Vaheveru 6 - Testamente Leyimpsha Xichangana

¹ Hikolaho, ahitshikeni kuyima ka tijondzo letosungula ta vukriste, kambe hikongoma kuhetisekeni, hingahatlheleni hijondzisa hi ta masungulu, tinga ta kuhundzuka ka mintirho leyifeke, ni ta kupfumela ka Xikwembu,

² jondzo henhla ka ta kukhuvula, nitakutlhanteka vanhu mavoko, ni ta kupfuka ka vafi, ni ta siku ra kuyavanyisiwa ka makumu.

³ Kutani svosvo, hitasviyendla loko Xikwembu xipfumela.

⁴ Asvinge koteki ka lava vatshamaka vavoningiwa hi Xikwembu, lavanampseke nyiko ya le tilweni, lavayaveliweke Moya Lowokwetsima,

⁵ lavanganampsa kunandziha ka Rito ra Xikwembu ni matimba ya sva minkarhi leyitaka,

⁶ loko kutani vatlhelela ndzhaku, asviyendleki kuvavuyisela kambe kuhundzukeni; vatlhela vavamba N'wana wa Xikwembu, vamuhundzula xihlekiso.

⁷ Loko misava yinwile mati ya mpfula leyitalaka ku na henhla ka yona, ni loko yimilisa svimilwa lesvipfunaka lava vayirimaka, yikuma minkateko leyihumaka ka Xikwembu.

⁸ Kambe loko yimilisa mintwa ni svihlehlwana, ayipfuni nchumu, kutani yilekusuhi ni kurhukiwa; makumu ya yona i kuhisiwa.

⁹ Ni loko hivulavulisa svosvo, ahikanakani hi tlhelo ra n'wina, varhandziwa, hikuva mitiva lesvinga svinene kutlula svin'wana, lesvi svingamifikisaka kuponisiweni.

¹⁰ Hikuva Xikwembu axi na mona, xingakala xingarivali ntirho wa n'wina ni rirhandzu leri mirikombeke hi vito ra xona, hi kutirhela vahlawuliwa va xona, hilaha misviyendlaka hakona ni svosvi.

¹¹ Kutani hinavela ngopfu lesvaku mun'wana ni mun'wana wa n'wina akomba kuchivirika koloko kuyafika makumu, kukondza kuhetiseka kulangutela ka n'wina.

¹² Ahilavi lesvaku mihundzuka lava vololoha, kambe hilava lesvaku mifana ni vanhu lava svosvi vakumaka lesvi vatshembisiweke svona, hi mhaka ya kupfumela ka vona hi kulehisa mbilu.

Xitshembiso xa Xikwembu xitiyile

¹³ Loko Xikwembu xitshembisile Abrahamu, lesvi akuli hava mun'wana lweyi anga mukulukumba ka xona lweyi axitahlambanya hi vito ra yena, xiyo tihlambanyela hi xoxe,

¹⁴ xiku: “Hakunene nitakukatekisa, nasvona nitakunyika vana votala.”

¹⁵ Hi ndlela yoleyo Abrahamu, hi kulehisa mbilu, akumile lesvi atshembisiweke svona.

¹⁶ Loko vanhu vahlambanya, vahlambanya hi lweyi anga nkulu ka vona, kutani kuhlambanya kutiyisa lesvi svivuliweke nasvona kuhelisa kuphikizana hinkwaku ka vona.

¹⁷ Hikolaho, loko Xikwembu xinavelile kukombisa hi ndlela leyikholwisaka, ka lava avali vamajandzhaka vaxitshembiso, lesvaku xingakala xingatlheleli ndzhaku makungwini ya xona, xisvitiyisile hi kuhlambanya.

¹⁸ Lesvaku, hi svilo svimbirhi lesvingacinciki, lesvi ka svona svingayendlekiki lesvaku Xikwembu xikumeka na xili muhembi. Kutani hina lava hitsutsumeleke kuyatumbela ka xona, hitiya nhlana svinene, hiyamukela hi mandla mambirhi kulangutela loku kuvekiweke mahlweni ka hina.

¹⁹ Kulangutela loku kufana ni nsoma ya hefemulo leyitiyeke ni kutshembeka; yinghena kuyafika ni le ndzeni ka nguvu ya xisirhelelo.

²⁰ Yesu anghenile kona kuva murhangeli hikolaho ka hina, yena lweyi avekiweke Muprista lwenkulu hilaha kungaheliki, hi lesvi anga wa rixaka rin'we na Melkisedeke.