Vaheveru 12 - Testamente Leyimpsha Xichangana

Ta Xikwembu loko xilaya vana va xona

¹ Hikolaho, lesvi hirhendzeliweke hi refu lerikulu ra timboni, na hina ahitshikeni hinkwasvu lesvi svihisivelaka, ni vujoho lebzihantlaka kuhinamarhela, hitsutsuma na hili ni kutiyisela kutsutsumeni ka mpfhuka lowu hi vekeliweke wona.

² Ahilanguteni Yesu, musunguli ni muhetisisi wa kupfumela ka hina, lweyi angachavangiki kurhwala xihambanu, angavuli nchumu hi tingana takona, hikolaho ka kutsaka loku kuvekiweke mahlweni ka yena; kutani svosvi atshamile vokweni ra xinene xiluvelweni xa Xikwembu.

³ Yanakanyani yena lweyi angatiyisela hi ndlela leyotano, loko vajohi valwa na yena, lesvaku mingakarhali kumbe kuhela mbilu.

⁴ Akulweni ka n'wina ni vujoho, amisilwa mikondza mihalata ngati.

⁵ Nasvona, mirivale marito ya kukhongotela, lawa ha wona mivuliwaka vana, lawa mange: “N'wananga, ungateki kulayiwa hi Hosi ukuyendla mhaka leyitsongo, nasvona ungaheli mbilu loko utshinyiwa hi yona.

⁶ Hikuva Hosi yilaya lweyi yimurhandzaka, yiba n'wana mun'wana ni mun'wana lweyi yimuyamukelaka.”

⁷ Mifanela kutiyisela kulayiweni; Xikwembu ximilanguta kufana ni vana; hikuva hi wihi n'wana lweyi angalayiwiki hi tatana wa yena xana?

⁸ Loko mitshikiwa mingalayiwi, hi kulaya loku van'wana hinkwavu valayiweke hakona, svivula lesvaku mi vana vopsaliwa handle, amivana va laha kaya.

⁹ Handle ka svona, hivile ni vatatana va nyama lava avahilaya, kutani hivaxiximile. Xana ahinge titsongahati ngopfu kutlula svosvo ka Tatana wa hina moyeni, lesvaku hihanya xana?

¹⁰ Vatatana va hina vahilayile hi nkarhinyana, hi kurhandza ka vona, kambe yona Hosi yihilayela kuhipfuna, lesvaku hihlengela vukwetsimi bza yona.

¹¹ Hikuva kulaya hinkwaku, kuvoneka na kuvavisa hi nkarhinyana wolowo, lokungatsakisiki, kambe ndzhaku, kuveka mihandzu ya kurhula ya vutomi lebzolulama, ka lava vajondzisiweke hi kona.

Svileriso ni svitsundzuxu

¹² Hikolaho, tiyisani mavoko ya n'wina lawa maheleke matimba, ni matsolo ya n'wina lawa mangundlangundlaka.

¹³ Mifanela kululamisela milenge ya n'wina tindlela letolulama, lesvaku xirho lexilimaleke xingasuleki, kambe xihanyisiwa.

¹⁴ Ringetani hi matimba kuhanya hi kurhula ni vanhu hinkwavu, miringeta ni kukwetsima, hikuva handle ka kukwetsima aku na munhu ni mun'we lweyi angatavona Hosi.

¹⁵ Mitivonela ka lesvaku kungavi ni mun'we lweyi atsandzekaka kukuma minkateko ya Hosi; tivoneleni xikarhi ka n'wina kungatshuki kumila “rimintsu ra kubava” lerivangaka kukarhateka, ni kunyamisa lavotala.

¹⁶ Kungavi ni mun'we lweyi ahundzukaka muwosvi kumbe lweyi angaliki na mhaka ni vukhongeli, kufana na Esawu lweyi anga xavisa timfanelo ta vumativula bza yena hi mhaka ya mpandzwanyana wa svakuja.

¹⁷ Masvitiva lesvaku, ndzhaku ka svona, loko anavelile kukuma minkateko, ayaliwile hikuva angakumanga ndlela yohundzuluxa lesvi aasviyendlile, hambi loko asvilavile hi minhloti.

¹⁸ Amitshinelelanga ntshava leyikhumbekaka, leyipfurhaka ndzilo, ni munyama, ni hunguva, ni xidzedze, kukota Vaisrayele.

¹⁹ Amitwanga mpfumawulu wa nanga, ni huwa ya marito: Lava vangatwa marito yakona vakombelile hi matimba lesvaku kungahayengeti kuvuliwa marito man'wana ka vona,

²⁰ hikuva avangakoti kurhwala xileriso lexi avanyikiwile xona, lexinge: “Hambi loko xova xifuyu, loko xokhumba ntshava, xitakhandliwa hi maribze.”

²¹ Hakunene lesvi vasvivoneke, asvichavisa ngopfu, kukondza Moxe aku: “Narhurhumela hi kuchava.”

²² Kambe n'wina, mitshinelele ntshava ya Siyoni ni doropa ra Xikwembu lexihanyaka, Yerusalema wa le tilweni, ni le ka tintsumi letingakontekiki hi kutala. Mitile nkhubzini wa kutsaka,

²³ ni le nhlengeletanweni ya vanhu va mativula lava mavito ya vona matsaliweke tilweni, ni le ka Muyavanyisi lweyi anga Xikwembu xa vanhu hinkwavu, ni le ka mimoya ya vanhu lavolulama lavanyikiweke kuhetiseka;

²⁴ mitile ka Yesu, muyimeli wa ntwananu lowumpsha, ni le ngatini leyin'watsekiweke, leyivulavulaka lesvikulu kutlula ngati ya Abele.

²⁵ Tivoneleni lesvaku mingayaleli lweyi avulavulaka. Lava vayaleke kuyingisa mutsundzuxi wa vona laha misaveni, avaponanga. Hikolaho, xana hina hingaponisa kuyini, loko hiyala kuyingisa lweyi ahitsundzuxaka na ali matilweni xana?

²⁶ Nkarhini wolowo rito ra yena ritsekatsekisile misava, kambe svosvi atshembisile aku: “Nahatatsekatsekisa, kungali misava ntsena, kambe na rona tilo.”

²⁷ Marito lawa mange: “Nahatatsekatsekisa”, mavula lesvaku svilo lesvivumbiweke, svitatsekatsekisiwa ni kususiwa, lesvaku lesvingatsekatsekiki svitasala.

²⁸ Hikolaho, ahikhenseni, lesvi hikumeke mfumu lowungatsekatsekiki, kutani hi mukhuva lowu, ahigandzeleni Xikwembu hi ndlela leyiyamukelekaka, hi kutitsongahata ni hi xichavu.

²⁹ Hikuva Xikwembu xa hina i ndzilo lowuhelisaka.