Vaheveru 2 - Testamente Leyimpsha Xichangana

Ta kuponisiwa lokukulu

¹ Hikolaho, hifanela kuhlayisa svinene timhaka leti hititweke, lesvaku hitakala hingahambuki ndleleni ya tona.

² Hikuva loko mhaka leyivuliweke hi tintsumi yitiyisiwile, ni loko kutlula ka milawu ni kutiyalisa hinkwaku kukumile kukhatisiwa loku kufanelaka,

³ xana hina hingapona hi ndlela yihi, loko hinyenya kuponisiwa lokukulu kotanu ke? Hosi yivulile ta kuponisiwa loku, na kahali kusunguleni, kutani kutlhela kutiyisiwa ka hina hi lava vatweke timhaka takona.

⁴ Xikwembu na xona axilikarhi xitiyisa vumboni bzakona hi kuyendla svikombiso ni svihlamaliso ni mahlori ya tinxakaxaka, ni kuyavela tinyiko ta Moya Lowokwetsima hi kurhandza ka xona.

Ta murhangeli kuponiseni

⁵ Hikuva misava leyimpsha leyi yingatata, yona leyi hivulavulaka hi yona, Xikwembu axiyivekanga mavokweni ya tintsumi.

⁶ Kambe ndhawini yin'wana kuvuliwile vumboni lebzinge: “Munhu i ncini lesvaku uva ni mhaka na yena, kumbe n'wana-wa-munhu lesvaku utikarhatela yena xana?

⁷ Umuvekile ava hansinyana ka tintsumi, umutlhantekile hari ya kutwala ni kuchaviseka nhlokweni.

⁸ uvekile hinkwasvu sviva hansi ka minkondzo ya yena.” Kutani-ke, loko Xikwembu xivekile hinkwasvu hansi ka minkondzo ya yena, svivula lesvaku axisiyanga xilo ni xin'we lexingaliki hansi ka yena, kambe, hilaha timhaka tiyimeke hakona, hina ahisvikoti kuvona svilo hinkwasvu lesvi svinga hansi ka matimba ya yena.

⁹ Kambe hivona Yesu, lweyi angayendliwa kuva hansi ka tintsumi nkarhinyana, svosvi anganyikiwa kukwetsima ni kutwala sviva hari ya vuhosi nhlokweni ya yena, hi mhaka ya kutwisiwa kuvaviseka ka rifu; na svili lesvaku, hi timpsalu ta Xikwembu, atwa nhlomulu wa rifu hikolaho ka munhu mun'wana ni mun'wana.

¹⁰ Hikuva asvifanela lesvaku Xikwembu, lexi svilo hinkwasvu svihanyelaka xona ni kuhlayisiwa hi xona, loko xifikisa vana va xona lavotala kukwetsimeni, xiyendla lesvaku murhangeli wa kuponisiwa ka vona ava lweyi ahetisekeke, hi mhaka ya kuvaviseka ka yena

¹¹ Hambi ali Yesu lweyi abasisaka vanhu svijohweni, hambi vali lavabasisiwaka, hinkwavu vahuma ka Tatana mun'we. Hi yona mhaka leyi yendlaka lesvaku Yesu anga khomiwi hi tingana nikuvavula vamakwavu,

¹² aku ka Xikwembu: “Nitatwalisa vito ra wena ka vamakwerhu, nitakudzunisa hi tinsimu xikarhi ka nhlengeletanu.”

¹³ Atlhela aku: “Nitaveka kutshemba ka mina ka xona.” Nasvona aku: “Hi mina lweyi, svin'we nivana lava Xikwembu xininyikeke vona.”

¹⁴ Hikolaho, lesvi vana vanga va nyama ni ngati yin'we hinkwavu, svitano na yena: I wa ntumbuluku mun'we na vona lesvaku, hi rifu ra yena, atakota kuhelisa lweyi anga ni matimba ya rifu, anga yena Diyavulosi,

¹⁵ kutani atshunxa hinkwavu lava avali vukaraweni vutomi bza vona hinkwabzu, hi mhaka ya kuchava rifu.

¹⁶ Hikuva, hakunene, ahi tintsumi leti apfunaka tona, kambe apfuna vatukulu va Abrahamu.

¹⁷ Hikolaho asvifanela lesvaku ayendliwa lweyi afanaka ni vamakwavu hi matlhelo hinkwawu, lesvaku atava Muprista lwenkulu wa timpsalu ni lweyi atshembekeke ntirhweni wa Xikwembu, lesvaku asusa svijoho sva vanhu.

¹⁸ Hikuva lesvi na yena angatwa kuvaviseka ni kuringiwa, wasvikota kupfuna lavaringiwaka.