Vaheveru 13 - Testamente Leyimpsha Xichangana

Ta mahanyela lawa matsakisaka Xikwembu

¹ Yanani mahlweni mirhandzana kukota vamakwavu.

² Mingarivaleni kuyamukela vapfumba, hikuva hi kuyendla svosvo van'wana vayamukelile tintsumi na vangasvitivi.

³ Yanakanyani lavanga majele, kufana ni loko ingi na n'wina mi le jele na vona; kutani ni lava vaxanisiwaka, mifanele kutitwa na mili na vona, hikuva na n'wina mi ni miri.

⁴ Muchado akuve lowu xiximiwaka hi vanhu hinkwavu, mubedo wa vatekani wunganyamisiwi, hikuva Xikwembu xitayavanyisa tinghwavana ni vawosvi.

⁵ Mingafumiweni hi male kuhanyeni ka n'wina kambe tsakani hi lesvi minga na svona, hikuva Xikwembu xite: “Ningakala ningakutshiki, kumbe kukucukumeta, ni siku ni rin'we.”

⁶ Hikolaho hingavula nahitiyile, hiku: “Hosi i mupfuni wa mina, aningachavi nchumu; munhu anganiyendla yini xana?”

⁷ Yanakanyani vafambisi va n'wina, lavangamijondzisa rito ra Xikwembu; yehleketani vutomi bza vona ni makumu ya bzona, milandza ntila wa kupfumela ka vona.

⁸ Yesu Kriste wahali yena tolo ni namuntlha ni hilaha kungaheliki.

⁹ Mingakanganyisiweni hi tijondzo ta tinxakaxaka letingatwisisekiki. Svilulamile loko mbilu yitiyisiwa hi timpsalu ta Xikwembu, kungali hi milawu hi tlhelo ra svakuja, lesvingapfuniki nchumu ka lava vasvilandzelelaka.

¹⁰ Hi ni alitari leyi vaprista lavatirhaka ka tabernakele vangaliki na mfanelo ya kuja svakuja svakona.

¹¹ Hikuva ngati ya svifuyu leyitisiwaka ndhawini leyokwetsimisisa hi Muprista lwenkulu kutakhongelela svijoho, anyama ya svona yihiseliwa handle ka vugovelo.

¹² Hi mukhuva wolowo, na yena Yesu atwisiwe kuvaviseka na ali handle ka nyangwa ya doropa, lesvaku atabasisa vanhu vakwetsimisiwa hi ngati ya yena ya xiviri.

¹³ Hikolaho, ahihumeni hiya le ka yena handle ka vugovelo, nahirhwele kurhuketeliwa ka yena.

¹⁴ Hikuva laha misaveni, ahi na doropa leritiyeke, kambe hilava doropa leri rahataka.

¹⁵ Loko svilitano, ahihumeseni timhamba masiku hinkwawu ha yena Yesu, hidzunisa Xikwembu ha tona, na hili karhi hikhensa vito ra xona hi marito lawa mahumaka milon'weni ya hina.

¹⁶ Mingarivaleni kuyendla lesvinene ni kupambulelana lesvi minga na svona, hikuva timhamba leti hi tona letitsakisaka Xikwembu.

¹⁷ Yingisani varhangeli va n'wina, mititsongahata ka vona, hikuva vahitekela mimoya ya n'wina, kufana ni vanhu lavangatavutisiwa henhla ka yona. Mivona lesvaku valandza ntirho wa vona hi kutsaka, vangawuyendli hi kuvilela, hikuva loko vavilela, asvingamipfuni nchumu n'wina.

¹⁸ Hikhongeleleni, hikuva hitshemba svinene lesvaku hi ni ripfalu leritengeke, na hili karhi hinavela kuyendla lesvilulameke minkarhi hinkwayu.

¹⁹ Nimikhongotela kuyendlisa svosvo, hi mbilu hinkwayu ya n'wina, minikhongelela lesvaku nitakota kuhantla ni vuyiseliwa ka n'wina.

Xikhongelo

²⁰ Svosvi-ke, Xikwembu xa kurhula lexipfuxeke Hosi ya hina Yesu xikarhi ka vafi, yena lweyi anga Murisi Lwenkulu wa tinyempfu, lweyi angafunga ntwananu lowungaheliki hi ngati ya yena,

²¹ ingi xingamilongisa hinkwasvu lesvinene lesvingatamipfuna kuyendla kurhandza ka xona, na xili karhi xitirha ka hina lesvi xisvitsakelaka, ha Yesu Kriste. Ka xona akuve kudzuneka hi masiku ni masiku. Amen!

Marito yohetelela

²² N'wina vamakwerhu, na mikhongotela svinene, yamukelani marito ya mina, hambilesvi nimitsalelaka apapela rokoma.

²³ Mifanela kutwisisa lesvaku Timotewu makwerhu ahumesiwile jele; loko ahantla afika, nitatamivona na nili na yena.

²⁴ Rungulani varhangeli va n'wina hinkwavu ni vahlawuliwa va Xikwembu hinkwavu. Lava vahumaka tikweni ra Italiya vamirungula.

²⁵ Timpsalu ta Xikwembu ative na n'wina hinkwenu.