Vaheveru 5 - Testamente Leyimpsha Xichangana

¹ Muprista lwenkulu mun'wana ni mun'wana, lesvi ahlawuliweke xikarhi ka vanhu, avekiwile lesvaku atayimela vanhu kuhlanganeni ka vona ni Xikwembu, ni lesvaku ahumesa tinyiko ni timhamba hikolaho ka svijoho sva vona.

² Angakota kutirha hi vunene ka lavangativiki nchumu ni ka lavahambukaka ndleleni, lesvi na yena arhendzeliweke hi minkarhalo.

³ Xilesvo wa boheka kutihumesela timhamba hikolaho ka svijoho sva yena, svin'we ni kuhumesela vanhu.

⁴ Nasvona, munhu angatihlawuleli ntirho lowu wo dzuneka, kambe avitaniwa hi Xikwembu, kukota lesvi svingayendliwa ka Aroni.

⁵ Svive tano na yena Kriste: Angatitlakusanga kuyendliwa Muprista lwenkulu, kambe ayo vekiwa hi Xikwembu, lexi xingate ka yena: “U n'wananga, namuntlha ni kuvelekile.”

⁶ Kun'wana xitlhele xivula xiku: “U Muprista hilaha kungaheliki, hi lesvi unga wa rixaka rin'we na Melkisedeke.”

⁷ Masikwini ya yena ya kuhanya laha misaveni, Yesu akhongelile nikukombela hi kutitsongahata, ahuwelela hi matimba ni kurila minhloti, ka lweyi anga ni matimba ya kumuponisa kufeni, kutani ayingisiwile hikolaho ka xichavu xa yena.

⁸ Hambilesvi aali N'wana wa Xikwembu, ajondzile kuyingisa hi mhaka ya kuxaniseka ka yena.

⁹ Kutani loko ayendliwile lweyi ahetisekeke, ahundzukile xihlovo xa kuponisiwa lokungaheliki ka hinkwavu lava vamuyingisaka,

¹⁰ hikuva avekiwile Muprista lwenkulu hi Xikwembu, hi lesvi anga wa rixaka rin'we na Melkisedeke.

Hingatshukeni hitlhelela ndzhaku!

¹¹ Ka mhaka leyi, hi ni lesvotala lesvi hingasvivulaka, lesvi svinonon'hwaka kusvitlhamusela, hikuva tindleve ta n'wina ti ni vulolo bza kuyingisa.

¹² Hikuva hambilesvi svosvi amifanela kuva vajondzisi, mahalava kujondzisiwa, atijondzo tosungula mayelanu ni Rito ra Xikwembu, hi munhu mun'wana. Mahalava ntswamba, kungali svakuja lesvitiyeke.

¹³ Mani na mani lweyi ahanyaka hi ntswamba, angasikuma jondzo ya lesvolulama, hikuva i xihlangi.

¹⁴ Kambe svakuja lesvitiyeke i sva lava vakuleke, i sva lava miyehleketo ya vona yitoloveleke kuyehleketa, lavatoloveleke kuhlawula lesvinene ka lesvobiha.