambe i Kriste lweyi anga hinkwasvu ka hinkwavu.

¹² Hikolaho, lesvi mingavitaniwa hi Xikwembu kuva vahlawuliwa va xona lavarhandziwaka, yambalani moya wa timpsalu, ni vunene, ni kutitsongahata, ni kurhula, ni kuleha mbilu.

¹³ Yamukelanani, kutani loko mun'we asola mun'wana, avarivalelane. Kufana ni lesvi Hosi yimirivaleleke, na n'wina rivalelanani.

¹⁴ Kutani henhla ka lesvi hinkwasvu, kulaveka rirhandzu, ringarona leri ribohaka svilo hinkwasvu svitwanana hi kuhetiseka.

¹⁵ Kutani yendlani lesvaku kurhula ka Kriste kufuma timbilwini ta n'wina, kunga kurhula loku mivitaneliweke kona, mirini wun'we ntsena. Nasvona jondzani kukhensa.

¹⁶ Rito ra Kriste aritshame ka n'wina, riyandza. Jondzisanani, mikhongotelana hi vutlhari hinkwabzu, mitwalisa Xikwembu hi kuyimbelela tipisalma, ni tinsimu, ni kuyimbelela sva Moya, na mili karhi mikhensa timbilwini ta n'wina.

¹⁷ Kutani xin'wana ni xin'wana lexi mixiyendlaka, hi kuvulavula kumbe hi kutirha, xiyendleni hi vito ra Hosi Yesu, na mili karhi mikhensa Xikwembu Tatana ha yena.

Ta kuhanyisana vuton'wini lebzimpsha

¹⁸ Vavasati, titsongahateni ka vanuna va n'wina, hilaha svifanelaka hakona Hosini.

¹⁹ Vavanuna, rhandzani vasati va n'wina, mingatshameni hi kukho mivaholovela.

²⁰ Vana, yingisani vapsali va n'wina timhakeni hinkwatu, hikuva hi svona lesvitsakisaka Hosi.

²¹ Vatatana, mingaxaniseni vana va n'wina, lesvaku vangaheli mbilu.

²² Vatirhi, yingisani vinyi va n'wina va laha misaveni timhakeni hinkwatu, kungali ntsena loko vamilangutile, onge hi loko milava kutsakisa vanhu, kambe hi timbilu letinene, na mili karhi michava Hosi.

²³ Xin'wana ni xin'wana lexi mixiyendlaka, xiyendleni hi mbilu hinkwayu, kufana ni loko mitirhela Hosi, kungali vanhu;

²⁴ hikuva masvitiva lesvaku mitanyikiwa rifuwo hi Hosi, yili hakelo ya n'wina. Mi le kutirheleni ka Hosi ya hina Kriste.

²⁵ Loko ali muyendli wa lesvohomboloka, atatlheliseliwa lesvohomboloka lesvi asviyendleke; Xikwembu axiyi hi nghohe ya munhu.