Vaheveru 3 - Testamente Leyimpsha Xichangana

Yesu atlula Moxe

¹ Loko svilitano, vamakwerhu lavakwetsimaka, lava na n'wina miyaveliwaka kuvitaniwa ka le tilweni, yanakanyani Yesu, murhumiwa wa Xikwembu ni Muprista lwenkulu wa vukhongeli bza hina.

² Atshembekile ka Lweyi amuhlawuleke, tani hi Moxe lweyi na yena aatshembekile ndlwini hinkwayu ya Xikwembu.

³ Hambi svilitano, Yesu avuliwa lweyi kudzuneka kumufanelaka ngopfu kutlula Moxe, tani hi lesvi muyaki wa yindlo adzunisiwaka kutlula yindlo yakona.

⁴ Hikuva yindlo yin'wana ni yin'wana yiyakiwile hi munhu, kambe muyaki wa svilo hinkwasvu i Xikwembu.

⁵ Kutani-ke, Moxe aatshembekile ndlwini hinkwayu ya Xikwembu tani hi nandza, lesvaku aveka vumboni bza svilo lesvi asvahatavuliwa masikwini lawa mataka.

⁶ Kambe Kriste, atshembekile tani hi n'wana lweyi anga n'winyi ndlwini ya Xikwembu. Kutani hina hi yindlo ya xona, loko hikhoma hitiya, kutshembeni ni le kutlangeleni ka hina hi tlhelo ra svilo lesvi hisvilangutelaka.

Ta kuwisa lokungalungiseliwa vanhu va Xikwembu

⁷ Hikolaho, svifana ni lesvivuliwaka hi Moya Lowokwetsima loko wuku: “Namuntlha, loko mitwa rito ra Xikwembu,

⁸ minganonon'hwiseni timbilu ta n'wina, kukotisa lesvi mitshamaka misviyendla loko mixi pfukelile, siku leri mingaxiringa ha rona mananga.

⁹ Vatatana va n'wina varingetile kuniringa kona, kuvula Xikwembu, kutani vavonile mintirho ya mina hi xipimo xa mune wa makume ya malembe.

¹⁰ Hikolaho ka svona, nihlundzukela vanhu va rixaka lero, niku: ‘Timbilu ta vona tihambuka ndleleni masiku hinkwawu, avativanga tindlela ta mina.’

¹¹ Xilesvo, nihlambanyile vukarhini bza mina, lesvaku vangakala vangangheni kuwiseni ka mina.”

¹² Vamakwerhu, tivoneleni lesvaku kungavi na mun'we xikarhi ka n'wina lweyi anga ni mbilu leyobiha, leyingaliki na kupfumela, kutani ahambukela kule ni Xikwembu lexihanyaka.

¹³ Kambe khongotelanani masiku hinkwawu, loko mahatwa rito leringe “namuntlha”, lesvaku kungavi na mun'we xikarhi ka n'wina lweyi atinonon'hwisaka hi kuxisiwa hi vujohi.

¹⁴ Hikuva hi ni kuyaveliwa ka Kriste ntsena loko hikhoma hitiya kuyisa makumu, kutshembeni ka hina loku kosungula,

¹⁵ nkarhini lowu kahavuliwaka marito lawa mange: “Namuntlha, loko mitwa rito ra Xikwembu, minganonon'hwiseni timbilu ta n'wina, kukotisa lesvi mitshamaka misviyendla loko mixipfukelile.”

¹⁶ Xana i vamani lavatweke marito lawa, kambe vavuya vaxipfukela, ke? Xana avangali hinkwavu lavasukeke le Gibita, na vafambisiwa hi Moxe, ke?

¹⁷ Kutani avali vamani lava xingavahlundzukela hi malembe ya mune wa makume ke? Xana ahi lava vajoheke, lava mintsumbu ya vona yiweke yisala mananga ke?

¹⁸ Kutani Xikwembu xihlambanyele vamani lesvaku “vangakala vangangheni kuwiseni ka xona” xana? Xana axingavuli vona lava avatiyalisa ke?

¹⁹ Hikolaho, hasvivona lesvaku vatsandzekile kunghena kuwiseni, hi mhaka ya kukala kupfumela.