Vaheveru 8 - Testamente Leyimpsha Xichangana

Yesu i Muprista lwenkulu wa Ntwananu lowumpsha

¹ Kutani-ke, nhlokomhaka ya lesvi hisvivulaka hi leyi: Hi ni Muprista lwenkulu wofana na yena, lweyi atshameke tlhelweni ra xinene ra xiluvelo xa vuhosi matilweni,

² lweyi atirhaka tempeleni leyokwetsima ni le tabernakeleni ya xiviri, leyi yimisiweke kungali hi munhu kambe hi Hosi.

³ Hikuva Vaprista lavakulu hinkwavu vavekiwile lesvaku vahumesa tinyiko ni timhamba; hi ndlela yoleyo svafanela lesvaku Muprista wakona na yena ava ni svin'wana lesvi asvihumesaka.

⁴ Loko ingi ahali laha misaveni, aangatava Muprista nikutsongo, hikuva vaprista lavahumesaka tinyiko hi kulerisa ka Nawu, vakona;

⁵ vatirha ntirho lowunga xifaniso ni ndzhuti wa lesvitirhiwaka matilweni. Svifana na Moxe: Loko alavile kuyaka tabernakele, alerisiwile hi Xikwembu, lexingate: “Uvona lesvaku uyendla hinkwasvu hi kulandza lesvi ukombiweke svona ntshaveni.”

⁶ Kambe hilaha timhaka tiyimeke hakona, Kriste akumile vutirheli lebzitlulaka ngopfu lebza khale hi kusaseka, hikuva ntwananu lowu anga muyimeli wa wona wutlakukile kutlula lowa khale, hikuva lowumpsha wubohiwile hi svitshembiso lesvitlakukeke.

⁷ Loko ingi ntwananu wolowo wa kusungula awungavanga ni svihoxo, akungatalaveka wun'wana wa vumbirhi.

⁸ Hikuva Xikwembu xivona kuhoxa ka vanhu va xona, loko xiku: “Masiku mata, kuvula Hosi, lawa ningatayendla ntwananu lowumpsha ni Vaisrayele, hambi vali va ka Yuda.

⁹ Wona wungakala wungafani ni lowu niwuyendleke khale ni vatatana va vona, siku leri nivakhomeke hi voko, nivahumesa tikweni ra Gibita. Ntwananu wa mina lowu, vawutshovile, hi kolaho anaha tikarhatelanga vona, kuvula Hosi.

¹⁰ Lowu hi wona ntwananu lowu ningatawuyendla ni Vaisrayele, ndzhaku ka masiku wolawo, kuvula Hosi: Nitanghenisa milawu ya mina miyehleketweni ya vona, niyitsala timbilwini ta vona, kutani nitava Xikwembu xa vona, vona vava vanhu va mina.

¹¹ Akungahavi na lweyi ajondzisaka muyakelani kumbe makwavu, aku: ‘Tiva Hosi!’ Hikuva vanhu hinkwavu vatanitiva, kusukela ka lwentsongo kuyafika ka lwenkulu.

¹² Nitava rivalela kuhomboloka ka vona, svijoho sva vona aningahasvitsundzuki.”

¹³ Loko Xikwembu xivulavula hi “ntwananu lowumpsha”, xiteka lowosungula wuva lowungahatirhiki; kutani lesvi svingahatirhiki, lesvihlakalaka, svi le kusuhi ni kunyamalala.