Vaheveru 7 - Testamente Leyimpsha Xichangana

Ta vuprista bza Melkisedeke

¹ Melkisedeke lweyi aali hosi ya Salema ni Muprista wa Xikwembu xa le henhlahenhla, loko Abrahamu avuya hi le kudlayeni ka tihosi. Melkisedeke ahlangane na yena, amukatekisa;

² kutani Abrahamu amupambulela sva vukhume bza hinkwasvu lesviphangiweke. Xosungula, vito ra ku “Melkisedeke” loko rihlamuseliwa, rivula “hosi ya kululama”; xa vumbirhi, i “hosi ya Salema”, hi lesvaku “hosi ya kurhula”.

³ Tatana wa yena angativiwi, hambi ali mamana wa yena, kumbe longoloko wa rixaka ra yena. Masiku ya yena amana masungulu, hambi bzili vutomi bza yena, abzi na makumu. Afana ni N'wana wa Xikwembu, kutani aya mahlweni ali Muprista hilaha kungaheliki.

⁴ Vonani hilaha anga nkulu hakona! Abrahamu, yena kokwana wa hina, amunyikile sva vukhume bza lesvi asviphangeke nyimpini.

⁵ Kutani vatukulu va Levhi lavanyikiweke ntirho wa vuprista, vapfumeleliwa hi Nawu kuyamukela sva vukhume lebzi bzihumesiwaka hi vanhu, hi lesvaku lebzi bzihumesiwaka hi vamakwavu, kasi na vona vamakwavu lava i vatukulu va Abrahamu.

⁶ Kambe munhu lweyi, hambilesvi angaliki wa rixaka ra Valevhi, ayamukele sva vukhume bzohuma ka Abrahamu, atlhela akatekisa Abrahamu lweyi aali ni svitshembiso.

⁷ Kuhava kukaneta lesvaku lwentsongo akatekisiwa hi lwenkulu.

⁸ Hi tlhelo rin'wana, sva vukhume sviyamukeliwa hi vanhu lavafaka; kasi hi tlhelo lerin'wana, sviyamukeliwa hi munhu lweyi Matsalwa mavulaka lesvaku wahanya.

⁹ Nasvona, munhu angavula lesvaku Levhi hi yexe, lweyi ayamukelaka sva vukhume, abzihumesile loko Abrahamu ali karhi abzihumesa,

¹⁰ hikuva ahali ndzeni ka kokwana wa yena Abrahamu loko Melkisedeke atlhangana na yena.

¹¹ Kutani-ke, loko onge kuhetiseka ka vanhu kuyendlekile hi mhaka ya vuprista bza va ka Levhi (hikuva hansi ka bzona vanhu vanyikiwile Nawu), xana akahalaveka yini, ka Muprista mun'wana “wa rixaka rin'we na Melkisedeke” ahumelela, matshan'wini ya kuva ni lweyi avuliwaka “wa rixaka rin'we na Aroni” ke?

¹² Hikuva loko vuprista bzicinca, na wona Nawu svafanela lesvaku wucinca.

¹³ Munhu lweyi svilo lesvi svivuliwaka henhla ka yena, aali wa rixaka rin'wana, nasvona ka bzona akusihuma ni mun'we lweyi atshamaka atirha le altarini.

¹⁴ Hikuva svi le rivaleni lesvaku Hosi ya hina yihumile rixakeni ra va ka Yuda, kutani Moxe angavulanga nchumu henhla ka rona hi tlhelo ra vaprista.

¹⁵ Mhaka yakona yi le rivaleni ni kutlula kolaho, hi lesvi kuhumeleleke Muprista mun'wana lweyi afanaka na Melkisedeke,

¹⁶ lweyi angava Muprista, kungali hi kulandza milawu ni svileriso sva vanhu, kambe kuli hi matimba ya vutomi lebzingawonhekiki.

¹⁷ Hikuva Matsalwa mavekile vumboni henhla ka yena, maku: “U Muprista hilaha kungaheliki, hi lesvi unga wa rixaka rin'we na Melkisedeke.”

¹⁸ Hi tlhelo, Nawu wa khale wuhelisiwile, hikuva awupfumala matimba, nasvona awungapfuni nchumu

¹⁹ (hikuva Nawu awuyendlanga xilo ni xin'we xiva lexihetisekeke); hi tlhelo rin'wana kutisiwile kulangutela lokumpsha, loku hakona hitshinelelaka Xikwembu.

²⁰ Nasvona, lesvi asviyendliwanga handle ka kuhlambanya. Lavangavekiwa vaprista khale, vavekiwile ntirhweni wa vona na kungavanga ni kuhlambanya,

²¹ kambe Yesu avekiwile kuva Muprista hi kuhlambanya ka Xikwembu, lexingate ka yena: “Hosi yihlambanyile, kutani ayingatlheleli ndzhaku; yite: ‘U muprista hilaha kungaheliki.’”

²² Lesvi sviyendla lesvaku Yesu ava mutiyisi wa ntwananu wa risima.

²³ Vaprista va khale avatele, hi mhaka ya rifu, avatsandzeka kuya mahlweni ni ntirho wa vona.

²⁴ Kasi ntirho wa yena wa vuprista, Yesu awukhomela makumu, hikuva ahanya hi masiku ni masiku.

²⁵ Hikolaho, wasvikota minkarhi hinkwayu kuponisa lavatshinelelaka Xikwembu ha yena, lesvi ahanyaka hi masiku hinkwawu ni kuvakhongelela.

²⁶ Asvifanela lesvaku hiva ni Muprista lwenkulu wotanu, wokwetsima, wopfumala nandzu, wokala xivati, wohambana ni vajohi, lweyi atlakusiweke henhla ka matilo.

²⁷ Ahambanile ni Vaprista lavakulu lavaya. Angaboheki kurhanga atihumesela timhamba toriha svijoho sva yena masiku hinkwawu na angasihumesela vanhu van'wana timhamba toriha svijoho sva vona. Ahihim! Lesvi, asviyendlile kan'we loko atinyiketile hi yexe.

²⁸ Hakunene Nawu wuveka vanhu lesvaku vava Vaprista lavakulu, hambilesvi vangaliki na matimba; kambe rito ra kuhlambanya leriteke ndzhaku ka Nawu, riveka N'wana kuva Muprista, yena lweyi ahetisekeke hilaha kungaheliki.